ខាត់ សុឃីម ចំណាយលុយជិត១០ម៉ឺនដុល្លារទិញដីនៅសៀមរាប គ្រោងបើកជំនួញថ្មី

ខាត់ សុឃីម ចំណាយលុយជិត១០ម៉ឺនដុល្លារទិញដីនៅសៀមរាប គ្រោងបើកជំនួញថ្មី

រាជធានីភ្នំពេញ ៖ ពិតជាមិនទាន់ស្កប់ស្កល់លើមុខជំនួញមែន ដែលតារាចម្រៀងយ៉េរៗខាត់ សុឃីម មានមុខរបរពេញដៃពេញផ្នែក ទាក់ទិននឹងសិល្បៈ ស្ទើរតែវិលមុខមើលមិនឈ្នះផងនោះ ស្រាប់តែស្ងាត់ៗនាងបានបោះទុននូវទឹកប្រាក់ច្រើនម៉ឺនដុល្លារ ដើម្បីទិញដីមួយកន្លែងនៅកណ្តាលក្រុងសៀមរាប និងគ្រោងបង្កើតរបរថ្មីនៅទីនោះថែមទៀត ។

បងប្អូនទាំងក្រៅ និងក្នុងសិល្បៈសុទ្ធតែដឹងថា តារាចម្រៀងខាត់ សុឃីម មានមុខរបរច្រើនមុខទាក់ទិននឹងសិល្បៈដែលនាងបានបង្កើតចេញជារូបរាងបន្តបន្ទាប់គ្នា ដូចជា សំអាងការ ហាងថែរក្សាសម្ផស្ស ការបង្កើតក្រុមភ្លេងសម័យ និងបុរាណ ព្រមទាំងហាងថតរូបមួយ កាលពីពេលថ្មីៗដែលនាងទុកដាក់ឱ្យស្វាមីវ័យក្មេងមើលខុសត្រូវ ទើបមហាជនដែលមើលឃើញពីលទ្ធផលដែលខាត់ សុឃីម ធ្វើបានលើមុខជំនួញនេះ យល់ថា នាងពិតជាប៉ិនប្រសប់ក្នុងការកាន់កាប់មុខជំនួញ និងពូកែមើលទីផ្សារមែន បើមិនគិតឱ្យបានច្បាស់នោះទេ ច្បាស់ជាជួបបញ្ហារអាក់រអួលជាមិនខាន ។ អីុចឹងហើយទើបខាត់ សុឃីម ស្រាប់តែក្លាយជាអ្នកជំនួញល្បីឈ្មោះជោគជ័យលើមុខរបរជាមួយតារាជើងខ្លាំងខាងរកស៊ីមួយចំនួនទៀត ដូចជាអ្នកនាងយុគ ចិន្តា និងគង់ សុជាតិ ដែលជាពិធីការិនីល្បីឈ្មោះគ្រប់ជំនាន់២រូបនេះ ក៏ប្រសប់ក្នុងការរកស៊ីម្យ៉ាងៗម្នាក់ដែរ ។

តាមប្រភពពីអ្នកសិល្បៈបានលើកឡើងថា តារាចម្រៀងក្រម៉ិចក្រមើម ខាត់ សុឃីម បានទិញដីមួយកន្លែងនៅខេត្តសៀមរាប ជាទីប្រជុំជនមួយទំហំធំគ្រាន់បើក្នុងតម្លៃជិត១០ម៉ឺនដុល្លារ ដោយនាងបានទិញដីនៅទីនោះទុកចោលយូរមកហើយ និងពេលនេះនាងស្រាប់តែគិតថា ចង់រកស៊ីក្នុងជំនួញថ្មីមួយទៀតនៅខេត្តសៀមរាប ។ មូលហេតុដែលសុឃីម ចង់បង្កើតមុខរបរថ្មី ដោយសារតែនាងស្រាប់តែមើលឃើញពីឱកាសថ្មីៗនៃតំបន់សៀមរាប មានការទាក់ទាញទៅៗ មានភ្ញៀវទៅកម្សាន្តច្រើនពីមួយឆ្នាំទៅមួយឆ្នាំ ទើបនាងគិតចង់រកស៊ីនៅទីនោះ ខណៈដែលនាងមានទីតាំងផ្ទាល់ខ្លួនស្រាប់ទៅហើយនោះ ។