នាយកវិទ្យាល័យស្ទឹងសែន រងការចោទថា ពូកែជេរសិស្ស និងគ្រូ

នាយកវិទ្យាល័យស្ទឹងសែន រងការចោទថា ពូកែជេរសិស្ស និងគ្រូ

ខេត្តកំពង់ធំ ៖ នៅរសៀលថ្ងៃទី ១០ កក្កដា ២០១៥ លោកផៃ នន នាយកវិទ្យាល័យ ស្ទឹងសែន ខេត្តកំពង់ធំ ត្រូវបានប្រធានមន្ទីរអប់រំ យុវជន និងកីឡាខេត្តកំពង់ធំ គឺលោកជូ វុន្ធី កោះហៅ ឲ្យចូលខ្លួនបំភ្លឺនៅ ចំពោះមុខក្រុមប្រឹក្សាវិន័យ ខណៈដែល គេបានរកឃើញថា លោកនាយកសាលារូបនេះ បានប្រើអំពើហិង្សា ជេរបញ្ចោរម្រាយ ដៀលត្មិះ និងទាញដំបងប្រុងវាយ ទៅលើលោកគ្រូម្នាក់ កាលព្រឹកពីថ្ងៃទី០៧ កក្កដា ២០១៥ និងត្រូវបាន លោកគ្រូ អ្នកគ្រូ ចំនួន៨នាក់ សម្ដែងការ មិនពេញចិត្ត បន្ទាប់ពី លោកនាយកសាលាខាងលើ បានប្រើពាក្យសំដី ប្រមាថមើលងាយជេរ បញ្ចោរយ៉ាង អសីលធម៌ និងយ៉ាងអាម៉ាស់បំផុត ។

ជាងនេះទៅទៀត គេបានរកឃើញថា មានអាណាព្យាបាល និងឪពុកម្ដាយសិស្ស ក្នុងវិទ្យាល័យស្ទឹងសែន ជាច្រើននាក់មិនសប្បាយចិត្ត បានដាក់ពាក្យប្ដឹងទៅ សមត្ថកិច្ចដែនដីជាបន្តបន្ទាប់ ដោយចោទប្រកាន់ថា លោកនាយកសាលា ឈ្មោះផៃ នន បានបង្រៀនអប់រំកូនសិស្ស បែបប្រើជាអំពើហិង្សាវាយដំ រហូតបង្កឲ្យ មានរបួសស្នាម និងវាយសិស្សខ្ទប់ចានបបរ ជាដើម ។

ជុំវិញការកោះហៅលោកនាយកវិទ្យាល័យស្ទឹងសែន ឈ្មោះផៃ នន និងលោកគ្រូឈ្មោះជា ស៊ុមសុទ្ធា ដែលជាជនរងគ្រោះក្នុងអំពើជេរបញ្ចោរម្រាយ ប្រមាថមើលងាយដាក់ មេក្រូនៅចំពោះមុខសិស្ស រាប់រយនាក់នា រសៀលថ្ងៃនេះ គេនៅមិនទាន់ដឹងថា តើ លោក ជូ វុន្ធី ប្រធានមន្ទីរអប់រំ យុវជន និងកីឡា ខេត្តកំពង់ធំ ក៏ដូចជា ក្រុមប្រឹក្សាវិន័យនឹងចាត់វិធានការបែបណា នៅឡើយទេ ៕