ទស្សនាទិដ្ឋភាពទន្លេ៥ពណ៌ដ៏ស្រស់ស្អាតបំផុតនៅលើពិភពលោក

ទស្សនាទិដ្ឋភាពទន្លេ៥ពណ៌ដ៏ស្រស់ស្អាតបំផុតនៅលើពិភពលោក

ដើម្បីជាការលំហែអារម្មណ៍នាចុងសប្ដាហ៍នេះ ទំព័រ Sabay ទស្សនាចរសូមបង្ហាញរមណីយដ្ឋានធម្មជាតិដ៏អស្ចារ្យមួយលើពិភពលោក មានឈ្មោះថាទន្លេប្រាំពណ៌ Caño Cristales ។ ទន្លេ Caño Cristales ស្ថិតក្នុងស្រុក Serrania de la Macarena ខេត្ត Meta នៃប្រទេសកូឡុំប៊ី។

ទន្លេនេះមានឈ្មោះក្រៅហៅថា “ទន្លេប្រាំពណ៌” ឬ”ទន្លេឥន្ទធនូ” ហើយក៏ត្រូវបានចាត់ទុកថាជាទន្លេដែលស្រស់ស្អាតបំផុតលើពិភពលោក។ សារាយចម្រុះពណ៌ Macarenia clavigera បានធ្វើឲ្យទឹកទន្លេនេះមើលទៅមានពណ៌ច្រើនចម្រុះគ្នាដូចជា លឿង បៃតង ខៀវ ខ្មៅ ជាពិសេសគឺពណ៌ក្រហមតែម្ដង។

ដោយសារ Caño Cristales ស្ថិតក្នុងតំបន់ដាច់ស្រយាល ភ្ញៀវទេសចរមិនអាចទៅទីនោះដោយប្រើយានជំនិះផ្លូវគោកឡើយ។ ប៉ុន្តែអ្នកទេសចរដែលចូលចិត្តការផ្សងព្រេងទាំងអស់អាចជិះយន្តហោះមកក្រុង La Macarena រួចធ្វើដំណើរមកកាន់ទន្លេនេះដោយជិះសេះ ឬជិះលា ឬដោយថ្មើរជើង។

រមណីយដ្ឋាននេះធ្លាប់បិទមិនឲ្យទេសចរចូលរយៈពេល ៣-៤ឆ្នាំដោយសារតែសកម្មភាពចោរព្រៃរួមទាំងការបារម្ភពីសុវត្ថិភាពទេសចរក្នុងពេលធ្វើដំណើរ។ ក្រោយមកនៅឆ្នាំ២០០៩ ទីនេះក៏បានបើកស្វាគមន៍ទេសចរវិញ ហើយបច្ចុប្បន្នក្រុមហ៊ុនទេសចរណ៍ជាច្រើននៅកូឡុំប៊ីបានបង្កើតសេវាកម្មជូនភ្ញៀវមកលេងដល់រមណីយដ្ឋាននេះតែម្ដង។ ភ្ញៀវទេសចរដែលមកកម្សាន្តនៅទីនេះគឺមិនអនុញ្ញាតឲ្យស្នាក់នៅពេលយប់ ឬចម្អិនម្ហូបនៅទីនេះឡើយ។

ទស្សនាទិដ្ឋភាពទន្លេប្រាំពណ៌តែម្ដង ថាតើស្រស់ស្អាត និងអស្ចារ្យកម្រិតណាទៅ?