យុវជន២នាក់ ដើរលេងអស់ លុយអស់ម៉ូតូ ប្រឌិតរឿងថា ចោរប្រដាប់អាវុធ ភ្ជង់ប្លន់បំប៉ោង សភាពការណ៍

យុវជន២នាក់ ដើរលេងអស់ លុយអស់ម៉ូតូ ប្រឌិតរឿងថា ចោរប្រដាប់អាវុធ ភ្ជង់ប្លន់បំប៉ោង សភាពការណ៍

រាជធានីភ្នំពេញ ៖ សមត្ថកិច្ចនគរបាលខណ្ឌដង្កោ បានសម្ដែងការហួសចិត្ត យ៉ាងខ្លាំងចំពោះយុវជន២នាក់ ដែលបានដើរលេងពេលយប់ឡុងចុង អស់លុយកាក់ និងអស់ម៉ូតូម៉ាកវ៉េវអាល់ហ្វា ស៊េរីឆ្នាំ២០១០ ពណ៌ខ្មៅ ១គ្រឿង មិនហ៊ានចូលផ្ទះ ព្រោះខ្លាចក្រុមគ្រួសារស្ដីបន្ទោស បែរជាប្រឌិតរឿងថា មានក្រុមចោរប្លន់ប្រដាប់អាវុធ មានគ្នា២នាក់ធ្វើសកម្មភាព ភ្ជង់ប្លន់យកម៉ូតូកាលពីទៀបភ្លឺ និងបានប្ដឹងនគរបាលខណ្ឌ ឱ្យជួយអន្តរាគមន៍ ពួនស្ទាក់ចាប់ជនសង្ស័យ ប៉ុន្តែក្រោយពេលសមត្ថកិច្ច ធ្វើការស្រាវជ្រាវ ទើបដឹងថា ជារឿងប្រឌិតរបស់ ជនទាំងពីរនាក់ខាងលើ ។

ហេតុការណ៍នេះ បានកើតឡើងកាលពីវេលា ម៉ោង៤ទៀបភ្លឺថ្ងៃទី២២ ខែមិថុនា ឆ្នាំ២០១៥ ដែលយុវជនទាំង២នាក់ខាងលើ បានប្រាប់ប៉ូលិសថា ត្រូវក្រុមចោរភ្ជង់ប្លន់ម៉ូតូ នៅសិប្បកម្មផលិតទ្វារ បង្អួចដែក ស្ថិតក្នុងភូមិតាឡី សង្កាត់ដង្កោ ខណ្ឌដង្កោ ។ យុវជនទាំង២នាក់នេះ ម្នាក់ ឈ្មោះ ចាន់ ឡា អាយុ១៩ឆ្នាំ និងម្នាក់ទៀត ឈ្មោះ សុខ ម៉ង់ អាយុ១៩ឆ្នាំ ជាកម្មករនៅក្នុងសិប្បកម្ម និងស្នាក់នៅន្លែងកើតហេតុ ។

លោកវរសេនីយ៍ទោ ជឹម ស៊ីថា អធិការ នគរបាលខណ្ឌដង្កោ បានសម្ដែងការហួសចិត្ត យ៉ាងខ្លាំងចំពោះហេតុ ការណ៍ខាងលើ ដោយលោកអធិការ បានប្រាប់កោះសន្តិភាព កាលពីព្រឹកថ្ងៃទី២៤ ខែមិថុនា ថា នៅថ្ងៃកើតហេតុ លោកទទួលបាន ព័ត៌មានពីប្រជាពលរដ្ឋថា មានយុវជនពីរនាក់ ត្រូវក្រុមចោរប្លន់ ប្រដាប់អាវុធ២នាក់ ភ្ជង់ប្លន់យកម៉ូតូ១គ្រឿង ទៅបាត់ដោយសុវត្ថិភាព ។

បន្ទាប់ពីទទួល បានព័ត៌មាននេះភ្លាម លោកបានដឹកនាំកម្លាំង ចុះទៅកាន់កន្លែងកើតហេតុភ្លាមៗ មិនបានព្រងើយកន្តើយនោះឡើយ ខណៈទៅដល់ក៏ធ្វើការតាមជំនាញ ដូចជាការសាកសួរសាក្សី នៅកន្លែងកើតហេតុ ការត្រួតពិនិត្យ តាមកាមេរ៉ាសុវត្ថិភាព និងការងារជាច្រើនទៀត មិនបានប្រទះឃើញភស្តុតាង ណាមួយបញ្ជាក់ពី សកម្មភាពប្លន់ ប្រដាប់អាវុធកើតឡើង នោះឡើយ ។

លោកអធិការនគរបាលខណ្ឌដង្កោ បានបន្តថា បន្ទាប់មក លោកបានបញ្ជាកម្លាំងឲ្យនាំខ្លួនយុវជនទាំងពីរនាក់នេះទៅសាកសួរតាមជំនាញ នៅអធិការដ្ឋាននគរបាលខណ្ឌ ក្រោយពេលស្រាវជ្រាវអស់ចិត្ត ទើបដឹងថា ករណីនេះមិនមែនជាសកម្មភាព ប្លន់ប្រដាប់អាវុធនោះឡើយ ។ ជារឿងប្រឌិតរបស់ យុវជនទាំង២នាក់នេះ ដោយសារតែខ្លួនដើរ លេងរហូតអស់លុយកាក់ និងម៉ូតូ មិនហ៊ានចូលផ្ទះខ្លាច ក្រុមគ្រួសារស្ដីបន្ទោសក៏បាន ប្រឌិតរឿងនេះឡើង ។

លោកអធិការនគរបាលខណ្ឌ ជឹម ស៊ីថា បានបញ្ជាក់ថា ប៉ូលិសធ្វើការដើម្បី បម្រើប្រជាពលរដ្ឋ ឲ្យតែពលរដ្ឋមានបញ្ហាអ្វីកើតឡើង ហើយមកប្តឹងប៉ូលិសនោះ គឺប៉ូលិសមិននៅស្ងៀមទេ គឺខិតខំធ្វើការស្រាវជ្រាវ វែកមុខក្រុមជនសង្ស័យយកមក ផ្តន្ទាទោសតាមច្បាប់ ។ ប៉ុន្តែសូមនិយាយប្រាប់ ការពិតដល់ប៉ូលិស បើប្លន់ប្រាប់ថាប្លន់ បើលួចប្រាប់ថាលួច កុំចាញ់ល្បែង ឬដើរលេងអស់លុយ ហើយប្រឌិតរឿងប្រាប់ថា ត្រូវចោរប្លន់ដូចករណី ខាងលើនេះឱ្យសោះ ៕