អាហ្វ្រិចខាងត្បូង៖ មនុស្សប្រមាណជា ៣០០នាក់ បានរងរបួស នៅក្នុងហេតុការណ៏ បុកគ្នា ដ៏គួរឲ្យរន្ធត់មួយ រវាងរថភ្លើង ២គ្រឿង នៅក្បែរទីក្រុង Johannesburg ក្នុងប្រទេសអាហ្វ្រិច ខាងត្បូង។

យោងតាមប្រភពព័ត៌មាន BBC បានឲ្យដឹងថា ហេតុការណ៏ រថភ្លើងបុកគ្នា ដ៏គួរឲ្យរន្ធត់នេះ បានកើតឡើង នៅក្បែរ ស្ថានីយ៏រថភ្លើង Booysens ស្ថិតនៅ ភាគខាងត្បូង ទីក្រុង Johannesburg នៅវេលាម៉ោង ប្រមាណជា ៦ និង ៣០នាទី (ម៉ោងក្នុងតំបន់) ថ្ងៃសុក្រ ទី១៧ ខែកក្កដា ឆ្នាំ២០១៥ ម្សិលមិញនេះ។

អ្នកនាំពាក្យ របស់ក្រុមសង្គ្រោះបន្ទាន់ បានប្រាប់ សារព័ត៌មាន BBC ឲ្យដឹងថា អ្នករងរបួស មួយចំនួន ស្ថិតក្នុង សភាពធ្ងន់ធ្ងរ ប៉ុន្តែមិនបណ្តាលឲ្យ គ្រោះថ្នាក់ ដល់ជីវិតឡើយ។

ទោះបីជាយ៉ាងណា វានៅមិនទាន់ច្បាស់ នៅឡើយទេ ចំពោះមូលហេតុ ដែលបណ្តាលឲ្យ រថភ្លើងទាំង ២គ្រឿងនោះ បុកគ្នា។ ប៉ុន្តែអ្នកនាំពាក្យ បាននិយាយថា “មូលហេតុ នៃគ្រោះថ្នាក់នេះ កំពុងស្ថិតក្រោម ការស៊ើបអង្កេតនៅឡើយ ប៉ុន្តែយើងបានដឹងថា រថភ្លើងមួយគ្រឿង បានភ្លាត់ចេញ ពីផ្លូវដែក”។

អ្នកនាំពាក្យដដែល ក៏បាននិយាយថា អ្នករងរបួសភាគច្រើន ត្រូវបានបញ្ជូន ទៅមន្ទីរពេទ្យ ដើម្បីទទួលបាន ការព្យាបាល រីឯអ្នកមួយចំនួនទៀត ត្រូវក្រុមសង្គ្រោះបន្ទាន់ ព្យាបាលនៅកន្លែង កើតហេតុ តែម្តង៕

សូមទស្សនាវីដេអូខាងក្រោម៖

ប្រភព ៖ BBC

ប្រែសម្រួលដោយ ៖ ប៊ី

ខ្មែរឡូត