ឃាត់ខ្លួនថៅកែជនជាតិចិន និងមេការស្រី ដើម្បីសាកសួរ ពាក់ព័ន្ធ ករណីកម្មករ ៣នាក់ស្លាប់ នៅរោងសិប្បកម្ម ស៊ីនយ៉ុងថៃ

ឃាត់ខ្លួនថៅកែជនជាតិចិន និងមេការស្រី ដើម្បីសាកសួរ ពាក់ព័ន្ធ ករណីកម្មករ ៣នាក់ស្លាប់ នៅរោងសិប្បកម្ម ស៊ីនយ៉ុងថៃ

រាជធានីភ្នំពេញ ៖ បន្ទាប់ពីថ្មម៉ាបធ្លាក់សង្កត់ស្លាប់កម្មករ ៣នាក់នៅ រោងសិប្បកម្ម ស៊ីនយ៉ុងថៃ សមត្ថកិច្ចបានហៅថៅកែសិប្បកម្ម ស៊ីនយ៉ុងថៃ ដែលជាជន ជាតិម្នាក់ឈ្មោះឈឹង ទឿងភីញ ភេទប្រុស អាយុ៤៦ឆ្នាំ និង មេការស្រីម្នាក់ទៅ សាកសួរ និងឃាត់ខ្លួនជា បណ្តោះពាក់ព័ន្ធនឹង ករណីស្លាប់កម្មករ ទាំង៣នាក់ខាងលើ ។

លោកលី សាវេត អភិបាលខណ្ឌសែនសុខ បានឧបត្ថម្ភគ្រួសារ សពកម្មករ រងគ្រោះ៥០ម៉ឺនរៀល ក្នុង១គ្រួសារ សរុបទាំងអស់ ១លាន៥សែនរៀល ខណៈពេលដែល លោក និងលោកម៉ក់ ហុង អធិការ នគរបាលខណ្ឌ បានចុះទៅពិនិត្យកន្លែង កើតហេតុភ្លាមៗ ដោយផ្ទាល់ ។

ជនរងគ្រោះទាំង៣នាក់ដែលបានស្លាប់ក្នុងហេតុការណ៍នេះ ទី១-ឈ្មោះសៅ ប៊ុនណា ភេទប្រុស អាយុ៣២ឆ្នាំ ស្នាក់នៅផ្ទះជួលម្តុំ ផ្សារដើមថ្កូវ មានស្រុក កំណើតនៅ ស្រុកស្អាង ខេត្តកណ្តាល ។ ទី២-ឈ្មោះហាក់ រដ្ឋា ភេទប្រុស អាយុ២៥ឆ្នាំ ស្នាក់នៅផ្ទះ ជួលម្តុំជម្ពូរវ័ន្ត មានស្រុកកំណើត នៅស្រុក កំចាយមារ ខេត្តព្រៃវែង ។ ទី៣-ឈ្មោះថោង បូរ៉ា ភេទប្រុស អាយុ៣០ឆ្នាំ ស្នាក់នៅផ្ទះជួលម្តុំ ទឹកថ្លា មានស្រុកកំណើត នៅស្រុកត្រាំកក់ ខេត្តតាកែវ ។

សពកម្មកររងគ្រោះទាំង៣នាក់ត្រូវបានដឹកទៅតម្កល់ទុកនៅវត្តទឹកថ្លា ដើម្បីរង់ចាំ សាច់ញាតិមក យកទៅធ្វើបុណ្យតាម ប្រពៃណី ។

សូមបញ្ជាក់ថា កាលពីវេលាម៉ោង៨ និង១០នាទីយប់ថ្ងៃទី២៣ មិថុនា ២០១៥ កម្មកររោងសិប្បកម្ម ស៊ីនយ៉ុងថៃ៣នាក់បាន ស្លាប់ភ្លាមៗខណៈពេល ពួកគេកំពុងលើកថ្មម៉ាប ចេញពីកុងតឺន័រ ហើយខុស បច្ចេកទេស ត្រូវថ្មម៉ាបធ្លាក់សង្កត់ ពីលើ ។

រោងសិប្បកម្មស៊ីនយ៉ុងថៃ មានទីតាំងផ្ទះលេខ១០៦៥ ផ្លូវ២០០៤ សង្កាត់ទឹកថ្លា ខណ្ឌសែនសុខ រាជធានីភ្នំពេញ ជាប់របងគណបក្ស ប្រជាជនកម្ពុជាក្រុង ចម្ងាយប្រមាណ ១០០០ម៉ែត្រ ពីសាលារៀនណតប្រ៊ីត ៕