បណ្តាញសង្គមថៃ បង្ហោះរូបភាព ខ្មែរលួចកាប់គ្រញូង

បណ្តាញសង្គមថៃ បង្ហោះរូបភាព ខ្មែរលួចកាប់គ្រញូង

ខេត្តបន្ទាយមានជ័យ ៖ បណ្ដាញព័ត៌មានសង្គម ដែលផ្សាយ នៅក្នុងប្រទេសថៃ ប៉ុន្មានថ្ងៃនេះ បានបង្ហាញរូបភាពពលរដ្ឋខ្មែរ មួយក្រុមធំ ស្ពាយឈើគ្រញូង ហើយត្រូវសមត្ថកិច្ចថៃ ចាប់ខ្លួនប្រមាណជាង ២០នាក់ បណ្ដើរត្រសងដែលអ្នកខ្លះ មានរណារ និងស្ពាយ ឈើគ្រញូងផង ។ រូបភាពដ៏កម្រនេះ ត្រូវបានបង្ហោះ កាលពីពេលថ្មីៗ កន្លងទៅ ។

បណ្ដាញព័ត៌មានសង្គម របស់ថៃដដែល បានបង្ហាញរូបភាព ទាហានថៃប្រដាប់ដោយ អាវុធគ្រប់ដៃ និងមានស្ថានភាព ប្រុងប្រយ័ត្ន នៅពេលចាប់ខ្លួន ពលរដ្ឋខ្មែរ ប្រមាណជាង២០នាក់ ដែលខ្លះពុន ខ្លះស្ពាយ ឈើគ្រញូង រណារ និងពូថៅ បណ្ដើរចេញពី ក្នុងព្រៃ តាមជ្រលងភ្នំដងរែក ឈមនឹង ខេត្តបន្ទាយមានជ័យ និងខេត្តឧត្តរមានជ័យ របស់កម្ពុជា ដោយប្រមូល ឈើគ្រញូង គរទុកម្ដុំ និងឱ្យពលរដ្ឋខ្មែរ ទាំងនោះ អង្គុយផ្ទាល់ដីតម្រង់ជួរគ្នា ។

គួររំលឹកថា កន្លងមកពលរដ្ឋខ្មែរ រាប់រយនាក់ ដែលស៊ីឈ្នួល លួចចូលទៅកាប់ គ្រញូង ក្នុងទឹកដីថៃ ត្រូវសមត្ថកិច្ចថៃចាប់ដាក់ច្រវាក់ មុនបញ្ជូនទៅដាក់ ពន្ធនាគារ ហើយអ្នកខ្លះ រងការបាញ់របួស និងស្លាប់ ជាញឹកញាប់ ។

ជាមួយនឹងបាតុភាព ដែលកើតឡើងនេះ រាជរដ្ឋាភិបាលកម្ពុជា បានដាក់វិធានការ យ៉ាងតឹងរ៉ឹង ឱ្យអាជ្ញាធរតាមព្រំដែន ត្រូវទប់ស្កាត់ ការលួចឆ្លងដែន ទៅកាប់គ្រញូង លើទឹកដីរបស់គេ ហើយក៏បាន អំពាវនាវ សូមឱ្យទាហានថៃកុំបាញ់ប្រហារ ដូចបាញ់សត្វបែបនេះ ដោយសុំឱ្យចាប់ខ្លួន ផ្ដន្ទាទោស ទៅតាមច្បាប់ បានហើយ ។

ទោះជាមានវិធានការ យ៉ាងណាក៏ដោយ ក៏ឈ្មួញទុច្ចរិត នៅតែបន្ត ឃុបឃិត ជាមួយកងកម្លាំង ដែលឈរជើងតាមបន្ទាត់ព្រំដែន គិតតែពី ផលប្រយោជន៍ របស់ខ្លួន មិនបានគិតពី សុវត្ថិភាពប្រជាពលរដ្ឋ ទាំងនោះឡើយ និងបានលួចឱ្យ ពលករឆ្លងដែន ចូលទៅកាប់ ឈើគ្រញូង នៅប្រទេសថៃ ដដែលព្រោះតែដុល្លារ ៕