ខេត្តរតនគិរី ៖ បុរសម្នាក់ដែលគេស្គាល់ ថាជាប្តីចុងបានវាយបុរសម្នាក់ ទៀតដែលជាប្តីដើមដោយ ដំបងរហូតបែកក្បាលរងបួសធ្ងន់ ហើយបានស្លាប់កាល ពីវេលាម៉ោង៤ និង៣០នាទីទៀបភ្លឺឈានចូលថ្ងៃទី១៤ ខែមិថុនា ឆ្នាំ២០១៥ នៅក្នុងមន្ទីរពេទ្យបង្អែកខេត្តរតនគិរី ។

សមត្ថកិច្ចបានអោយដឹងថា ហេតុការណ៍ឈ្លោះទាស់ទែងគ្នា នេះកើតឡើងតាំងពីវេលាម៉ោង៨ និង៣០នាទីយប់ ថ្ងៃទី១១ ខែមិថុនា ឆ្នាំ ២០១៥ ស្ថិតនៅផ្ទះជួលមួយ កន្លែងក្នុងភូមិជ័យជំនៈ សង្កាត់ឡាបានសៀក ក្រុងបានលុង ខេត្តរតនគិរី ។

ស្ត្រីម្នាក់ឈ្មោះប៊ុន វាសនា (ហៅពៅ) អាយុ៣៦ឆ្នាំ ជនជាតិខ្មែរ មុខរបរមិនពិតប្រាកដ ដែលគេស្គាល់ថាជាប្រពន្ធ របស់បុរសទាំង២នាក់បានឲ្យដឹងថា ជនរងគ្រោះជាប្តីដើម របស់គាត់មានឈ្មោះជា សំអូន (ហៅក្រឹម) អាយុ៤០ឆ្នាំ ជនជាតិខ្មែរ មុខរបរបើកឡាន បានរស់នៅជាមួយគ្នាក្នុងផ្ទះជួលមួយកន្លែង នៅភូមិឃុំខាងលើ រយៈពេល៤ឆ្នាំមកហើយ តែការរស់នៅនោះគ្មាន ការចុះសម្រុងនឹងគ្នាទេ ហើយក៏បាន ចែកផ្លូវគ្នាប្រហែលទៅ៣-៤ខែមកហើយ ប៉ុន្តែប្តីដើមរបស់គាត់ នៅតែចេញចូលម្តងម្កាលដែរ តែមិនដែលដេកនៅក្នុង បន្ទប់ជួលជាមួយគ្នានោះទេ លុះក្រោយមកគាត់ក៏បានទាក់ទង ជាមួយបុរសម្នាក់ទៀតមានឈ្មោះ ពៅ ប្រុស អាយុ៣៥ឆ្នាំ ជនជាតិខ្មែរមុខរបរ និងទីលំនៅមិនពិតប្រាកដ បានស្រលាញ់គ្នាប្រហែលមួយខែ ក៏កើតមានជម្លោះបែបនេះតែម្តង ។

ស្ត្រីជាប្រពន្ធបានអោយដឹងទៀតថា ជនរងគ្រោះបានស្លាប់បាត់បង់ជីវិត នៅក្នុងមន្ទីរបង្អែកខេត្តយ៉ាងអាណោច អាធម្មគ្មានសាច់ញាតិណា មក មើលទេ ហើយពេទ្យបង្អែកខេត្តក៏បានដឹកសព នោះយកមកទុកចោលនៅវត្តភូមិថ្មី ហើយក៏បានទាមទារលុយ ចំនួន៣០ម៉ឺនរៀលសំរាប់ការដឹកសព នោះមកទៀតផង ។ មិត្តភក្តិរបស់ជនរងគ្រោះ៤-៥នាក់បានរៃអង្គាស លុយគ្នាដើម្បីឲ្យលោកអាចារ្យ បូជាសពនោះតែម្តងទៅ ។

លោកស្រីជ័យ មាលា ចៅក្រមស៊ើបសួរសាលាដំបូង ខេត្តរតនគិរីបានប្រាប់តាមទូរស័ព្ទថា ជនរងគ្រោះមានស្ថានភាពស្រវឹង និងមានសារធាតុញៀនក្នុងខ្លួនផងនោះ ទើបលោកស្រីមិនបានចោទប្រកាន់ ទៅលើជនសង្ស័យនោះទេ ព្រោះជនសង្ស័យជាធម្មានុរូប ។

លោកស្រីបន្តថា ហេតុផលនៃការប្រើអំពើហិង្សានេះ ក៏ដោយសារជនរងគ្រោះបានទៅ រករឿងជនសង្ស័យដល់ផ្ទះ មូលហេតុគឺទៅយកកូនស្រីពីប្រពន្ធរបស់ខ្លួនទៅភ្នំពេញ ហើយប្រពន្ធក៏យល់ព្រមដែរ តែថាចាំស្អែកមកយកកូនស្រីចុះ ប៉ុន្តែជនរងគ្រោះមិនព្រម ក៏កើតទៅជាអំពើ ហឹង្សារហូតដល់ ស្លាប់បាត់បង់ជីវិតតែម្តងទៅ ។ លោកស្រីក៏ដាក់វិធានការ ស៊ើបសួរបន្តទៅទៀតដែរ ប្រសិនបើមានមូលដ្ឋាន ដើម្បីដាក់ទំងន់ ទោសទៅលើជនសង្ស័យ ។

លោកស្រីបានបញ្ជាក់ផងដែរថា ការដោះលែងជនសង្ស័យអោយនៅ ក្រៅឃុំបណ្តោះអាសន្ននេះ ដោយសារតែមាន ការដំកល់ប្រាក់មួយចំនួនសំរាប់ចាត់វិធានការ ទៅតាមនិតិវិធីច្បាប់ផងដែរ ៕

ផ្តល់សិទ្ធដោយ កោះសន្តិភាព