មួយថ្ងៃ នគរបាលស្រុកកំពង់ត្រឡាច ឃាត់ខ្លួន ជនសង្ស័យ៦នាក់ ពីបទចែកចាយ និងប្រើប្រាស់ ថ្នាំញៀន

មួយថ្ងៃ នគរបាលស្រុកកំពង់ត្រឡាច ឃាត់ខ្លួន ជនសង្ស័យ៦នាក់ ពីបទចែកចាយ និងប្រើប្រាស់ ថ្នាំញៀន

ខេត្តកំពង់ឆ្នាំង ៖ ជនសង្ស័យចែកចាយ និងប្រើប្រាស់គ្រឿងញៀន ចំនួន៦នាក់ត្រូវបាន សមត្ថកិច្ចនគរបាលស្រុកកំពង់ត្រឡាចធ្វើការ ចាប់ឃាត់ខ្លួនជាបន្តបន្ទាប់ នៅព្រឹកថ្ងៃទី១៦ កក្កដា ២០១៥ នៅទីកន្លែងផ្សេងៗគ្នា ក្នុងស្រុកកំពង់ត្រឡាច ខណៈជនសង្ស័យ ទាំងនោះកំពុងចែកចាយ និងប្រើប្រាស់ថ្នាំញៀន ។

លោក ហ៊ុល វាសនា អធិការនគរបាល ស្រុកកំពង់ត្រឡាចបានឱ្យដឹងថា នៅវេលាម៉ោង១១ និង១០នាទីព្រឹក សមត្ថកិច្ចបានឃាត់ខ្លួន ជនសង្ស័យចំនួន៤នាក់ កំពុងប្រើប្រាស់គ្រឿងញៀន នៅចំណុចក្រោយ វិទ្យាល័យ ហ៊ុន សែន កំពង់ត្រឡាច ស្ថិតក្នុងភូមិសាលាលេខ៥ ឃុំអូរឫស្សី ស្រុកកំពង់ត្រឡាច ដោយដកហូត បានវត្ថុតាងសម្ភារ និងថ្នាំញៀនមួយកូនថង់តូច ។ ជនសង្ស័យទាំង៤នាក់មាន ១-ឈ្មោះ លី ណារ៉ូ អាយុ១៤ឆ្នាំ ២-ឈ្មោះ សួស សុវនាថ អាយុ១៦ឆ្នាំ ៣-ឈ្មោះ អឿន ប៊ុនធឿន អាយុ១៤ឆ្នាំ និង៤-ឈ្មោះ វ៉ា ភារុន អាយុ១៥ឆ្នាំ ទាំង៤នាក់មានទីលំនៅស្រុកកំពង់ត្រឡាច ។

លោកបានបន្តថា បន្ទាប់មកនៅវេលាម៉ោង២ និង៣០នាទីរសៀលថ្ងៃដដែល សមត្ថកិច្ចរបស់លោក បានចាប់ឃាត់ខ្លួនជនសង្ស័យចំនួន២នាក់ ទៀតនៅចំណុចមុខ រោងចក្រខេនស្បត ស្ថិតក្នុងភូមិចំការស្វាយ ឃុំសេដ្ឋី ស្រុកកំពង់ត្រឡាច ដែលជាអ្នកចែកចាយថ្នាំញៀន ក្នុងនោះម្នាក់ឈ្មោះ ណម ធីម អាយ២៣ឆ្នាំ មានទីលំនៅ ភូមិបឹងឈូក ឃុំសេដ្ឋី ស្រុកកំពង់ត្រឡាច និងម្នាក់ទៀតឈ្មោះ ហួរ សាយ័ន្ត អាយុ២៧ឆ្នាំ មានទីលំនៅភូមិអំពិលទឹក ឃុំវិហារហ្លួង ស្រុកពញ្ញាឮ ខេត្តកណ្តាល ។

ពេលចាប់ខ្លួនជនសង្ស័យខាងលើនេះ សមត្ថកិច្ចដកហូតបានថ្នាំញៀន ប្រភេទម៉ាទឹកកក ចំនួន១៣កញ្ចប់ ម៉ូតូ២គ្រឿង ទូរស័ព្ទដៃ៤គ្រឿង និងឧបករណ៍ប្រើប្រាស់ ថ្នាំញៀនមួយចំនួនទៀត ។ ជនសង្ស័យទាំង៦នាក់ត្រូវបានសមត្ថកិច្ចស្រុកកំពង់ត្រឡាច កសាងសំណុំរឿងបញ្ជូនមក ស្នងការនគរបាលខេត្ត ដើម្បីបន្តបញ្ជូន ទៅតុលាការចាត់ការតាមនិតិវិធីច្បាប់ ៕