កំពត៖ ប្រភពព័ត៌មាន ពីកម្លាំងសមត្ថកិច្ច ការពារព្រំដែន បាននិយាយ ប្រាប់មជ្ឈមណ្ឌល ព័ត៌មានដើមអម្ពិល នៅព្រឹកថ្ងៃទី០១ ខែកក្កដា ឆ្នាំ២០១៥ ថានៅព្រឹក ថ្ងៃទី០១ ខែកក្កដា នេះមានប្រជាជន ខាងភាគីវៀតណាម ជាច្រើននាក់ មានះបំរុងចូល មកធ្វើការជួសជុល ផ្ទះអ្នកតាឡើងវិញ ក្រោយពីផ្ទះ អ្នកតាមួយនេះ មានការទ្រុឌទ្រោម និងធ្លុះធ្លាយដំបូល ប៉ុន្តែត្រូវបានអាជ្ញាធរ និងកម្លាំងសមត្ថកិច្ច ពាក់ព័ន្ធព្រំដែន ខាងភាគីកម្ពុជា ធ្វើការរារាំង និងឈានចូលទៅ ធ្វើការដោះស្រាយគ្នា ដោយសន្តិវិធីជាមួយ នឹងអាជ្ញាធរ ខាងវៀតណាម ជាលទ្ធផល ខាងភាគី វៀតណាម ក៏បានឯកភាព យល់ព្រមតាមសំណើរ ដោយមិនឲ្យប្រជាជន វៀតណាម ចូលមកបន្តការសាងសង់ផ្ទះ អ្នកតានេះតទៀត រង់ចាំលុះត្រាណា នៅក្នុងតំបន់នោះ កំណត់ព្រំដែនរួច រាល់ជាស្ថាពរសិន។

ប្រភពដដែល បន្តថា ផ្ទះអ្នកតា ដែលប្រជាជនវៀតណាម មកជួសជុលនេះ គឺមានតាំងពីជំនាន់ ដើមយូរលង់ ណាស់មកហើយ ដែលប្រជាពលរដ្ឋ ខ្មែរយើងមានជំនឿ តែងធ្វើការគោរព ទំនៀមទំលាប់ នៅផ្ទះអ្នកតា មួយនេះ។ ចាប់តាំងពីក្រោយ ឆ្នាំ១៩៧៩មក ប្រជាជនខ្មែរ យើងក៏តែងតែបន្ត គោរពបន្តទៀត ក្រោយមកក៏គេឃើញ មានប្រជាជនយួន អ្នកមានជំនឿ ក៏តែងតែចូលមកធ្វើការ គោរពជាមួយខ្មែរ យើងផងដែរ ។  រហូតមកដល់បច្ចុប្បន្ននេះ ខ្សែបន្ទាត់ព្រំដែនកម្ពុជា វៀតណាម ក្នុងចំណុចតំបន់ ផ្ទះអ្នកតាខាងលើ មិនទាន់បាន បោះបង្គោលកំណត់ព្រំដែន នៅឡើយទេ ហើយចំណុចផ្ទះអ្នកតានេះ គឺមានកិច្ចព្រមព្រៀង ស្តីពីព្រំដែន រវាង ខេត្តកំពត និងខេត្តគៀងយ៉ាង ប្រទេសវៀតណាម ផងដែរ ដោយឡែកក្នុង កិច្ចព្រមព្រៀង ក៏និយាយពីផ្ទះ អ្នកតានេះដែរ ដោយទុក ឲ្យនៅដដែល គ្មានភាគីណា មួយរំលោភ ឬក៏ជួសជុលឡើយ រង់ចាំពេល ណាកំណត់ ព្រំដែនច្បាស់ លាស់សិន។

ផ្ទះអ្នកតាខាងលើ ស្ថិតក្នុងចំណុច ក្បែរមាត់ព្រែក ព្រៃតាមែង ឬ (មាត់ព្រែកវិញតេ) ចម្ងាយ៥០ម៉ែត្រ ខាងមុខ ឈាងខាងកើត វរៈសេនាតូច នគរបាលការពារ ព្រំដែនគោក លេខ៦០១ ចំណុះឲ្យស្នងការដ្ឋាន នគរបាលខេត្ត កំពត ចម្ងាយប្រមាណ ៣០០ម៉ែត្រ នៃភូមិព្រែកក្រឺស ឃុំព្រែកក្រឺស ស្រុកកំពង់ត្រាច ខេត្តកំពត។

ប្រភពដដែល ឲ្យដឹងទៀតថា៖ កាលពីវេលាព្រឹក ថ្ងៃទី៣០ ខែមិថុនា ឆ្នាំ២០១៥ ម្សិលវិញ មានកម្លាំង នគរបាលការពារព្រំដែន គោកលេខ៦០១ បានចេញទៅរារាំង និងឃាត់មិនឲ្យជនជាតិ វៀតណាម ចំនួន០៣នាក់ ធ្វើការជួសជុល ផ្ទះអ្នកតា ខាងលើនេះឡើយ ក្រោយពីជនជាតិវៀតណាម ទាំង៣នាក់នេះ បាននិងកំពុង តែធ្វើសកម្មភាពជួសជុលនោះ៕

ផ្តល់សិទ្ធដោយ ដើមអម្ពិល