អញ្ចឹងសោះបានជាប្រាប់សង្សារឲ្យជិះវាងផ្លូវមួយហ្នឹង!

អញ្ចឹងសោះបានជាប្រាប់សង្សារឲ្យជិះវាងផ្លូវមួយហ្នឹង!

យុវវ័យធ្លាប់មានសង្សារណាដែលមិនធ្លាប់ឌុបគ្នាដើរលេងនោះ តែអ្នកខ្លះពេលដែលកំពុងតែឌុបសង្សារដើរលេង សាសងអូនបងសុខៗ ស្រាប់តែត្រូវបានសង្សារប្រាប់ថា៖ “បងមិនបាច់ជិះកាត់តាមផ្លូវហ្នឹងទេ!”។ ហើយក៏ប្រាប់ឲ្យជិះតាមផ្លូវផ្សេង ឬជិះផ្លូវវាងជំនួសវិញ ដោយសារតែមានមូលហេតុផ្សេងៗ។ និយាយអញ្ចឹង តើមានអាថ៌កំបាំងអ្វីទៅហ្ន៎ បានជាអ្នកខ្លះមិនហ៊ានឲ្យសង្សារខ្លួន ជិះកាត់តាមផ្លូវមួយចំនួននៅក្នុងទីក្រុងភ្នំពេញ?

បើតាមការប្រាប់ឲ្យដឹងពីយុវជន ឯម ចន្ទ្រា អាយុ២៤ឆ្នាំ និស្សិតនៃវិទ្យាស្ថានពហុបច្ចេកទេសព្រះកុសុមៈ បានប្រាប់ឲ្យដឹងថា៖ “នេះសុទ្ធតែជាបទពិសោធន៍របស់ខ្ញុំពីមុនដែលធ្លាប់ឆ្លងកាត់”។ ចន្ទ្រា បាននិយាយទៀតថា៖ “មានម្ដងនោះ ល្ងាចឡើងខ្ញុំបានឌុបសង្សារដើរលេងតាមធម្មតា តែពេលបត់តាមផ្លូវមួយនៅម្ដុំផ្លូវភ្លោះអូរឫស្សី ស្រាប់តែសង្សារខ្ញុំប្រាប់ភ្លាមថា កុំជិះតាមផ្លូវហ្នឹងអី ព្រោះកាត់តាមផ្ទះអ៊ុំរបស់គេ។ ខំតែភ័យស្មានតែមានរឿងអី តាមពិតខ្លាចអ៊ុំគេឃើញសោះ”។

ស្រដៀងគ្នានេះដែរ យុវជន ប៉ូ កីឡា អាយុ២៥ឆ្នាំ សព្វថ្ងៃជាបុគ្គលិករដ្ឋបាលនៃក្រុមហ៊ុនមួយនៅម្ដុំផ្លូវជា សុផារ៉ា បានដំណាលប្រាប់រឿងរបស់ខ្លួនថា ប្រហែលជាមួយខែមុននេះរូបគេ និងសង្សារបានជិះម៉ូតូឌុបគ្នាទៅញ៉ាំអីពេលថ្ងៃត្រង់ រួចក៏ជិះកាត់តាមក្រសួងមួយនៅក្បែរវិមានឯករាជ្យ ស្រាប់តែត្រូវសង្សារប្រាប់ទាំងស្លន់ស្លោឲ្យជិះផ្លូវផ្សេងវិញ។ “ខ្ញុំភ្ញាក់ព្រើតហ្មង ភ្លេចគិតថាប៉ារបស់សង្សារខ្ញុំធ្វើការនៅហ្នឹង”។ ចន្ទ្រា បន្ថែម។

រូបតំណាង

បញ្ហាដែលបណ្ដាលឲ្យយុវវ័យដែលជាគូសង្សារមិនហ៊ានជិះកាត់តាមផ្លូវមួយចំនួន មិនមែនមានតែប៉ុណ្ណឹងនោះទេ។ ជាក់ស្ដែង កញ្ញា ហ៊ួង សុភារី អាយុ២៣ឆ្នាំ និស្សិតឆ្នាំទី៣នៃសាកលវិទ្យាល័យបញ្ញាសាស្ត្រកម្ពុជា លើកឡើងថា រឿងនេះពិតជាមានកើតឡើងមែន។ អ្នកខ្លះគេមិនចង់ជិះកាត់តាមផ្លូវមួយចំនួន ព្រោះខ្លាចបងប្អូនឃើញបែកការណ៍ ឧទាហរណ៍ មានអ្នកខ្លះមិនហ៊ានជិះកាត់មុខសាលារៀនរបស់បងប្អូន កន្លែងធ្វើការប៉ាម៉ាក់ជាដើម។

សុភារី បន្តទៀតថា៖ “ទាំងខ្ញុំទាំងគេ ច្បាស់ជាមិនហ៊ានជិះកាត់ទេ ទោះពួកគាត់ដឹងថាយើងមានសង្សារហើយក៏ដោយ ដូចជាអៀនខ្លួនខ្លាំងណាស់”។

មូលហេតុសំខាន់នៅពីក្រោយបញ្ហានេះមិនមែនមានត្រឹមតែប៉ុណ្ណឹងទេ នៅមានរឿងសំខាន់មួយទៀត ដែលត្រូវបានអ្នកធ្លាប់មានសង្សារប្រាប់ឲ្យដឹងដែរនោះ គឺអត់ហ៊ានជិះកាត់ផ្លូវខ្លះ ដោយសារតែមិនចង់ឲ្យសង្សារចាស់របស់ខ្លួនបានឃើញ។

ទាក់ទងទៅនឹងបញ្ហានេះ យុវជន ហង្ស ឧត្ដម និស្សិតច្បាប់នៃសាកលវិទ្យាល័យចំរើនពហុបច្ចេកវិទ្យា លើកហេតុផលសំខាន់មួយផ្សេងទៀតថា៖ “ខ្ញុំក៏ធ្លាប់អត់សប្បាយចិត្តដោយសារតែរឿងសង្សារប្រាប់ឲ្យជិះផ្លូវវាងហ្នឹងដែរ”។

ឧត្ដម តំណាលថា តាមពិតរូបគេដឹងច្បាស់ថា មូលហេតុដែលនាងមិនចង់ឲ្យខ្ញុំជិះឌុបនាងកាត់តាមផ្លូវនោះ ដោយសារតែខ្លាចជិះទៅជួបសង្សារចាស់របស់នាងដោយចៃដន្យ។ នាងមិនប្រាប់ខ្លួនតាមត្រង់ទេ តែអាចស្មានដឹង ព្រោះនាងធ្លាប់ប្រាប់ថា ផ្ទះរបស់សង្សារចាស់នាងនៅផ្លូវនោះ។ ហេតុនេះហើយទើបនាងព្យាយាមប្រាប់ឲ្យជិះផ្លូវផ្សេង។

ស្ដាប់ទៅដូចជាគួរឲ្យចង់សើចយ៉ាងម៉េចទេ តែរឿងរ៉ាវទាំងអស់នោះ សុទ្ធតែបានកើតឡើងក្នុងស្រទាប់យុវវ័យមួយចំនួនពិតមែន៕

ចុះមិត្តយុវវ័យវិញ មានអ្នកណាធ្លាប់ជួបអញ្ចឹងដែរអត់ ប្រាប់ផងមើល៍!

ប្រភព: sabay

មុន បន្ទាប់

មតិយោបល់