រាជធានីភ្នំពេញ ៖ រថយន្តមួយគ្រឿង ម៉ាក RANGE ROVER ពណ៌ខ្មៅ ដែលគេអះអាងថា ទំនងជា អ្នកបើកបរស្រវឹង បានបើកឡើង ចិញ្ចើមផ្លូវ ទៅបុករះម៉ូតូនិង មនុស្សស្លាប់ម្នាក់ របួសធ្ងន់ ២នាក់ នៅលើទំនប់ទួលគោក។

ហេតុការណ៍នេះ បានកើតឡើង កាលពីវេលាម៉ោង២ និង៤៥នាទី ទៀបភ្លឺ ថ្ងៃទី១៥ មិថុនា ២០១៥ នៅចំណុច មុខផ្ទះ លេខ៦៥៤ ផ្លូវ៧០ (ទំនប់ទួលគោក) ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ។

ជនរងគ្រោះ ដែលស្លាប់ ត្រូវគេស្គាល់ឈ្មោះ ស្រី លីន ភេទស្រី អាយុ២៣ឆ្នាំ ស្នាក់នៅ ក្បែរកន្លែងកើតហេតុ។

ប្រភពពីកន្លែងកើតហេតុ បានឱ្យដឹងថា មុនពេលកើតហេតុ គេឃើញរថយន្ត ខាងលើ ធ្វើដំណើរ តាមផ្លូវលេខ៧០ ក្នុងទិសដៅ ពីកើតទៅលិច ក្នុងល្បឿនលឿន រេចុះឡើងពេញផ្លូវ ពេលដល់ចំណុច កើតហេតុ ស្រាប់តែជ្រុល ឡើងចិញ្ចើមផ្លូវ ស្តាំដៃបុករះ ម៉ូតូវីវ៉ា មួយគ្រឿង ហើយបុក មនុស្សស្លាប់ និងរបួស តែម្តង។

ក្រោយពេលកើតហេតុ រថយន្តបង្ក បានបើករត់គេច ទៅទិសខាងលិចបាត់។ តាមព័ត៌មាន បានឱ្យដឹងថា រថយន្តបង្ក ត្រូវបានសមត្ថកិច្ច ស្គាល់អត្តសញ្ញាណហើយ ហើយកំពុងស្រាវជ្រាវ តាមចាប់ខ្លួន អ្នកបើកបរ យកមកដោះស្រាយ តាមផ្លូវច្បាប់៕

ផ្តល់សិទ្ធដោយ កោះសន្តិភាព