កណ្តាល៖ អំពើហិង្សាក្នុងគ្រួសារមួយ បណ្តាលស្រ្តី ជាប្រពន្ធត្រូវដាច់ដៃ ដោយសារប្តីកាប់ ចំណែកម្តាយក្មេក រងរបួសធ្ងន់ កាលពីវេលាម៉ោង ៥ល្ងាច ថ្ងៃទី១៦ ខែមិថុនា ឆ្នាំ២០១៥ នៅចំណុចភូមិគគីរធំ ឃុំគគីរ ស្រុកកៀនស្វាយ ខេត្តកណ្តាល ។

សមត្ថកិច្ចបានឲ្យដឹងថា ជនរងគ្រោះជា ប្រពន្ធមានឈ្មោះ អិន សារ៉េត អាយុ៣៦ឆ្នាំ នៅភូមិឃុំកើតហេតុ រងរបួស ដាច់ម្រាមដៃ ខាងឆ្វេង ៣កន្លែង នឹងលើផ្ទៃមុខ ចំណែកម្តាយក្មេកឈ្មោះ សឿន សារឿន អាយុ៦៥ឆ្នាំ រងរបួសលើ ផ្ទៃមុខ ។ ចំណែកបុរសជាប្តី ឈ្មោះ បី៍ ឆាន អាយុ៤៦ឆ្នាំ មានស្រុកកំណើត ភូមិដូង ឃុំជ្រៃ ស្រុកកំពង់ត្របែក ខេត្តព្រៃវែង ។ បច្ចុប្បន្នមកនៅក្នុងភូមិ ឃុំកើតហេតុ ខាងប្រពន្ធ ជាមួយម្ដាយក្មេក ។

សមត្ថកិច្ចបានឲ្យដឹងថា មុនពេលកើតហេតុបុរស ជាប្តីមកពីផឹកស្រា ស្រវឹងហើយឡូឡា ក៏កើតជាទំនាស់ ពេលនោះ ប្តីក៏បានយក កាំបិត កាប់លើប្រពន្ធ បណ្តាលឲ្យរងរបួស ដោយសភាពបែបនេះ ម្តាយក្មេកក៏បានចូល ទៅជួយក៏ជនល្មើស ជាប្តីកាប់រងរបួស ផងដែរ ។

ក្រោយធ្វើសកម្មភាព កាប់ប្រពន្ធនិង ម្តាយក្មេកហើយនោះ បុរសជាប្តី បានរត់គេចខ្លួន លុះម៉ោង ៦និង៥០នាទី ព្រឹកថ្ងៃទី១៧ ខែមិថុនា ជនល្មើស ត្រូវចាប់ខ្លួន បាននៅក្នុងផ្ទះលក់ កាហ្វេ ស្ថិតក្នុងឃុំសំរោងធំ ក្រោយពីបងប្អូនជនរង គ្រោះបានតាមរកឃើញ ហើយទូរសព្វ័ មកសមត្ថកិច្ចប៉ុស្ដិ អោយមកចាប់ខ្លួន បានយកទៅដល់ ប៉ុស្ដិ៍គគីរធំវិញ ។

បច្ចុប្បន្នជនបង្ក ត្រូវបានឃុំខ្លួនជា បណ្តោះអាសន្ននៅ អធិការដ្ឋាននគរបាល ស្រុកកៀនស្វាយ ដើម្បីកសាងសំណុំរឿង បញ្ជូនទៅកាន់ ស្នងការដ្ឋាននគរបាល ខេត្តកណ្តាល ដើម្បីចាត់ការបន្ត ៕

ផ្តល់សិទ្ធដោយ ដើមអម្ពិល