រឿងល្បែងស៊ីសង«អ្នកមានជំពាក់ប្រាក់ អ្នកក្រ» ជេរប្រមាថគ្នាបែកផ្សែង ផ្អើលពេញផ្សារ ណាត់ទាំងព្រឹក

រឿងល្បែងស៊ីសង«អ្នកមានជំពាក់ប្រាក់ អ្នកក្រ» ជេរប្រមាថគ្នាបែកផ្សែង ផ្អើលពេញផ្សារ ណាត់ទាំងព្រឹក

ខេត្តបាត់ដំបង ៖ មានការភ្ញាក់ផ្អើលទាំងព្រឹកបន្ទាប់ពីឃើញ មនុស្ស២នាក់ ដែលគេស្គាល់ថា ជាម្ដាយ និងកូនប្រុស បានជិះរថយន្ត ស៊េរីទំនើប ១គ្រឿងទៅឈប់ ក្នុងចំណោមទីប្រជុំជន រួចចុះទៅស្រែក ជំទាលជេរ ប្រមាថយ៉ាងចាស់ដៃទៅលើស្ត្រីម្នាក់ ដែលកំពុងអង្គុយ លក់ត្រីលើចិញ្ចើមផ្លូវក្បែរ ផ្សារណាត់ ក្នុងក្រុងបាត់ដំបង កាលពីវេលាម៉ោង១០ និង៣០នាទីព្រឹក ថ្ងៃទី២១ កក្កដា ២០១៥ ដែលមានការ ខ្សិបខ្សៀវតៗគ្នាថា ផ្ដើមចេញ ពីរឿង «អ្នកមានជំពាក់ប្រាក់ អ្នកក្រ» ដោយសាររឿងល្បែង ស៊ីសងហើយ មិនព្រមសង ។

ប្រភពពីសមត្ថកិច្ចថា ករណីជេរប្រមាថនេះបង្កឡើងដោយ ស្ត្រីឈ្មោះ ម៉ៅ មុំ អាយុ៥៤ឆ្នាំ និងកូនប្រុសម្នាក់ឈ្មោះ វ៉ង គឹមហាប់ អាយុ២៨ឆ្នាំ រស់នៅភូមិកាប់គោថ្មី សង្កាត់អូរចា ក្រុងបាត់ដំបង ជិះរថយន្តម៉ាក Rang Rover ពណ៌ខ្មៅ ពាក់ស្លាកលេខ ភ្នំពេញ 2AI-9989 ។ រីឯស្ត្រីដែលរងការ ជេរប្រមាថនោះឈ្មោះ ភី ផូ អាយុ៤៥ឆ្នាំ មានមុខរបរលក់ត្រីនៅផ្សារណាត់ និងរស់នៅក្នុង ភូមិ-សង្កាត់ជាមួយ ស្ត្រីខាងលើដែរ ។

សមត្ថកិច្ចបានបញ្ជាក់ថា ការជេរប្រមាថនៅក្នុងចំណោមហ្វូងមនុស្ស ផ្អើលពេញផ្សារនេះ គឺផ្ដើមចេញ ពីភាគីអ្នកមានជិះរថយន្ត ទំនើបជំពាក់ប្រាក់ ស្ត្រីអ្នកលក់ត្រី ចំនួន២៥០០ ដុល្លារក្នុងរឿង ល្បែងស៊ីសង ។ សំណុំរឿងនេះ បានប្ដឹងផ្ដល់គ្នា និងដោះស្រាយ បញ្ចប់នៅស្នងការដ្ឋាន នគរបាលខេត្ត រួចហើយ តែមិនដឹងយ៉ាងម៉េច បានជាភាគីឈ្មោះ ម៉ៅ មុំ ដែលជាអ្នកជំពាក់ ប្រាក់គេ នាំកូនប្រុសជិះ រថយន្តមកតាមជេរ ប្រមាថអ្នកលក់ ត្រីដល់ផ្សារទៀត បង្កឲ្យមានការភ្ញាក់ផ្អើល និងកកស្ទះចរាចរណ៍ ពេញផ្លូវតែម្ដង ។

សូមបញ្ជាក់ថា បើតាមការបំភ្លឺពីមន្ត្រីការិយាល័យព្រហ្មទណ្ឌ កម្រិតស្រាល នៃស្នងការដ្ឋាន នគរបាលខេត្តបានឲ្យដឹងថា ស្ត្រីឈ្មោះ ម៉ៅ មុំ និងស្ត្រីឈ្មោះ ភី ផូ លក់ត្រីនេះជាមនុស្សស្គាល់ គ្នាជិតស្និត ហើយញៀនល្បែង ស៊ីសងដូចគ្នា ។ ប៉ុន្តែការចូលដៃគ្នា ប្រព្រឹត្តល្បែងនេះស្ត្រីឈ្មោះ មុំ មិនបានចេញមុខទេ ព្រោះខ្លាចប្ដី និងកូនដឹង ។ ស្ត្រីឈ្មោះ មុំ តែងតែចំណាយលុយ លេងល្បែងតាមរយៈ ស្ត្រីឈ្មោះ ភី ផូ ហើយពេល ចាក់ ឬភ្នាល់ ឈ្នះម្ដងៗ ស្ត្រីឈ្មោះ មុំ នេះបានទៅបើក ប្រាក់ភ្លាមៗពីឈ្មោះ ផូ ដោយមិនទុកយូរឡើយ ។ លុះក្រោយមក ស្រាប់តែឈ្មោះ ម៉ៅ មុំ នេះលេងចាញ់អស់ ប្រាក់២៥០០ដុល្លារ បែរជាប្រើ ល្បិចមិនព្រមសងលុយ ក៏ផ្ទុះជម្លោះ បែកផ្សែងលេច ឮដល់ក្រុមគ្រួសារ រហូតប្ដឹងផ្ដល់គ្នាទៅ សមត្ថកិច្ចទៀតផង ។ ប៉ុន្តែបែរជាកូន ប្រុសរបស់ឈ្មោះ ម៉ៅ មុំ ដែលជំពាក់ប្រាក់គេ ជាអ្នកប្ដឹង ស្ត្រីលក់ត្រីទៅវិញពីបទ «នាំម្ដាយ គេទៅលេងល្បែង» ។

ជុំវិញករណីនេះអ្នកលក់ឈ្មោះ ភី ផូ បានបញ្ជាក់ថា ឈ្មោះ ម៉ៅ មុំ ពិតជា ជំពាក់ប្រាក់ មេល្បែងមែន ដោយសារលេងចាញ់ តែបែរជាកូន ប្រុសស្ត្រីឈ្មោះ មុំ នេះប្ដឹងចោទប្រកាន់ អ្នកស្រីថា បាននាំម្ដាយគេ លេងល្បែងរហូតជំពាក់ប្រាក់គេ បែបនេះ ? អ្នកស្រីនិយាយថា នៅព្រឹកថ្ងៃទី២០ កក្កដា សមត្ថកិច្ចបានកោះ ហៅអ្នកស្រី និងឈ្មោះ ម៉ៅ មុំ ទៅសម្រប សម្រូលគ្នា ប៉ុន្តែអ្នកស្រីបញ្ជាក់ថា ការសម្រូលនៅ ចំពោះមុខសមត្ថកិច្ចនោះ គឺឈ្មោះ ម៉ៅ មុំ បានព្រមទទួល កំហុស ថែមទាំងសុំសង ប្រាក់៣០០ដុល្លារសិន ហើយអ្នកស្រីក៏មិន ជំទាស់ដែរ ដើម្បីបញ្ចប់រឿង ។

អ្នកស្រី ភី ផូ បានប្រាប់ថា ក្រោយពីព្រមព្រៀងគ្នា សមត្ថកិច្ចបាន ធ្វើកិច្ច សន្យាឲ្យភាគី ទាំងពីរផ្ដិតមេដៃ ដែលមានលក្ខខណ្ឌ៣ចំណុច ត្រូវអនុវត្ត គឺទី១-មិនត្រូវដើរ បរិហារកេរ្តិ៍គ្នា ទី២-ភាគីទាំង២ មិនត្រូវបង្កឲ្យ មានរឿងជាលើកទី២ និងទី៣-មិនត្រូវប្រើ គំនិតទុច្ចរិត ឬរូបភាពផ្សេងៗ ដែលនាំឲ្យប៉ះពាល់ ដល់ភាគីណាមួយ ។ ប៉ុន្តែទើប បញ្ចប់រឿងបាន១ថ្ងៃ ស្រាប់តែព្រឹក ឡើងស្ត្រីឈ្មោះ ម៉ៅ មុំ និងកូនប្រុសជិះ ឡានមកជេរ ប្រមាថកប់ៗមាត់ ធ្វើឲ្យអ្នក ស្រីខ្មាស់គេទាំងព្រឹក តែម្ដង ។

សកម្មភាពជេរប្រមាថយ៉ាងចាស់ដៃពីសំណាក់ស្ត្រីឈ្មោះ ម៉ៅ មុំ និងកូនប្រុស ទៅលើស្ត្រី លក់ត្រីឈ្មោះ ភី ផូ កណ្ដាលទី ប្រជុំជននោះ គេឃើញមនុស្ស ជាច្រើនបាន ចោមរោមមើល បង្កឲ្យមានការកក ស្ទះចរាចរណ៍ អំពល់ទុក្ខដល់សមត្ថកិច្ច សណ្ដាប់ធ្លាប់ ប្រឹងផ្លុំកញ្ចែរបំបែក ហ្វូងមនុស្សស្ទើរ អស់ខ្យល់ ។ រីឯក្រុមអ្នក កាសែតក៏សកម្មណាស់ដែរ ក្នុងការតាមប្រមាញ់ សកម្មភាពជេរ ប្រមាថក្នុងរឿង «អ្នកមានជំពាក់ ប្រាក់អ្នកក្រ» ដោយសារ តែល្បែងស៊ីសងជំពាក់ ប្រាក់មិនសងនេះ ។ ការផ្ដិតរូបភាពនៅ កន្លែងកើតហេតុ មិនគ្រប់គ្រាន់ ក្រុមអ្នកកាសែត មួយចំនួនបានតាមប្រមាញ់ រូបភាពស្ត្រីបង្កហេតុនេះ ដល់ផ្ទះទៀត រហូតមានការ តឹងសរសៃ.កដាក់គ្នាមួយ ប្រាវរវាងអ្នកកាសែត និងគ្រួសារ ស្ត្រីឈ្មោះ ម៉ៅ មុំ ដោយចោទ អ្នកកាសែតថា បានគំរាមពួកគេ លុះសមត្ថកិច្ច មកអន្តរាគមន៍ទើបស្ថានការស្ងប់ ស្ងាត់វិញ ក្រោមការចោម រោមពីមហាជន ។

ជាមួយនឹងសកម្មភាពជម្លោះបែកផ្សែងរវាងភាគីជម្លោះខាងលើ បន្ទាប់ពីជេ ប្រមាថកប់ៗ មាត់ទៅលើស្ត្រីលក់ត្រី គេឮភាគីស្ត្រីឈ្មោះ ម៉ៅ មុំ បានស្រែកផ្ដាំ ផ្ញើជាចុងក្រោយថា «អញនឹងមក ជេរឯងដល់ កន្លែងលក់ទៀត នៅថ្ងៃស្អែក»។ ប៉ុន្តែស្ត្រីលក់ត្រីនោះ បាននិយាយថា គាត់នឹងទៅប្ដឹង សមត្ថកិច្ចឲ្យជួយ អន្តរាគមន៍ក្នុងរឿង នេះជាថ្មី ព្រោះឈ្មោះ ម៉ៅ មុំ នេះមិនបាន គោរពលក្ខខណ្ឌក្នុង កិច្ចសន្យា ដែលរៀបចំឡើង ដោយសមត្ថកិច្ចនោះទេ ៕