បន្ទាយមានជ័យៈ លោកយាយវ័យ ជាង៦០ឆ្នាំ ម្នាក់បានដឹកដៃ ចៅស្រីឆ្លងផ្លូវ ត្រូវរថយន្ត លុច្សស៊ីស៤៧០បុក ពេញទំហឹងអូស ជាង១០០ម៉ែត្រ បណ្តាលឲ្យ ដាច់ជាបំណែកៗ ស្លាប់យ៉ាង អាណោចអធម ក្នុងថ្លុកឈាម ចំណែក រថយន្តធ្លាក់ទៅ ក្នុងប្រឡាយ ទៅមុខលែងរួច ។

ហេតុការណ៍ដ៏រន្ធត់នេះ បានកើតឡើង កាលពីវេលាម៉ោង ៧និង៤០នាទី ព្រឹកថ្ងៃទី០១ ខែមិថុនា ឆ្នាំ២០១៥ នៅលើកំណាត់ ផ្លូវជាតិលេខ៥ ត្រង់ចំណុច ភូមិវត្តថ្មីឃុំភ្នំតូច ស្រុកមង្គលបូរី ខេត្តបន្ទាយមានជ័យ។ អ្នកឃើញហេតុការណ៍ បាននិយាយថា រថយន្តលុចស៊ីស ៤៧០ បើកលឿនដូចហោះ ពីជើងទៅត្បូង ហើយ ក៏មកបុក លោកយាយ ដែលកំពុងដឹកដៃចៅ ដើរឆ្លងផ្លូវពេញ ទំហឹង រួចអូសជាង ១០០ម៉ែត្រ រហូតរថយន្ត ធ្លាក់ប្រឡាយទើបឈប់ ។

ប្រភពដដែលបានបង្ហើប អោយដឹងថា អ្នកបើកត្រូវបានឃាត់ខ្លួន ដោយមន្ត្រីនគរបាល ស្រុកមង្គលបូរី ខណៈដែលរថយន្ត កំពុងស្ថិតនៅ ក្នុងប្រឡាយ ។ មន្ត្រីនគរបាលម្នាក់ បានលួចខ្សឹបប្រាប់ថា អ្នកបើកបរមានឈ្មោះ ប៊ុន រតនា ភេទប្រុស អាយុ៣១ឆ្នាំ រស់ នៅឃុំ រការ ស្រុកក្រូចឆ្មារ ខេត្តកំពង់ចាម មានតួនាទី ជានាយនគរបាល ជិះរថយន្តលុច្សស៊ីស ៤៧០ ពណ៌ខ្មៅ ពាក់ស្លាកលេខ ភ្នំពេញ 2L-7689 ។

ជនគ្រោះជាយាយនិង ចៅត្រូវបានប្រជាពលរដ្ឋ នៅកន្លែងកើតហេតុ ប្រាប់ឲ្យដឹងថា មានឈ្មោះ ហម ឡាប ភេទស្រី អាយុ៦៧ឆ្នាំ ជាយាយ រស់នៅក្នុងភូមិ កើតហេតុ និងចៅស្រី ឈ្មោះ សាល នីតាអាយុ៥ឆ្នាំ។ ប្រជាពលរដ្ឋបានសំណូមពរ ឲ្យតុលាការ ធ្វើការដាក់ទោស ឲ្យធ្ងន់ធ្ងរ ដល់អ្នកបើកបរដែល បើកលឿន ហួសល្បឿនកំណត់ នៅចំណុចទីប្រជុំជន បុកហើយអូសជាង ១០០ម៉ែត្រ ទំនងព្យាយាមរត់ ៕

ផ្តល់សិទ្ធដោយ ដើមអម្ពិល