អាមេរិក៖ វាសឹងតែ ក្លាយទៅជារឿង ទូទៅមួយហើយ ដែលអ្នកចូលចិត្ត ហែលទឹកនៅក្នុង អាងទឹកដែល មានមនុស្សទៅ លេងច្រើន ជួបប្រទះរឿង ភ្នែកឡើងក្រហម ក្រោយពី ងើបចេញពី អាងហែលទឹកនោះវិញ តែអ្នកមានដឹង ពីមូលហេតុដែល នាំឲ្យភ្នែករបស់ អ្នកក្លាយទៅជា បែបនេះដែរ ឬទេ? ខាងក្រោមនេះ គឺជាការស្រាវជ្រាវ រកឃើញរបស់ ក្រុមអ្នកជំនាញ ហើយវាក៏អាច ធ្វើឲ្យអ្នកភ្ញាក់ផ្អើល បានផងដែរ។

យោងតាមប្រភព របាយការណ៍របស់ ក្រុមអ្នកជំនាញ នៃមជ្ឈមណ្ឌលជាតិ គ្រប់គ្រង និងការពារ មេរោគរបស់ សហរដ្ឋអាមេរិក (CDC) បានឲ្យដឹងថា កន្លងមកមាន ការយល់ច្រឡំថា សារជាតិ ក្លូរីន ដែលត្រូវបាន ដាក់បញ្ចូលទៅ​ ក្នុងអាងហែលទឹក ដើម្បីសម្លាប់ មេរោគនៅក្នុងនោះ គឺជាកត្តា ដែលនាំឲ្យភ្នែក របស់មនុស្សយើង ឡើងក្រហម ក្រោយពេលដែល ពួកយើងបញ្ឈប់ ការហែលទឹក រួចមក តែនេះមិនមែនឡើយ ចំណុចដ៏សំខាន់នោះ គឺជាទឹកនោម ដែលមនុស្សបាន បញ្ចេញនៅក្នុង អាងហែលទឹក នោះទៅវិញទេ។

Michele Hlavsa អ្នកដឹកនាំនៃ ការស្រាវជ្រាវទៅលើ សុវត្ថិភាពក្នុង អាងទឹករបស់ CDC បាននិយាយថា “តាមពិតទៅ សារជាតិក្លូរីន និងជាតិគីមី សម្លាប់មេរោគ ដទៃទៀត ត្រូវបានគេ ដាក់បញ្ចូលទៅ ដើម្បីទៅកំចាត់ ពពួកមេរោគ ដែលមាននៅក្នុង អាងទឹកនោះប៉ុណ្ណោះ តែទឹកនោម របស់មនុស្ស ដែលត្រូវបានបញ្ចេញ នៅក្នុងអាងទឹក ទៅវិញទេ ដែលជាកត្តាចំបង ព្រោះវាបាន ចូលទៅ បំផ្លាញប្រសិទ្ធិភាព របស់សារជាតិក្លូរីន ហើយជាការពិតណាស់ វាក៏អាចបង្កឲ្យ មានការរោល ឬក្តៅក្រហាយ ដែលនាំឲ្យ ភ្នែករបស់មនុស្ស យើងឡើងក្រហម បែបនោះឯង”។

បន្ថែមពីនេះទៀត លោក Thomas M. Lachocki នាយកនៃសហព័ន្ធ អាងហែលទឹកជាតិ NSPF បានលើកឡើងថា “នៅពេលដែល ភ្នែករបស់អ្នកហែលទឹក ឡើងក្រហមនោះ វាអាចបញ្ជាក់ គ្រប់គ្រាន់បានហើយ ថាអាចមាននរណាម្នាក់ បាននោមនៅ ក្នុងអាងទឹកនោះ”។ ម្យ៉ាងវិញទៀត លោក Chris Wiant ប្រធាននៃ ក្រុមប្រឹក្សាទៅលើ សុខភាពនិង គុណភាពទឹក ក៏បានបញ្ជាក់ ផងដែរថា “នៅពេលដែល អ្នកទៅដល់ អាងហើយធុំក្លិន ដូចជាសារជាតិ គីមីនោះ តាមពិតវា មិនមែនជា សារជាតិក្លូរីន ទេតែវា ជាការលាយបញ្ចូលគ្នា រវាងទឹកនោម ញើស និងធូលីដែល ជាប់នៅលើ ខ្លួនប្រាណរបស់ អ្នកហែលទឹក ជាមួយនឹង សារជាតិក្លូរីន ហើយវាក៏អាច ធ្វើឲ្យអ្នក មានភ្នែកឡើងក្រហម ឈឺភ្នែក ហៀរសំបោរ និងក្អកផងដែរ”។

ជាចុងក្រោយ អ្នកជំនាញទាំងនោះ ក៏បានបញ្ជាក់ប្រាប់ថា ដំណោះស្រាយគឺ មានតែធ្វើការ អប់រំទៅដល់ អ្នកហែលទឹក ទាំងអស់ដើម្បី អាចឲ្យពួកគេ យល់ដឹងកុំបន្ត ការបត់ជើងតូច នៅក្នុងអាង ហែលទឹកបន្តទៅទៀត ព្រោះវាក៏អាច ជះផលអាក្រក់ ដល់សុខភាព របស់មនុស្ស បានផងដែរ៕

ទឹកនោម គឺជាកត្តាចំបង ដែលធ្វើឲ្យភ្នែក អ្នកហែលទឹក ឡើងក្រហម

ប្រភព៖ ដេលីម៉េល

ដោយ៖ សុជាតិ

ខ្មែរឡូត