អាងខ្នងផ្កាយ៣ បើករថយន្តបុកគេហើយ ទារឱ្យគេសងទៀត

អាងខ្នងផ្កាយ៣ បើករថយន្តបុកគេហើយ ទារឱ្យគេសងទៀត

ខេត្តព្រះសីហនុ ៖ ឈ្មោះលោកឧត្តមសេនីយ៍ឯកយោធា មួយរូបត្រូវបានស្ត្រីម្នាក់យកមក អួតអាងនៅកណ្តាលទីប្រជុំជន បន្ទាប់ពីរថយន្តរបស់ស្ត្រីរូបនោះ បានបុកគ្នាជាមួយរថយន្តមួយគ្រឿង ផ្សេងទៀតនៅចំណុចផ្លូវបំបែកសួនច្បារអតីតមហោស្រព ស្ថិតក្នុងភូមិ២ សង្កាត់លេខ២ ក្រុងព្រះសីហនុ កាលពីវេលាម៉ោង១១ និង១០នាទីព្រឹក ថ្ងៃទី២៧ មិថុនា ២០១៥។

ជុំវិញករណីនេះសមត្ថកិច្ចចរាចរណ៍បានឱ្យដឹងថា ពុំបានធ្វើរបាយការណ៍នោះទេ ប៉ុន្តែបើទោះបីជាសមត្ថកិច្ចពុំបានបង្ហាញពីរបាយការណ៍ យ៉ាងណាក៏ដោយ យោងតាមប្រភព ពីកូនមន្ត្រីប៉ូលិសបានលួចបង្ហើបថា ករណីគ្រោះថ្នាក់ ចរាចរណ៏នេះបង្កឡើង ដោយរថយន្តមួយគ្រឿង ម៉ាកមីតស៊ុ យប៊ីស៊ីដ្រាយស្តុន ពណ៌ស គ្មានស្លាកលេខ ក្នុងទិសដៅពីជើងទៅត្បូងបើកបរ ដោយស្ត្រីម្នាក់ឈ្មោះ ហាក់ ស៊ីថា អាយុ៤៥ឆ្នាំ មានទីលំនៅទួលស្វាយ ព្រៃ២ ខណ្ឌចំការមន រាជធានីភ្នំពេញ បានបុកជាមួយរថយន្តមួយគ្រឿងទៀតដែលកំពុងធ្វើដំណើរពីមុខម៉ាកឡិច ស៊ីស ពណ៌ស្ករ ពាក់ស្លាកលេខ ភ្នំពេញ 2Q9142 ក្នុងទិសដៅពីលិចទៅកើត ហើយបានស្រែកឡូឡានៅកន្លែងកើតហេតុថា ខ្លួនគាត់ស្គាល់អ្នកធំ ជាមន្ត្រីយោធាថ្នាក់ផ្កាយ៣ និងជាថៅកែសណ្ឋាគារនៅក្រុងព្រះសីហនុ រូបគាត់មិនខ្លាចនរណា ជាដាច់ខាត ហើយគ្មាននរណាម្នាក់អាចធ្វើអ្វីគាត់បាននោះទេ។

ក្នុងហេតុការណ៍គ្រោះថ្នាក់ ចរាចរណ៍នេះពុំបណ្តាល ឱ្យរងគ្រោះដល់ មនុស្ស ឬខូចខាតធ្ងន់ធ្ងរនោះទេ តែដោយ សារតែអាងខ្នង អាងសែ ទើបរឿងនេះមិនអាចបញ្ចប់បាន គឺរង់ចាំបញ្ជូនទៅកាន់តុលាការជាអ្នកសម្រេច។

ទាក់ទិនទៅនឹងករណីនេះដែរ អ្នកឃើញហេតុការណ៍ មានការហួសចិត្តយ៉ាងខ្លាំងទៅនឹងទង្វើរបស់ ស្ត្រីជិះរថយន្តម៉ាកមីតស៊ុយប៊ីស៊ីដ្រាយស្តុន ពណ៌ស គ្មានស្លាកលេខនោះយ៉ាងខ្លាំង ព្រោះតែបើកបុករថយន្តគេហើយទាមទារឱ្យគេសងទៀតផង មិនត្រឹមតែប៉ុណ្ណោះយកឈ្មោះឯកឧត្តមនេះ ឯកឧត្តមនោះមកអួតអាងនៅកណ្តាលទីប្រជុំជន គំរាមគួភាគីម្ខាងទៀត ខណៈពេលឯកឧត្តម ដែលត្រូវគេ យកឈ្មោះមកអួតអាងពុំបានដឹងរឿងអ្វី ទាំងអស់។

ដោយឡែក លោកឧត្តមសេនីយ៍ឯកយោធា ដែលត្រូវគេយកឈ្មោះប្រើប្រាស់បានធ្វើការ បដិសេធភ្លាមៗក្រោយទទួលដំណឹងថា មានគេយកឈ្មោះ របស់លោកទៅអួតអាងតាមទីសារធារណៈ ដោយលោកឧត្តមសេនីយ៍បញ្ជាក់ថា ស្ត្រីរូបនោះ គឺរូបគាត់បានស្គាល់ គ្នាមែន ប៉ុន្តែពុំមានអ្វីពាក់ព័ន្ធនោះទេ អ្នកណាសាង អ្នកនោះទទួល ទុកឱ្យច្បាប់ជាអ្នកកំណត់ថា អ្នកណាខុស អ្នកណាត្រូវ មិនអាចធ្វើអ្វីរំលោភច្បាប់បានទេ៕