បាត់ដំបង៖ ម៉ូតូ២គ្រឿង បានបើកប្រណាំងគ្នា ដោយប៉ះដៃចង្កូតគ្នា ជ្រុលទៅចូលក្រោមរថយន្ត ក្នុងទិសដៅ បញ្ច្រាសទិសគ្នា បណ្តាលឲ្យស្លាប់ម្នាក់ កាលពីវេលាម៉ោង១២និង០០នាទី ថ្ងៃទី២៣ ខែមិថុនា ឆ្នាំ២០១៥ នៅ ចំណុចផ្លូវជាតិលេខ៥ ត្រង់ចំណុច ភូមិកាឡោមភ្លុក ឃុំព្រៃស្វាយ ស្រុកមោងឫស្សី។ ចំណែកសពជនរង សមត្ថកិច្ច បានប្រគល់ឲ្យក្រុមគ្រួសារ យកទៅធ្វើបុណ្យ តាមប្រពៃណី។

លោក សោម រ៉ាវុធ មន្រ្តីអាវុធហត្ថស្រុកមោងឫស្សី បានឲ្យដឹងថា កាលពីវេលាម៉ោង១២និង០០នាទី ថ្ងៃទី២៣ ខែមិថុនា ឆ្នាំ២០១៥ នៅ ចំណុចផ្លូវជាតិលេខ៥ ត្រង់ចំណុច ភូមិកាឡោមភ្លុក ឃុំព្រៃស្វាយ ស្រុកមោងឫស្សី មានករណីគ្រោះថ្នាក់ចរាចរ បង្កឡើងដោយម៉ូតូ ២គ្រឿង បានជិះប្រណាំងគ្នា រួចប៉ះដៃចង្កូត ធ្វើឲ្យម៉ូតូ១គ្រឿង ម៉ាកហុងដាឌ្រីម សេ១២៥ ស៊េរី២០១៥ ពណ៌ខ្មៅ  គ្មានផ្លាកលេខ បើកបរដោយឈ្មោះ សាយ ម៉ាកតែល ភេទប្រុស អាយុ ២៥ឆ្នាំ មុខរបរ ទិញជ្រូក រស់នៅភូមិកន្សៃបន្ទាយ ឃុំមោង ស្រុកមោងឫស្សី ខេត្តបាត់ដំបង ទិសដៅបញ្រ្ចាស ទិសគ្នា ពីលិចទៅកើត មកដល់ចំណុចខាងលើ បានទៅបុករថយន្ត១គ្រឿង ម៉ាកកូរ៉េ Juno ពណ៌ស ២តោនកន្លះ ពាកផ្លាកលេខ ៧០-១២៩២ ម្ចាស់រថយន្តឈ្មោះ ឯក កពង់ ភេទប្រុស អាយុ៣២ឆ្នាំ មុខរបរ បើកបរ (ជនជាតិថៃ) បណ្តាលឲ្យអ្នកជិះម៉ូតូស្លាប់ នៅពេលបញ្ចូលដល់មន្ទីរពេទ្យស្រុកមោងឫស្សី។

បច្ចុប្បន្នសពជនរងគ្រោះ ត្រូវបានក្រុមគ្រួសារ យកមកធ្វើមកបុណ្យតាមប្រពៃណី  រីឯរថយន្តនិងម៉ូតូ ត្រូវបាន នគរបាលចរាចរណ៍ស្រុក យកមករក្សាទុកនៅអធិការដ្ឋាន នគរបាលស្រុកមោងឫស្សី រង់ចាំដោះស្រាយតាមច្បាប់៕

ផ្តល់សិទ្ធដោយ ដើមអម្ពិល