«ទឹកមិនទាន់ស្ងប់រលក» ក្រោយឃុំខ្លួនលោក សុខ ប៊ុន តាមប្រមាញ់ អង្គរក្ស 2 នាក់ទៀត

«ទឹកមិនទាន់ស្ងប់រលក» ក្រោយឃុំខ្លួនលោក សុខ ប៊ុន តាមប្រមាញ់ អង្គរក្ស 2 នាក់ទៀត

រាជធានីភ្នំពេញ ៖ សំណុំរឿងព្រហ្មទណ្ឌអតីតឧកញ៉ា សុខ ប៊ុន បានឈានទៅដល់ការឃុំខ្លួនដាក់ពន្ធនាគារព្រៃសជាបណ្តោះអាសន្នហើយ ប៉ុន្តែទោះជាយ៉ាងណា ទឹកមិនទាន់ស្ងប់នៅឡើយទេ ពោលគឺនគរបាលនាយកដ្ឋានព្រហ្មទណ្ឌក្រសួងមហាផ្ទៃ នៅបន្តតាមចាប់ខ្លួនអង្គរក្សលោក សុខ ប៊ុន ២នាក់ទៀតដែលជាប់ពាក់ព័ន្ធពីបទរួមគំនិតប្រើអំពើហិង្សាលើកញ្ញា ឯក សុជាតា ហៅសាសា ។

ប្រភពព័ត៌មានឱ្យដឹងថា អង្គរក្សលោក សុខ ប៊ុន ត្រូវបាននគរបាលស្គាល់អត្តសញ្ញាណអស់ហើយ និងកំពុងតាមប្រមាញ់ចាប់ខ្លួន តែពួកគេព្យាយាមគេចខ្លួនអស់ ។ ទោះជាយ៉ាងនេះក្តី ក៏មិនអាចគេចខ្លួនបានរហូតដែរ យូរនិងឆាប់ គង់ជាប់អន្ទាក់របស់សមត្ថកិច្ច ។

លោកឧកញ៉ា អ៊ុត ធី ដែលជាឪពុកកញ្ញា សាសា នឹងចូលខ្លួនទៅកាន់សាលាដំបូងរាជធានីភ្នំពេញនៅព្រឹកនេះ ដើម្បីបំភ្លឺលើពាក្យបណ្តឹង និងសំណងរដ្ឋប្បវេណី ។ លោក ពុធ ធាវី មេធាវីការពារក្តីឱ្យលោកឧកញ៉ា អ៊ុត ធី ឪពុកកញ្ញា ឯក សុជាតា ហៅសាសា បានប្រាប់អ្នកឆ្លើយឆ្លងព័ត៌មានកោះសន្តិភាព កាលពីថ្ងៃទី២១ កក្កដា ថា កូនក្តីរបស់លោក គឺឧកញ៉ា អ៊ុត ធី ដែលជាអាណាព្យាបាលរបស់កញ្ញាសាសា នឹងចូលបំភ្លឺតំណាងអយ្យការអមសាលាដំបូងរាជធានីភ្នំពេញ នៅវេលាម៉ោង៩ព្រឹកថ្ងៃទី២២ កក្កដា ។

លោកមេធាវី ពុធ ធាវី បន្តថា នៅថ្ងៃនោះដែរ រូបលោកក៏ត្រូវជូនដំណើរកូនក្តីទៅឆ្លើយបំភ្លឺនៅសាលាដំបូងដែរ ។ លោកថា ការឆ្លើយបំភ្លឺនោះពាក់ព័ន្ធ២ចំណុចគឺ អង្គហេតុនៃអំពើហិង្សារបស់លោក សុខ ប៊ុន ព្រមទាំងអង្គរក្សបានវាយដំ ទាត់ធាក់មកលើកូនស្រីគាត់។ ចំណែកសំណងរដ្ឋប្បវេណី ត្រូវពិភាក្សា និងរាយការណ៍ជូនតំណាងអយ្យការ ត្រូវទាមទារប៉ុនណាឱ្យសមហេតុសមផល និងតម្លៃនៃការព្យាបាលជំងឺជនរងគ្រោះដែលកំពុងសម្រាកព្យាបាលនៅប្រទេសថៃ មិនទាន់ជាសះស្បើយផង ។

ចំពោះសំណងរដ្ឋប្បវេណីដើមបណ្តឹងមិនទាន់កំណត់ថា ត្រូវទាមទារបុ៉នណានៅឡើយទេ ព្រោះរង់ចាំការឆ្លើយបំភ្លឺពីអង្គហេតុ បញ្ជាក់ជូនតំណាងអយ្យការរួចរាល់សិន ៕