ចិន៖ ថ្មីៗនេះ ក្រុម F4 ពិតជាកើតមាន រឿងរ៉ាវជាច្រើន ព្រោះព័ត៌មានទាក់ទងនឹង គូស្នេហ៍ថ្មី របស់លោក Ken Chu (ស៊ីមិន) មិនទាន់ស្ងប់ផង ស្រាប់តែមាន ព័ត៌មាន ថ្មីមួយទៀត នៃការបែកបាក់ស្នេហា របស់សមាជិកក្រុម F4 ម្នាក់ទៀតគឺ លោក Jerry Yan (តៅម៉ិញសឺ) ជាមួយតារា បង្ហាញ ម៉ូតតៃវ៉ាន់ ម្នាក់គឺ កញ្ញា Lin Chi-ling។

រូបភាពលោក Jerry Yan (តៅម៉ិញសឺ) កញ្ញា Lin Chi-ling

ប្រភពព័ត៌មាន បានឲ្យដឹងថា ជីវិតស្នេហា ដ៏អាថ៌កំបាំង របស់សមាជិកក្រុម F4 លោក Jerry Yan (តៅម៉ិញសឺ) ជាមួយកញ្ញា Lin Chi-ling ដែលបានរស់នៅ ក្រោមដំបូលតែមួយ ដូចជាប្តីប្រពន្ធ អស់រយៈពេលជាច្រើនឆ្នាំ ត្រូវបានបែកបាក់គ្នាហើយ។

គួររំលឹកផងដែរថា កាលពីឆ្នាំ ២០០៥ កញ្ញា Chi-Ling ធ្លាប់ជួបឧប្បត្តិហេតុ ធ្លាក់ពីលើខ្នងសេះ ហើយពេលនោះ លោក Jerry ក៏បានស្តីបន្ទោសនាង ថានាងមិនចេះ មើលថែខ្លួនឯង ដែលជាហេតុ ធ្វើអោយនាង មានការអន់ចិត្ត ជាខ្លាំង។ បន្ទាប់មកទៀត ស្នេហារបស់ពួកគេ ក៏មាន ការប្រែប្រួល កាន់តែខ្លាំងឡើង ដោយសារតែ ភ្លើងប្រច័ណ្ឌ របស់លោក Jerry ថានាង Chi-Ling មានទំនាក់ទំនង ស្នេហាជាមួយនឹង អ្នកជំនួញម្នាក់ ឈ្មោះ Qiu Shi Kai ដែលនេះជាហេតុមួយ ធ្វើឲ្យស្នេហារបស់ពួកគេ ឈានទៅដល់ ការបែកបាក់គ្នា យ៉ាងដូច្នេះ។


កញ្ញា Lin Chi-ling

គួរបញ្ជាក់ផងដែរថា សមាជិកដទៃទៀត នៃក្រុម F4 ដូចជាលោក Vanness Wu (ម៉ិញជូ) គឺជាសមាជិកដំបូង ដែលបានរៀបការ មុនគេ ជាមួយតារាស្រី សិង្ហបុរី នាង Arissa Cheo នៅក្នុងឆ្នាំ២០១៣។ ចំណងស្នេហ៍របស់ពួកគេ មានភាពស្អិតរមួត បើទោះបីជាពួកគេ ធ្លាប់ឈ្លោះគ្នា ជាច្រើនលើក ច្រើនសារក៏ដោយ។

មិនតែប៉ុណ្ណោះ សមាជិកម្នាក់ទៀត គឺលោក Vic Chou (គួចាលើយ) ធ្លាប់មានស្នេហា ជាមួយតារាស្រី ជាច្រើន ដូចជា នាង Beatrice Hsu និង នាង Barbie Hsu ប៉ុន្តែការទំនាក់ទំនង របស់ពួកគេ ត្រូវបានបញ្ចប់។ តែបច្ចុប្បន្ននេះ លោកកំពុងមានទំនាក់ទំនង ជាមួយនឹង តារាសម្តែង វ័យ២៧ឆ្នាំ នាង Reen Yu ហើយលោកក៏ ត្រៀមនឹងរៀបការ ជាមួយនាង ធ្វើជាគូអនាគត ផងដែរ។

ចំណែកឯសមាជិក មួយរូបទៀត របស់ក្រុម F4 គឺលោក Ken Chu (ស៊ីមិន) ដែលធ្លាប់មាន ព័ត៌មានជាច្រើន ជាមួយតារាស្រី ដូចជា នាង Li Bingbing នាង Mai Sato នាង Maggie Wu នាង Kelly Lin និងនាង Jiang Xinyu ថ្មីៗនេះ លោកបានបណ្តើរ គូស្នេហ៍ថ្មីស្ងាត់ៗ ក្នុងផ្សារទំនើប មួយកន្លែង ដែលគូស្នេហ៍ថ្មីរបស់លោក ត្រូវបានគេស្គាល់ថា គឺនាង Han Wen Wen៕

ប្រភព បរទេស

កែសម្រួលដោយ ឌី

ខ្មែរឡូត