សៀមរាប៖ ករណីឃាតកម្ម និងប៉ងប្លន់ យកម៉ូតូនិងលុយកាក់ ពីថៅកែដំឡូង របស់ខ្លួន មួយបានកើតឡើង កាលពីព្រឹក ថ្ងៃទី២៣ ខែ មិថុនា ឆ្នាំ២០១៥ ស្ថិតនៅក្នុង រោងចាំចំការមួយ ក្នុងភូមិឃុនរាម ឃុំឃុនរាម ស្រុកបន្ទាយស្រី ខេត្ដសៀមរាប ដែលធ្វើឱ្យ ស្ដ្រីរងគ្រោះ បានដាច់ខ្យល់ស្លាប់ ភ្លាមៗតែម្ដង។

អំពើប្លន់ហើយ ឈានទៅដល់ ការអារក សម្លាប់ថៅកែស្រី របស់ខ្លួនខាងលើនេះ បានបង្កឡើង ពីជនសង្ស័យជាកម្មករចំការដំឡូង របស់ស្ដ្រីរងគ្រោះ ប៉ុន្ដែអំពើប្លន់ នេះមិនបាន សម្រេចនោះឡើយ ពោលដោយមានការ ស្រែកឱ្យជួយ ពីស្ដ្រីរងគ្រោះ ធ្វើឱ្យប្រជាពលរដ្ឋ អាជ្ញាធរនិង សមត្ថកិច្ចមូលដ្ឋាន ចុះទៅជួយ អន្ដរាគមន៍ភ្លាមៗ ប៉ុន្ដែអកុសល ស្ដ្រីរងគ្រោះបាន ដាច់ខ្យល់ស្លាប់ ទៅហើយ ។

យោងតាមប្រភព​ ព័ត៌មានពីសមត្ថកិច្ច មូលដ្ឋានបាន ឱ្យដឹងថា ស្ដ្រីរងគ្រោះដែលមាន កូនតូចៗ៣នាក់ ក្នុងនោះស្រី២នាក់ឈ្មោះ តឿន ចាម អាយុ៣៨ឆ្នាំ មុខរបរជាអ្នក ធ្វើចំការដំឡូង រីឯប្ដីឈ្មោះ សេម ឆាង ហើយនៅម៉ោងកើតហេតុនោះ ប្ដីរបស់ស្ដ្រីរងគ្រោះ មិននៅនោះឡើយ ពោលជាប់រវល់ ទៅបើកយកមុង ពីមណ្ឌលសុខភាព នៅស្រុកបន្ទាយស្រី ឯណោះ ។

សមត្ថកិច្ចមូលដ្ឋាន បានបញ្ជាក់ថា មុនពេលកើតហេតុ ខណៈដែលស្ដ្រី រងគ្រោះកំពុង ចៀនត្រីនៅ ក្នុងរោងចាំចំការ ពេលនោះស្រាប់ តែជនដៃដល់ មានឈ្មោះ អាក្របី លបទៅពីក្រោយ ប្រដាប់ដោយកាំបិត ទៅចាប់អារក ដើម្បីប៉ងប្លន់យក ម៉ូតូមួយគ្រឿង ម៉ាកហុងដា សេ១២៥ ពណ៌ខ្មៅ ព្រមទាំងលុយកាក់ មួយចំនួន ។

នៅពេលដែលជនដៃដល់ កំពុងធ្វើសកម្មភាពនោះ ស្ដ្រីរងគ្រោះបាន ស្រែកផ្អើលឆោឡោ ដោយរត់ចេញ ពីរោងចាំចំការឱ្យ គេជួយ ទើបធ្វើឱ្យជននេះ ដឹងខ្លួនទាន់ក៏ រត់គេចដោយ សុវត្ថិភាព ប៉ុន្ដែសមត្ថកិច្ច បានស្គាល់អត្ដសញ្ញាណ អស់ហើយនិង កំពុងធ្វើការ ស្រាវជ្រាវតាមចាប់ខ្លួន ។ ដោយឡែកសព ស្ដ្រីរងគ្រោះ ត្រូវបានសមត្ថកិច្ចប្រគល់ទៅ ឱ្យក្រុមគ្រួសារយក ទៅធ្វើបុណ្យ តាមប្រពៃណី៕

ផ្តល់សិទ្ធដោយ ដើមអម្ពិល