ខេត្តកំពង់ធំ ៖ បុរសចំណាស់ម្នាក់បានស្លាប់ភ្លាមៗ បន្ទាប់ពីកូនប្រុសបង្កើតកាប់ចំក្បាលចំនួន៣កំបិតខ្វែវ ក្រោយមាន ជម្លោះក្នុងគ្រួសារ កាលពី យប់ថ្ងៃទី៣១ ឧសភា ២០១៥ នៅចំណុច ចំការដំឡូង ជិតភូមិសំអោង ឃុំមានរិទ្ធ ស្រុកសណ្ដាន់ ។

ពាក់ព័ន្ធករណីឃាតកម្មខាងលើ សមត្ថកិច្ចមូលដ្ឋានបានឲ្យដឹងថា ជនរងគ្រោះឈ្មោះ យឹម គឹម អាយុ៤៩ឆ្នាំ បានស្លាប់ ភ្លាមៗ បន្ទាប់ពីកូនប្រុសបង្កើតឈ្មោះ យឹម សុធា អាយុ៣០ឆ្នាំ កាប់ចំនួន ៣ខ្វែវ ចំកញ្ចឹងក ផ្នែកក្រោយ បន្ទាប់ពី មានជំលោះ ក្នុងវង់ផឹក ស៊ីជាមួយឳពុក កូន រួចមក ។

សាក្សីនៅជិតកន្លែងកើតហេតុបានឲ្យសមត្ថកិច្ចដឹងថា គ្រួសារជនរងគ្រោះបាននាំគ្នាមក ស៊ីឈ្នួលដាំ ដំឡូងមីនៅ ជិតភូមិសំអោង។ ជារៀងរាល់ថ្ងៃគ្រួសារនេះ មិនថា ប្រពន្ធ ប្ដី ឬកូនៗ តែងនាំគ្នាផឹកស្រា ក្រោយ ពេលស្រវឹង គឺបង្កជំលោះនឹងគ្នាមិនដែលខាន។

ជាក់ស្ដែងថ្ងៃកើតហេតុ ក្រោយផឹកស្រារួច ឳពុកបានយកខ្វែវដេញកាប់កូន លុះទំលាក់ខ្វែវចុះ កូនរត់មករើស កាប់សំលាប់ ឳពុកចំនួន ៣ខ្វែវបណ្ដាល ឲ្យស្លាប់តែម្ដង។ ក្រោយកើតហេតុ កូនតិរច្ឆាន បានរត់គេចខ្លួនបាត់ ៕

ផ្តល់សិទ្ធដោយ កោះសន្តិភាព