ថាម៉េចពាក្យ “គីគីលូ” សាលាខ្លះហាមសិស្សមិនឲ្យប្រើ?

ថាម៉េចពាក្យ “គីគីលូ” សាលាខ្លះហាមសិស្សមិនឲ្យប្រើ?

ពាក្យ គីគីលូ ដែលយុវវ័យមួយចំនួននិយាយលេងសើច មានការលេចឮមកថា ត្រូវបានលោកគ្រូ-អ្នកគ្រូ នៅសាលាមួយចំនួន ក្នុងរាជធានីភ្នំពេញហាមប្រើ ខណៈពាក្យចចាមអារ៉ាមដូចគ្នានេះក៏ត្រូវបានការសែត ក្នុងស្រុករាយការណ៍ដូចគ្នាដែរ។ មូលហេតុនៃការហាមប្រើពាក្យខាងលើនេះទំនងដោយសាយុវជនមួយចំនួនប្រើ ក្នុងន័យអាសអាភាស ជះឥទ្ធិពលមិនល្អដល់សិស្សដទៃ។

តើមិត្ត យុវវ័យយល់យ៉ាងណាដែរ?

កញ្ញា សិស្សវិទ្យាល័យព្រះយុគន្ធរ បានទទួលស្គាល់ថា មានមិត្តភ័ក្ដិ ជាច្រើនបានយកពាក្យនេះ និយាយលេងសើច។ ប៉ុន្តែមិនធ្លាប់មានការហាមឃាត់ពីលោកគ្រូ-អ្នកគ្រូនោះទេ។ “ខ្ញុំគិតថា ប្រើពាក្យនេះ ដូចជាមិនទាស់ខុសអីផង គ្រាន់តែនិយាយលេងប៉ុណ្ណឹង”។

1-Kiki Lu

យុវជន កក្កដា សិស្សថ្នាក់ទី១១ វិទ្យាល័យបាក់ទូក បាននិយាយថា ខ្លួនធ្លាប់ប្រើ ពាក្យនេះលេងសើចជាមួយមិត្តភ័ក្ដិជាពិសេសនៅលើបណ្ដាញសង្គម Facebook។ តែមិនដឹងពីអត្ថន័យពាក្យនេះមានប្រភពមកពីណានោះទេ គ្រាន់តែធ្លាប់ឮតៗគ្នា ហើយលោកគ្រូ-អ្នកគ្រូក៏មិនដែលហាមឃាត់ នោះដែរ។

“ក្នុងន័យអ្វីក៏ដោយ ស្អប់បំផុតអ្នកប្រើពាក្យគីគីលូនេះជាមួយខ្ញុំ ព្រោះវាជាពាក្យអាសអាភាស”។ ទាំងនេះគឺជាការរៀបរាប់របស់ កញ្ញា សុខ ហៀង សិស្សថ្នាក់ទី ១២ វិទ្យាល័យព្រះស៊ីសុវត្ថិ។ បើ តាម កញ្ញា សុខ ហៀង ក៏មិនដឹងថា ពាក្យនេះមានប្រភពមកពីណានោះទេ។ គ្រាន់តែដឹងថាអ្នកណាដែលប្រើពាក្យនេះគឺ សំដៅលើពាក្យមិនសមរម្យ។ “ខ្ញុំគាំទ្រ ការហាមឃាត់ការប្រើពាក្យនេះ ព្រោះវាធ្វើឲ្យប៉ះពាល់ដល់អារម្មណ៍អ្នកដទៃ និងបង្ហាញពីអសីលធម៌”។

លោក ពៅ សុខ អាណាព្យាបាលសិស្សមួយរូបក៏មិនបានដឹងថា ពាក្យនេះមានប្រភពចេញពីណានោះទេ។ ប៉ុន្តែលោកគាំទ្រចំពោះការហាមឃាត់ការប្រើពាក្យនេះ នៅក្នុងសាលារៀន ប្រើសិនបើវាសំដៅដល់ការរួមភេទ។ យុវវ័យគួរពិចារណា មុនប្រើប្រាស់ពាក្យ ព្រោះជាភាសាគ្មានប្រភព និងអត្ថន័យច្បាស់លាស់។ “ខ្ញុំគិតថា ផ្នែកពាក់ព័ន្ធគួរស្រាវជ្រាវរកប្រភព និងអត្ថន័យពាក្យនេះឲ្យបានច្បាស់លាស់ កុំនិយាយតាមតែគេថា”។

ទោះយ៉ាងណា លោក រស់ គង់ សាស្ត្រាចារ្យបង្រៀននៅវិទ្យាល័យមួយ ក្នុងរាជធានីភ្នំពេញបានបដិសេធហាមកូនសិស្សមិនឲ្យប្រើពាក្យនេះ ដោយសារលោកមិនដែលឮសិស្សលោកនិយាយពាក្យនេះ តែបើនៅខាងក្រៅសាលា ឬនៅតាមកម្មវិធីកំប្លែងមួយចំនួនលោកធ្លាប់ឮគេប្រើពាក្យនេះ។

លោក គង់ បន្ថែមថា គេនិយាយតៗគ្នាថា ពាក្យនេះមានន័យរួមភេទ។ ប៉ុន្តែបើយោងតាមឯកសារមួយចំនួនគ្មានន័យដូច្នេះទេ តាមពិតគឺជាសំឡេងថ្នូរ ក្នុងរឿងស៊ិចរបស់ជប៉ុនថា គីគីលូ។ ដូច្នេះហើយទើបមានការសន្និដ្ឋានថា ពាក្យនេះជាភាសាជប៉ុន មានន័យថា រួមភេទ។

បើតាមលោក រស់ គង់ ការប្រើពាក្យនេះមិនទាស់ខុសអ្វីទេ។ សំខាន់ការប្រព្រឹត្តិរបស់យុវវ័យ ទោះប្រើពាក្យនេះឬមិនប្រើ អ្នកដែរប្រុងខូចគឺនៅតែខូច។ ការហាមឃាត់ប្រើពាក្យទាំងនេះភាគច្រើនកើតឡើង ក្នុងចំណោមអ្នកអភិរក្ស ដែលស្អប់ភាពជ្រួលជ្រើមរបស់យុវវ័យមួយចំនួន ដែលចូលចិត្តបង្កើតនូវពាក្យថ្មី ដែលមិនមែនជារបស់ខ្មែរ។

ទន្ទឹមគ្នាដែរ លោក យឹម ឆេងលាប អ្នកគ្រប់គ្រងវិទ្យុស្រ្តី FM ១០២ ដែលផ្ដល់នូវកម្មវិធីអប់រំជាច្រើនដល់យុវវ័យបានរៀបរាប់ដែរថា យើងមិនអាចថាត្រឹមត្រូវ ខុស អាក្រក់ឬល្អទេ ព្រោះមិនដឹងជាភាសាអ្វីឲ្យប្រាកដ។ តែបើវាជាភាសាជនជាតិណាមួយ ដែលបកប្រែជាភាសាខ្មែរមកមានន័យអាសអាភាសនោះ មិនគួរយកមកនិយាយលេងទេ ព្រោះអាចធ្វើឲ្យដៃគូសន្ទនាមិនសប្បាយចិត្ត។

បើតាមលោក ឆេង លាប យុវវ័យខ្មែរយើងមួយចំនួនឆាប់ទទួលយកអ្វីដែលថ្មី ហើយគិតថាកាលីប ល្អ ដោយមិនគិតពីផលប៉ះពាល់អ្វីទេ។ ដូចនេះការនិយាយលេងសើចយ៉ាងណា ត្រូវតែគិតពីអារម្មណ៍អ្នកដទៃ រក្សាភាពថ្លៃថ្នូរ មិនធ្វើឲ្យប៉ះពាល់កិត្តិយស និងសិទ្ធិបុគ្គល។ ការចេះនិយាយលេងសើចជាមួយមិត្តភ័ក្ដិ ជាជំនាញប្រាស្រ័យទាក់ទងល្អមួយរបស់មនុស្ស ធ្វើឲ្យជីវិតកាន់តែមានសោ ភណ្ឌ។ តែបើលេងសើច បង្អាប់គ្នារហូតធ្វើឲ្យភាគីម្ខាងអន់ចិត្តឬខឹង រហូតឈ្លោះគ្នានោះគួរតែចៀសវាងដាច់ខាត។ យុវវ័យចេះនិយាយលេងសើចគឺជាទេពកោសល្យមួយ តែបើនិយាយសើចសប្បាយតែឯង ហើយធ្វើឲ្យអ្នកផ្សេងឈឺចាប់ វាមិនមែនជាការល្អទេ។

យោងតាមការចេញផ្សាយពីការសែត ក្នុងស្រុកមួយ ដោយដកស្រង់សម្ដីពីសិស្ស បានរាយការណ៍មកថា លោកគ្រូ-អ្នកគ្រូប្រចាំថ្នាក់រៀនបានណែនាំដល់សិស្សរបស់ខ្លួនមិនឲ្យប្រើពាក្យ គីគីលូ នៅក្នុងសាលារៀន ជាពិសេស ក្នុងម៉ោងរៀននោះទេ។ បើសិស្សណាចចេសរឹងរួសនឹងត្រូវបណ្ដេញចេញ លុះត្រាតែឪពុកម្ដាយមកសុំការអនុញ្ញាតពីគ្រូប្រចាំថ្នាក់ ឬនាយកសាលា៕

from : sabay

មុន បន្ទាប់

មតិយោបល់