ខេត្តស្វាយរៀង ៖ ចោរស្រីវយ័៣៥ឆ្នាំម្នាក់ ចូលលួចគាស់កេស ដាក់មាសប្រាក់របស់ អ្នកភូមិជាមួយគ្នា ត្រូវសមត្ថកិច្ចនគរបាល ស្រុកស្វាយជ្រំចាប់ខ្លួនពី បទលួចទ្រព្យសម្បត្តិអ្នកដទៃ។ ករណីនេះកើតឡើងកាលពីវេលាម៉ោង៨ព្រឹក ថ្ងៃទី៧ មិថុនា ២០១៥ នៅភូមិដូនលែប ឃុំគោកព្រីង ស្រុកស្វាយជ្រំ។បើតាមមន្ត្រីនគរបាល ស្រុកស្វាយជ្រំបានឲ្យដឹងថា ជនសង្ស័យឈ្មោះសុខ ឡាក់ ភេទស្រី អាយុ៣៥ឆ្នាំ មានទីលំនៅក្នុងភូមិ កើតហេតុខាង លើ បានធ្វើសកម្មភាពលបលួច ចូលគាស់ទូយកកេសដាក់មាសប្រាក់ របស់ជនរងគ្រោះឈ្មោះសំ ឡេង ភេទស្រី អាយុ៥១ឆ្នាំ ជាអាជីវករ លក់ដូរនៅភូមិដូនលែបជាមួយគ្នា យកបានប្រាក់ខ្មែរ១លានរៀល ប្រាក់ដុល្លារ១៤៩ដុល្លារ មាស១តម្លឹង៦ជី១ហ៊ុន រួចយកទៅលាក់ទុកក្នុងសសរផ្ទះ ប៉ុន្តែព្រះមិនជួយត្រូវម្ចាស់ គេទាន់ស្រែកឆោឡោ និងប្តឹងនគរបាលឲ្យចាប់ខ្លួន និងដកហូតបានប្រាក់ មកវិញគ្រប់ចំនួន។ប្រភពដដែលបន្តទៀតថា នៅព្រឹកថ្ងៃកើតហេតុស្ត្រីរងគ្រោះបានទៅ លក់អីវ៉ាន់ចាប់ហួយនៅតូបខាងមុខផ្ទះ កូនៗទៅរៀនអស់ ឃើញឱកាសល្អជនសង្ស័យក៏ លបចូលពួនសម្ងំក្នុង ផ្ទះជនរងគ្រោះ រួចបានធ្វើសកម្មភាពគាស់ ទូរើសម្លៀកបំពាក់រកកេស ដាក់មាសប្រាក់មកគាស់យក ហើយបានយកទៅលាក់ ទុកក្នុងសសរផ្ទះ(សសរឬស្សី) របស់ជនរងគ្រោះដើម្បី រកឱកាសយកចេញ ។ពេលជនសង្ស័យកំពុងធ្វើសកម្មភាព វះសសរធ្វើឱ្យឮស្នូរក្តុងក្តាំង ស្ត្រីរងគ្រោះបានដើរទៅអើត មើលស្រាប់តែឃើញ ជនសង្ស័យឈរក្បែរវាំងននក៏ឡើងទៅមើលឃើញ ជនសង្ស័យយកមាសប្រាក់ដាក់ ក្នុងសសរក៏ឆោឡោ និងស្រែកឲ្យអ្នកជិតខាងមកជួយ រួចប្តឹងសមត្ថកិច្ច នគបាលប៉ុស្តិ៍រដ្ឋបាល ឃុំគោកព្រីងមកជួយអន្តរាគមន៍ និងចាប់ឃាត់ខ្លួន បានភ្លាមៗតែម្តង៕ផ្តល់សិទ្ធដោយ កោះសន្តិភាព