ភ្នំពេញ៖ លោក សុខ ពេញវុធ អភិបាលរង ខណ្ឌដូនពេញ បានមានប្រសាសន៍ថា ដើម្បីបោសសំអាត ឲ្យអស់នូវការបង្កភាព អនាធិបតេយ្យ នៅក្នុងមូលដ្ឋាន ខណ្ឌដូនពេញ នោះលោកបាន បើកយុទ្ធនាការ ជាបន្តបន្ទាប់ក្នុងការ ចុះធ្វើរដ្ឋបាលបោស សំអាតជនអនាថា ជនញៀនថ្នាំ ហិតកាវ ក៏ដូចជាចាប់ ប្រមូលស្រ្តី រកស៊ីផ្លូវភេទ ក្នុងរយៈ ពេល៤លើក មកនេះ ដែរអាជ្ញាធរខណ្ឌ ដូនពេញ ក្រោមការដឹកនាំ បញ្ជាផ្ទាល់ ដោយរូបលោក គឺបន្តចុះចាប់ ប្រមូលបានចំនួន ២២៧នាក់ មកហើយបញ្ជូន ទៅអប់រំ នៅមន្ទីរសង្គមកិច្ច។

លោក សុខ ពេញវុធ អភិបាលរងខណ្ឌដូនពេញ បានមានប្រសាសន៍ទៀតថា ដោយអនុវត្តន៍ តាមការបញ្ជាផ្ទាល់ ពីលោក គួច ចំរើន ប្រធានគណៈបញ្ជាការ ឯកភាពខណ្ឌដូនពេញ លើការពង្រឹង បញ្ហាសន្ដិសុខ ទប់ស្កាត់បទ ល្មើស និងសណ្ដាប់ធ្នាប់ សាធារណៈ ក្នុងមូលដ្ឋានរបស់ខ្លួននោះ កម្លាំងគណៈបញ្ជាការឯកភាព ខណ្ឌដូនពេញ ដែលដឹកនាំផ្ទាល់ ដោយរូបលោកផ្ទាល់ បានសហការ ជាមួយកម្លាំងចំរុះ សរុបចំនួន៦០នាក់ បានបើកយុទ្ធនាការចុះ ទៅឆែកឆេរនិង ធ្វើការត្រួតពិនិត្យ នៅតំបន់ស្មុគស្មាញ ហើយរកឃើញជនដែល ជាប់ពាក់ព័ន្ធនិងបញ្ហាគ្រឿងញៀន ហិតកាវ ជនអនាថានិង ស្រ្តីរកស៊ីផ្លូវភេទ ក្នុងយុទ្ធការចំនួន ០៤លើកនេះ គឺប្រមូលបានសរុបចំនួន២២៧នាក់ បញ្ជូនមកសាលា ខណ្ឌដូនពេញ។

លោក សុខ ពេញវុធ អភិបាលរងខណ្ឌដូនពេញ បានបញ្ជាក់ថា សម្រាប់យុទ្ធនាការ ចុះត្រួតពិនិត្យរដ្ឋបាល នៅតំបន់ស្មុគ ស្មាញក្នុងភូមិសាស្ដ្រ ខណ្ឌដូនពេញ និងធ្វើឡើងជាបន្ដបន្ទាប់ ដើម្បីចូលរួម កាត់បន្ថយបញ្ហា បទល្មើស បញ្ហាអសកម្មផ្សេងៗ ក៏ដូចជារក្សាសន្ដិសុខ សុវត្ថិភាពជូន ប្រជាពលរដ្ឋនៅ តាមមូលដ្ឋាន ទាំងនោះ ដើម្បីទទួល បាននូវគោល នយោបាយភូមិ សង្កាត់មានសុវត្ថិភាព៕

ផ្តល់សិទ្ធដោយ ដើមអម្ពិល