ក្រុងប៉ោយប៉ែត៖ តាមប្រភពព័ត៌មានពីមន្ត្រី មានសមត្ថកិច្ចក្រុងប៉ោយប៉ែតបានឱ្យដឹងថា កាលពីវេលាម៉ោង៩ និង១៥នាទីយប់ថ្ងៃទី១ មិថុនា ២០១៥ មានករណីគ្រោះថ្នាក់ចរាចរណ៍មួយបង្ក ឡើងដោយបុរសម្នាក់ឈ្មោះ តាំង ហាក់ឡេង ជាមន្ត្រីសុខាភិបាលនៃ មន្ទីរពេទ្យបង្អែកប៉ោយប៉ែត2(ដីថ្មី) ក្រុងប៉ោយប៉ែត បានបើករថយន្ត ម៉ាកហាយឡិនឌ័រ មួយគ្រឿងទាំងស្រវឹកធ្លាក់ភ្នែក បុករះរបងផ្ទះពលរដ្ឋមួយកន្លែង នៅចំណុចខាងត្បូងសាលាវិទ្យាល័យ2ជាន់ ស្ថិតក្នុងភូមិបាលិលេយ្យ សង្កាត់ និងក្រុងប៉ោយប៉ែត បណ្តាលឱ្យរងរបួសធ្ងន់ខ្លួនឯង ។

ប្រភពបានបន្តថា បុរសជាមន្ត្រីសុខាភិបាលឈ្មោះ តាំង ហាក់ឡេង មានអាយុប្រមាណជាង40ឆ្នាំ ដែលបង្កគ្រោះថ្នាក់ចរាចរណ៍ នោះមុនពេលកើតហេតុ គឺរូបគាត់បានចូលរួម ក្នុងកម្មវិធីជប់លៀង ថ្ងៃបុណ្យទិវាកុមារពិភពលោក នៅក្នុងបរិវេណមន្ទីរពេទ្យ បង្អែកខាងលើ តាំងពីព្រលប់រហូតមក ។

បន្ទាប់ចប់កម្មវិធី បុរសរូបនោះបានបើករថយន្ត របស់ខ្លួនម៉ាកហាយឡិនឌ័រ ពណ៌ស្ករ ពាក់ស្លាកលេខ 2A 5013 មួយគ្រឿងក្នុងល្បឿន លឿនដូចហោះ ពីកើតទៅលិច តាមបណ្តោយផ្លូវលំ ក្នុងគោលបំណងទៅផ្ទះ លុះមកដល់ចំណុចកើតហេតុ ដែលជាកន្លែងផ្លូវកោង ទំនងប្រហែលជាបើកបរល្បឿនលឿន ពេកបួងចង្កូតមិនទាន់ ក៏បុករះតូបជាងជួលជុលម៉ូតូ មួយកន្លែងធ្វើអំពីឈើ មានដំបូលប្រក់សង័្កសីខ្ទេច ហើយក៏បង្ហួសមក បុករបងដែកផ្ទះរបស់ពលរដ្ឋ ថែមមួយទៀតទើបរថយន្ត នោះជាប់គាំងទៅមុខលែងរួច ៕

ផ្តល់សិទ្ធដោយ កោះសន្តិភាព