ស្ពានជ្រោយចង្វារថ្មី គ្រោងសម្ពោធ ដាក់ឲ្យដំណើរការ នៅដើមខែតុលា ២០១៥

ស្ពានជ្រោយចង្វារថ្មី គ្រោងសម្ពោធ ដាក់ឲ្យដំណើរការ នៅដើមខែតុលា ២០១៥

រាជធានីភ្នំពេញ ៖ សាលារាជធានីភ្នំពេញបាន និងកំពុងជំរុញឲ្យមន្ត្រីជំនាញ ពន្លឿនការស្ថាបនាសួនរង្វង់មូលជ្រោយចង្វារទាំង នៅត្រើយខាងលិច និងខាងកើត ដើម្បីឲ្យទាន់ការដាក់សម្ពោធ ស្ពានជ្រោយចង្វារទីពីរនៅដើមខែតុលា ២០១៥ឆាប់ៗខាងមុខនេះ។

មន្ត្រីជំនាញ សាលារាជធានីភ្នំពេញបានឲ្យដឹងថា សួនច្បាររង្វង់មូលគល់ ស្ពានជ្រោយចង្វារ ត្រើយខាងលិចស្ថាបនាបាន៩៨%ហើយ គ្រោងបព្ចាប់នៅពាក់កណ្តាលខែកក្កដា ចំណែកឯរង្វង់មូល ជ្រោយចង្វារត្រើយខាងកើតទើបតែស្ថាបនា រួចបានត្រឹមតែ55% ហើយគ្រោងបញ្ចប់ នៅមុនខែតុលា ដើម្បីឈានទៅដល់ ធ្វើពិធីសម្ពោធដាក់ឱ្យដំណើរការតែម្តង ។

លោក សាំ ពិសិដ្ឋ នាយកមន្ទីរសារធារណៈការ និងដឹកជញ្ជូនរាជធានី ភ្នំពេញបានឱ្យដឹងថា ការស្ថាបនារង្វង់មូលសួនច្បារត្រើយ ខាងកើតនេះត្រូវប្រើរយៈពេលយូរ ក្នុងនោះមានស្ថាបនា រូបសំណាកព្រហ្មបាយ័ន ឬព្រហ្មមុខបួន ដែលមានកំពស់ ៩.១៨ម៉ែត្រ ទទឹង៥.៤០ម៉ែត្រ និងក្បាលនាគចំនួន៦ ហើយមកដល់ពេលនេះ ក្រុមអ្នកជំនាញកំពុងធ្វើសកម្មភាព ដាប់ថ្មភ្នំឆ្លាក់រូប និងការស្ទូចដំឡើង បន្តុបលើគ្នា រួមជាមួយនឹង ការត្រៀមលក្ខណៈ ការរចនាសួនច្បារ និងការដាំកូនផ្កា និងកូនឈើតូចៗឲ្យមានលក្ខណៈ ស្រស់ស្អាត។

ដោយឡែកសម្រាប់ សួនរង្វង់មូលត្រើយខាងលិចវិញ កម្មករជំនាញកំពុងដំឡើងបង្គោលភ្លើង បំភ្លឺការរៀបចំក្រាលថ្មម៉ាបទៀតផង។ លោកសាំ ពិសិដ្ឋ បានបញ្ជាក់ថា ការកែលម្អ និងការស្ថាបនាសួនច្បារ ទាំង២នេះ មានសារ សំខាន់ ដោយមិនត្រឹមតែជួយសម្រួល ការកកស្ទះចរារណ៍នៅចំណុច ប្រសព្វទាំង២នេះឲ្យកាន់តែ មានភាពងាយស្រួលក្នុងការធ្វើ ដំណើរប៉ុណ្ណោះទេ ថែមទាំងជួយលើក កម្ពស់សោភ័ណភាព និងបរិស្ថាន ក្នុងរាជធានីភ្នំពេញដើម្បីទាក់ទាញ ភ្ញៀវទេសចរផងដែរ ។

សួនច្បាររង្វង់មូលត្រើយខាងកើត គឺបង្ហាញពីប្រវត្តិសាស្ត្រខ្មែរ ដ៏ល្អផូរផង់តាមរយៈរូបសំណាកព្រះព្រហ្ម ដែលបានឆ្លាក់យ៉ាងល្អ ប្រណីតស្របទៅនឹង រចនាបថខ្មែរ។

គួររំលឹកថា តាមផែនការស្ពានជ្រោយចង្វារថ្មីនេះ គ្រោងសម្ពោធដាក់ឱ្យប្រើប្រាស់ ជាផ្លូវការនៅពាក់កណ្តាលខែកញ្ញា ២០១៥នេះ តែសួនច្បាររង្វង់មូលជ្រោយចង្វារ ទាំង២នេះស្ថាបនាមិនទាន់រួចរាល់ ដូច្នេះសាលារាជធានីភ្នំពេញស្នើសុំទៅ រាជរដ្ឋាភិបាលដើម្បីពន្យារពេល ដល់ខែតុលា២០១៥ខាងមុខ ដែលពិធីសម្ពោធ គ្រោងធ្វើឡើងក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌឹតប៊ុន រ៉ានី ហ៊ុន សែន ផងដែរ ៕