ភ្នំពេញ៖ ដោយសង្កេតឃើញផ្លែផ្កា និងការរីកចំរើន នៃការប្រកួតកីឡាបាល់ទះ កម្ពុជាកន្លងមក ក្រុមហ៊ុនស្រាបៀរ LEO ដែលជាម្ចាស់ ក្នុងការឧបត្ថម្ភ ក្នុងការប្រកួត បានសហការ ជាមួយនឹងសហព័ន្ធ កីឡាបាល់ទះកម្ពុជា ធ្វើនូវសន្និសិទសារព័ត៌មាន ប្រកាសពីការប្រកួត កីឡាបាល់ទះថ្នាក់ជាតិ ពានរង្វាន់សម្តេច អគ្គមហាសេនាបតី តេជោ ហ៊ុន សែន និងពានរង្វាន់ LEO CUP National Volleyball 2015 នៅសណ្ឋាគារ Naga World កាលពីម្សិលមិញនេះ ដោយមានវត្តមាន ដ៏ខ្ពង់ខ្ពស់ ពីឯកឧត្តម វ៉ាត ចំរើន អនុរដ្ឋលេខាធិកា ក្រសួង ទេសចរណ៍ និងជាអគ្គលេខាធិការ គណៈកម្មការ ជាតិអូឡាំពិក ផងដែរ។

ឯកឧត្តម វ៉ាតចំរើន អនុរដ្ឋលេខាធិកា ក្រសួងទេសចរណ៍ និងជាអគ្គលេខាធិការ គណៈកម្មការជាតិអូឡាំពិក

ជួបជាមួយនឹង កញ្ញា កានជិត កាវវ៉ាន់ឈូ ជាប្រធានគ្រប់គ្រង យុទ្ធសាស្ត្រទីផ្សារ នៃក្រុមហ៊ុន BOON RAWD TRADING INTERNATIONAL បាន ឲ្យដឹងថា ក្រោយពីធ្វើការប្រកួត ជម្រុះយ៉ាងស្វិតស្វាញបំផុត ទូទាំងខេត្តនិងរាជធានី ចាប់ពីខែ មិនាមក គឺកម្មវិធី ប្រកួតបាល់ទះ ដែលរៀបចំឡើង ស្រាបៀរ LEO សហការជាមួយនិង សហព័ន្ធ កីឡាបាល់ទះ កម្ពុជានេះ មានការចូលរួមទស្សនា គាំទ្រជាច្រើន នៅតាមមណ្ឌលនិមួយៗ ជារួមមាន រាជធានីភ្នំពេញ ខេត្តព្រះសីហនុ ខេត្តកំពង់ចាម ខេត្តបាត់ដំបង និងខេត្តសៀមរាប។

កញ្ញា កានជិត កាវវ៉ាន់ឈូ

កញ្ញាក៏បាន ឲ្យដឹងទៀតថា សំរាប់ការប្រកួត ក្នុងវគ្គផ្តាច់ព្រ័ត្រ នឹងប្រព្រឹត្តទៅ នៅវិមានពហុកីឡដ្ឋាន ជាតិអូឡាំពិក ចាប់ពីថ្ងៃទី៧ ដល់ថ្ងៃទី ១៩ខែកក្កដា ឆ្នាំ២០១៥ ដែលមាន ប្រាក់រង្វាន់ សរុបរហូតដល់ ៨៨,០០០,០០០រៀល ប្រគល់ដល់ ក្រុមកីឡាករ ទាំងអស់ ដែលបាន ខិតខំប្រឹងប្រែង ប្រកួតយ៉ាង អស់ពីសមត្ថភាព។ ហើយរឹតតែមាន មោទនៈភាព ជាថ្មី ម្តងទៀតហើយ របស់ LEO Cup National Volleyball 2015 ដែលទទួលបាន កិត្តិយសដ៏ខ្ពង់ខ្ពស់ ពីប្រមុខដឹកនាំ នៃព្រះរាជាណាចក្រ កម្ពុជា បានអនុញ្ញាតិប្រសិទ្ធនាមថា ពានរង្វាន់សម្តេច អគ្គមហា សេនាបតីតេជោ ហ៊ុន សែន ឆ្នាំ២០១៥។

ជាពិសេស ការប្រកួតនេះ នឹងមានការផ្សាយផ្ទាល់ តាមរយៈស្ថានីយ៍ ទូរទស្សន៍ MYTV ក្នុងវគ្គផ្តាច់ព្រ័ត្រនៃ DIVISION B នៅថ្ងៃ ទី១២ខែកក្កដា វេលាម៉ោង ១៤:០០-១៨:០០ និងក្នុងវគ្គផ្តាច់ ព្រ័ត្រនៃ DIVISION A នៅថ្ងៃទី១៩ ខែកក្កដា វេលាម៉ោង ១៤:០០-១៨:០០ ផងដែរ៕

ដោយ​ លូហាន

ខ្មែរឡូត