កូរ៉េខាងជើង៖ នាពេលថ្មីៗនេះ ប្រទេសកូរ៉េខាងជើង បានធ្វើឲ្យពិភពលោក ភ្ញាក់ផ្អើលសាជាថ្មី ទៀតហើយ បន្ទាប់ពីបាន ចេញសេចក្តីប្រកាសថា ខ្លួនបានរកឃើញ ថ្នាំដ៏អស្ចារ្យម្យ៉ាង សម្រាប់ព្យាបាល មេរោគដែល កាចសាហាវជាច្រើន នៅក្នុងពិភពលោក ដូចជា អេដស៍ អ៊ីបូឡា SARS និង MERS ជាដើម។

យោងតាមព័ត៌មាន ដែលបានធ្វើការ ប្រកាសតាមរយៈ ទីភ្នាក់ងារព័ត៌មានជាតិ របស់ប្រទេសកូរ៉េ (KCNA) ដែលជាមជ្ឈមណ្ឌល ផ្តល់ព័ត៌មាននិង ព្រឹត្តិការណ៍ផ្សេងៗ ដែលកើតឡើង នៅក្នុងប្រទេស ផ្តាច់ការនិង អាថ៌កំបាំងមួយនេះ ទៅដល់ពិភពលោក បានឲ្យដឹងថា ថ្នាំដ៏អស្ចារ្យដែល អាចព្យាបាល មេរោគកាចសាហាវ ជាច្រើនដែល កំពុងយាយីអាយុ ជីវិតរបស់មនុស្ស ជាច្រើននៅលើ ពិភពលោកនោះ ត្រូវបានរកឃើញ និងផលិតឡើងដោយ ក្រុមហ៊ុន Korea Pugang Pharmaceutic របស់កូរ៉ខាងជើង។

ក្នុងនោះដែរ ក៏មានការដកស្រង់ សម្តីរបស់លោកវេជ្ជបណ្ឌិត Jon Sung Hun នាយកគ្រប់គ្រងនៃ ក្រុមហ៊ុននោះ បានបង្ហាញថា “ក្រុមអ្នកស្រាវជ្រាវ របស់យើងបាន បង្កើតនូវថ្នាំ ដ៏អស្ចារ្យម្យ៉ាង ដែលជាប្រភេទ ថ្នាំចាក់មានឈ្មោះថា Kumdang-2 ហើយត្រូវបាន ផ្សំឡើងដោយ ធាតុដ៏កម្រ មួយប្រភេទ ដែលមិនងាយនឹង រកបាននៅលើ ភពផែនដី របស់យើង បូករួមជាមួយនឹង ថ្នាំយិនស៊ិន ព្រមទាំងសារជាតិ សាការីត និងធាតុផ្សំផ្សេងៗ ជាច្រើនទៀត ដើម្បីឲ្យវាមាន ប្រសិទ្ធិភាពយ៉ាង អស្ចារ្យក្នុងការ កំចាត់មេរោគ ដែលកាចសាហាវ និងមិនធ្លាប់មាន ថ្នាំព្យាបាល ពីមុនមក”។

យិនស៊ិន ដែលជារូបធាតុផ្សំ ដ៏សំខាន់មួយដែរ នៅក្នុងការ បង្កើតថ្នាំដ៏អស្ចារ្យ Kumdang-2

បន្ថែមពីនោះទៀត ក៏មានការបញ្ជាក់ថា ថ្នាំប្រភេទមួយនេះ នឹងអាចដាក់លក់ ចេញទៅពិភពលោក បានតាមរយៈ ទីក្រុងមូស្គូ របស់ប្រទេស រុស្ស៊ី ដែលជាដៃគូ ចែកចាយតែមួយគត់ ប៉ុណ្ណោះ។ តែយ៉ាងណាមិញ ប្រទេសជាច្រើន ហាក់សម្តែងការ មិនជឿជាក់ ទៅលើដំណឹងមួយនេះ ព្រោះថាវា មិនទាន់មាន ភស្តុតាងជាក់លាក់ ណាដែលបង្ហាញ ពីសមាសភាព និងប្រសិទ្ធិភាព របស់ថ្នាំថ្មី មួយនេះនៅឡើយទេ។

ទាំងនេះគឺជា ដំណឹងថ្មីមួយទៀត ទាក់ទងទៅនឹង ប្រទេសកូរ៉េខាងជើង ទន្ទឹមនឹងនេះ ក៏មានមនុស្ស ជាច្រើនសង្ឃឹមថា ប្រទេសមួយនេះ នឹងអាចរកឃើញ ថ្នាំដ៏អស្ចារ្យ ពិតប្រាកដមែន ដើម្បីអាច ទប់ស្កាត់ និងព្យាបាល ទៅដល់មនុស្ស ដែលកំពុងតែ រងគ្រោះដោយសារ ជំងឺដ៏កាចសាហាវ រួមមាន អេដស៍ អ៊ីបូឡា SARS ជាពិសេសគឺ MERS ដែលកំពុងតែ រីករាលដាល ទៅកាន់មនុស្ស ជាច្រើន ផ្ទាល់តែម្តង៕

Kim Jong-un មេដឹកនាំ របស់ប្រទេស កូរ៉េខាងជើង

ប្រភព៖ ដេលីម៉េល

ដោយ៖ សុជាតិ

ខ្មែរឡូត