ចិន៖ តុលាការប្រទេសចិន បានបង្គាប់ ជនរងគ្រោះម្នាក់ ដែលទទួលរងនូវអំពើវាយប្លន់ទ្រព្យ ឲ្យបង់ប្រាក់សំណង ទៅកាន់ជន ដែលបានវាយប្រហារមកលើខ្លួនទៅវិញ។ នេះបើតាម សេចក្តីរាយការណ៍ ពីប្រភពព័ត៌មាន AFP កាលពីម្សិលមិញ។

បុរសនាមត្រកូល Yuan ត្រូវបានតុលាការបង្គាប់ ឲ្យបង់ប្រាក់សំណងចំនួន ៧០ម៉ឺនយ័ន (ប្រមាណ ជាង១ម៉ឺនដុល្លារអាមេរិក) ព្រោះតែបុរសរងគ្រោះ តបត ដោយវ៉ៃសំពងទៅលើចោរម្នាក់​ឡើងទ្រមខ្លួន ដែលជននេះ ប៉ុនប៉ងវាយប្លន់យកទ្រព្យរបស់គាត់។ ក្រៅពីត្រូវបង់ប្រាក់សំណង លោក Yuan ថែមទាំងត្រូវតុលាការ សំរេចព្យួរទោសសាកល្បង រយ:ពេល ៣ខែផងដែរ។

សេចក្តីរាយការណ៍បន្តឲ្យដឹងថា ចោរម្នាក់ត្រូវគេស្គាល់ឈ្មោះថា Zeng បានព្យាយាមវាយយកទូរសព្ទ ពីលោក Yuan ប៉ុន្តែត្រូវលោក Yuan តបតការពារខ្លួន និងដេញតាមទាន់ វាយឡើងទ្រមខ្លួនវិញ ដោយមានគ្នីគ្នារបស់គាត់ចំនួន ២នាក់ផ្សេងទៀត។ ក្រោយពីត្រូវគេវាយឡើងជាំពេញខ្លួនរួច ចោរឈ្មោះ Zeng បានរាយការណ៍ទៅប៉ូលីស អំពីហេតុការណ៍ដែលបានកើតឡើង ហើយនៅថ្ងៃបន្ទាប់ បុរសទាំងបីនាក់ រួមទាំងលោក Yuan បានចូលខ្លួនមកបំភ្លឺនៅស្ថានីយ៍ប៉ូលីស។ លោ Yuan និងគ្នីគ្នា២នាក់ទៀត ត្រូវគេដឹងថា មិនបានរាយការណ៍ដល់ប៉ូលីសនោះទេ ក្រោយពេលកើតហេតុ និងសូម្បីតែពេលចាប់បាន វាយជនល្មើសនោះទៅទៀត។

យ៉ាងណាមិញ ក្រោយពីតុលាការសំរេចទោសរួច ពួកគេបាននិយាយថា នឹងមិនធ្វើការប្តឹងឧទ្ទរណ៍ ឡើយ។ គួរបញ្ជាក់ដែរថា ប្រទេសចិន កំពុងតែពង្រឹងការអនុវត្តច្បាប់ ប៉ុន្តែប្រព័ន្ធតុលាការ ក៏ត្រូវតែដើរ ឲ្យបានទន្ទឹមនឹងគ្នាផងដែរ៕

រូបតំណាងឲ្យកំលាំងមានសមត្ថកិច្ចរបស់ចិន

ប្រភព៖ MSN

ដោយ សី

ខ្មែរឡូត