ភ្នំពេញ ៖ ជនសង្ស័យ ចំនួន៤នាក់ បានធ្វើសកម្មភាព ភ្ជង់ទៅលើនារី២នាក់ ហើយប្លន់យកម៉ូតូ មួយគ្រឿងម៉ាក MSX កាលពីវេលាម៉ោង ២៖១០នាទី រំលងអាធ្រាត្រ ចូលថ្ងៃទី៣០ ខែមិថុនា ឆ្នាំ២០១៥ ស្ថិតនៅ តាមផ្លូវ ព្រះនរោត្តម ជិតភូមិគ្រឹះ ថៅកែស្រាបៀរ Tiger ក្នុងសង្កាត់ទន្លេបាសាក់ ខណ្ឌចំការមន ។

ជនរងគ្រោះ ក្នុងអំពើប្លន់ប្រដាប់អាវុធខាងលើនេះ បាននិយាយថា មុនពេលកើតហេតុ ខ្លួនមិនមិត្តភក្តិម្នាក់ទៀត បាននាំគ្នាចេញ មកពីហូបអី នៅម្តុំគីរីរម្យ ហើយត្រឡប់ទៅផ្ទះវិញ លុះមកដល់ ចំណុចកើតហេតុ ក៏លេចមុខ ជនសង្ស័យ ជាក្រុមចោរ ប្លន់ចំនួន៤នាក់ ជិះម៉ូតូចំនួន២គ្រឿង មួយគ្រឿងម៉ាក Dukពណ៌ស លាយខ្មៅ ពាក់ស្លាកលេខ 1CU-8847 និងមួយគ្រឿងម៉ាក ស៊ុយស៊ូគីឡេត មកធ្វើសកម្មភាពភ្ជង់ពួកគេទាំង២នាក់ រួចហើយប្លន់ យកម៉ូតូ ជិះគេចខ្លួន សំដៅទៅស្ពានអាកាស ក្បាលថ្នល់បាត់ទៅ។

ក្រោយកើតហេតុ ជនរងគ្រោះទាំង២នាក់ បានដាក់ពាក្យបណ្តឹង នៅប៉ុស្តិ៍ទន្លេបាសាក់ ឲ្យជួយតាម ចាប់ក្រុមចោរ ត្រឡប់មកវិញផងដែរ៕

ផ្តល់សិទ្ធដោយ ដើមអម្ពិល