ខេត្តពោធិ៍សាត់ ៖ គ្រោះថ្នាក់ចរាចរណ៍មួយ បានកើតឡើង នៅលើកំណាត់ផ្លូវ ជាតិលេខ៥ ត្រង់ភូមិអូរអាចម៍កុក ឃុំអូរសណ្ដាន់ ស្រុកក្រគរ កាលពីវេលា ម៉ោង៨យប់ ថ្ងៃទី៨ មិថុនា ដែលបង្កឡើង ដោយរថយន្តក្រុង បើកកៀរអ្នកជិះម៉ូតូឌុបគ្នា បណ្ដាលឲ្យ ស្លាប់ម្នាក់ និងរបួសធ្ងន់ ២នាក់ ដែលជនរងគ្រោះ ជាប្ដីប្រពន្ធ និងកូន ។

សមត្ថកិច្ចឲ្យដឹងថា ស្ត្រីជាប្រពន្ធ ដែលស្លាប់នេះ ឈ្មោះ មីន ចន្ថា អាយុ៤៤ឆ្នាំ រីឯបុរសជាប្តី រងរបួស ឈ្មោះ ឈឿន ផាន អាយុ៤៧ឆ្នាំ និងកូនប្រុសឈ្មោះ ឈឿន រក្សាអាយុ៥ឆ្នាំ រស់នៅភូមិមាត់ព្រៃ ឃុំកំពង់ពោរ ស្រុកក្រគរ ។ នៅយប់នោះ គ្រួសារជនរងគ្រោះ ជិះម៉ូតូម៉ាក សង់កូរ៉េ ព៌ណក្រហម គ្មានស្លាកលេខ ឌុបគ្នាចេញពីផ្ទះ ឆ្ពោះទៅកាន់ស្រុក ក្រគរ ក្នុងទិសដៅ ពីលិចទៅកើត ។ ខណះពេលកំពុង ធ្វើដំណើរ ទៅដល់ចំណុច កើតហេតុ ស្រាប់តែមាន រថយន្តក្រុង មួយគ្រឿង បើកយ៉ាងលឿន មកពីក្រោយ មិនដឹងជា មានបញ្ហាអ្វី ស្រាប់តែទៅកៀរ អ្នកជិះម៉ូតូនោះ ទាំងកំរោលបណ្ដាលឲ្យ ស្លាប់ និងរបួសធ្ងន់ បែបនេះ ។

ស្ត្រីជាប្រពន្ធ ត្រូវរថយន្តកិនស្លាប់ភ្លាមៗ នៅនឹងកន្លែង កើតហេតុ ចំណែកបុរសជាប្ដី និងកូនប្រុស បោកក្បាល នឹងថ្នល់របួសធ្ងន់ ។ ឃើញហេតុការណ៍ បែបនេះ អ្នកបើកបររថយន្តក្រុង មិនស្គាល់ឈ្មោះ បានរត់គេចខ្លួន បាត់ស្រមោល ។

រថយន្តក្រុងពណ៌ស លាយខៀវ ពាក់ស្លាកលេខ ភ្នំពេញ 3C-9691 សមត្ថកិច្ចបានយកមករក្សាទុក នៅស្នងការដ្ឋាន នគរបាលខេត្ត ដើម្បីដោះស្រាយ ទៅតាមច្បាប់ ចរាចរណ៍ផ្លូវគោក ។ ចំណែកជនរងគ្រោះ ត្រូវបានគេបញ្ជូន ទៅព្យាបាល នៅមន្ទីរពេទ្យបង្អែក ខេត្ត ៕

ផ្តល់សិទ្ធដោយ កោះសន្តិភាព