កំពង់ចាម ៖ ស្នងការនគរបាល ខេត្តកំពង់ចាម លោកឧត្តមសេនីយ៍ បែន រ័ត្ន បានធ្វើការអំពាវនាវ ជាបន្ទាន់មួយ ទៅកាន់កម្លាំងសមត្ថកិច្ច ពាក់ព័ន្ធ នៅតាមបណ្តាខេត្ត ជាពិសេស ខេត្ត សៀមរាប និងខេត្តបន្ទាយមានជ័យ ឲ្យជួយស្រាវជ្រាវ និងតាមចាប់ខ្លួន ជនសង្ស័យ មិនស្គាល់ អត្តសញ្ញាណ ដែលបាន និងកំពុងនាំខ្លួន យុវតី និងក្មេងស្រី២នាក់ យកទៅលក់ នៅប្រទេសថៃ ។

លោកឧត្តមសេនីយ៍ ស្នងការខេត្តកំពង់ចាម បានបញ្ជាក់ថា « យោងពាក្យបណ្តឹង របស់ឈ្មោះ សាត ព្រន ភេទប្រុស អាយុ៤៥ឆ្នាំ និងឈ្មោះ សាត ផាត ភេទស្រី អាយុ៤១ឆ្នាំ មានទីលំនៅ ភូមិខ្ពបលើ ឃុំស្តៅ ស្រុកកងមាស បានប្តឹងចោទប្រកាន់ទៅលើ ជនមិនស្គាល់ អត្តសញ្ញាណ បានបោកនាំកូនស្រី របស់ពួកគាត់ ទាំងពីរនាក់យក ទៅលក់នៅប្រទេសថៃ»។

បើតាមលោក ឧត្តមសេនីយ៍ស្នងការ យុវតីរងគ្រោះទី១មាន ឈ្មោះ ព្រន ធារី អាយុ១៨ឆ្នាំ និងទី២ឈ្មោះ ធឿន សុជាតិ អាយុ១៥ឆ្នាំ ។

លោកស្នងការបានបន្តទៀតថា កាលពីវេលា ម៉ោង៨ព្រឹកថ្ងៃទី៣០ ខែឧសភា ឆ្នាំ២០១៥ កូនស្រី របស់ពួកគាត់ទាំងពីរនាក់ បាននាំគ្នា ទៅរកការងារ ធ្វើនៅភ្នំពេញស្រាប់តែ វេលាម៉ោង៣ រសៀលថ្ងៃទី១ ខែមិថុនា ឆ្នាំ២០១៥នេះ យុវតីរងគ្រោះ ព្រន ធារី បានទូរស័ព្ទ មកប្រាប់ថា មានគេនាំ ពួកគេទាំងពីរនាក់ មកដល់ ខេត្តសៀមរាប កាលពីយប់មិញ ហើយគេនឹងបញ្ជូន ទៅប្រទេសថៃយប់ថ្ងៃទី១ ខែមិថុនា ឆ្នាំ២០១៥នេះ៕

ផ្តល់សិទ្ធដោយ ដើមអម្ពិល