កំពត ៖ រថយន្តហាយឡែនឌ័រ បើកបុកម៉ូតូ សង់សេ១២៥ ជិះឌុបគ្នា៣នាក់ បណ្តាលឲ្យស្លាប់ប្តីភ្លាមៗ នៅកន្លែងកើតហេតុ ប្រពន្ធរបួសធ្ងន់ និងកូនស្រី អាយុ២ឆ្នាំ របួសស្រាល កាលពីវេលាម៉ោង ១៨និង៣០នាទី យប់ ថ្ងៃទី១៦ ខែមិថុនា ឆ្នាំ២០១៥ លើកំណាត់ផ្លូវ ជាតិលេខ៣៣ កំពត-កែប ស្ថិតក្នុង ភូមិត្រពាំងធំ ឃុំជុំគ្រៀល ស្រុកទឹកឈូ ខេត្តកំពត ។

មន្ត្រីនគរបាលចរាចរណ៍ បានឲ្យដឹងថា ជនរងគ្រោះជា ប្តីឈ្មោះ ជា សារិទ្ធ អាយុ៣៤ឆ្នាំ មុខរបរកសិករ ជាអ្នកបើកបរម៉ូតូ អ្នករួមដំណើរ ជាប្រពន្ធឈ្មោះ ហ៊ុន ចាន់ អាយុ៣៤ឆ្នាំ មុខរបរដូចគ្នា និងកូនស្រីឈ្មោះ ម៉ៅ សូល អាយុ២ឆ្នាំ ក្រុមគ្រួសារ រស់នៅភូមិ-ឃុំ កើតហេតុខាងលើ ដែលពួកគេ ជិះម៉ូតូម៉ាកសង់សេ ១២៥ សេរី២០០៨ ពណ៌ខ្មៅ ពាក់ស្លាកលេខ ក្រ-ព្រះសីហនុ 1B-2135។ រីឯរថយន្តបង្ក ម៉ាកហាយឡែនឌើរ ពណ៌ស គ្មានស្លាកលេខ ។

មន្ត្រីនគរបាលដដែល បន្តថា មុនកើតហេតុ រថយន្តបង្ក បានបើកបរក្នុង ទិសដៅពីលិច ទៅកើត ក្នុងល្បឿនលឿន លុះមកដល់ កន្លែងកើតហេតុ ក៏ជ្រុលទៅបុក កៀរនឹងម៉ូតូរងគ្រោះ ដែលបើកបរប្រកាន់ស្តាំ ក្នុងទិសបញ្ជ្រាសគ្នា ធ្វើឲ្យដួលបោក ទៅនឹងថ្នល់ជាតិ ធ្លាក់ដេករប៉ាយ បណ្តាលឲ្យ ជួបឧប្បតិហេតុ យ៉ាងអាណោចអាធម៌ បែបនេះតែម្តងទៅ ។ បន្ទាប់ពីរថយន្ត បង្កបុកកៀរ រួចហើយ អ្នកបើកបររថយន្ត ហាយឡែនឌ័រ បានចុះរត់គេចខ្លួនបាត់ ដោយបន្សល់ទុក តែរថយន្តនៅ កន្លែងកើតហេតុ។

ក្រោយកើតហេតុ សពជនរងគ្រោះ ត្រូវបានបងប្អូននៃសព មកដឹកយកទៅ តំកល់ទុកនៅផ្ទះ សម្រាប់ចាត់ចែង ធ្វើបុណ្យតាមប្រពៃណី រីឯប្រពន្ធ និងកូន ត្រូវបានគេបញ្ជូន ទៅសង្គ្រោះបន្ទាន់ នៅមន្ទីរពេទ្យបង្អែក ខេត្តកំពត ដោយឡែក ម៉ូតូរបស់ជនរងគ្រោះ និងរថយន្ត បង្កកម្លាំង នគរបាលចរាចរស្រុក នាំយកទៅ រក្សាទុកនៅឯអធិការដ្ឋាន នគរបាលស្រុក ទឹកឈូ ដើម្បីរង់ចាំធ្វើការ ដោះស្រាយទៅ តាមនីតិវិធីច្បាប់ ៕

ផ្តល់សិទ្ធដោយ ដើមអម្ពិល