ខេត្តកណ្តាល ៖ នគរបាលក្រុងតាខ្មៅ បានចាប់ខ្លួនបុរស២នាក់ បងប្អូនបង្កើត បន្ទាប់ពីពួកគេ ប្រដាប់ដោយពូថៅ និងដែកបំពង់ទីបបាននាំគ្នាស្ទាក់ផ្លូវព្រួតគ្នា វាយបុរសជាបងថ្លៃបណ្តាល ឱ្យរបួសធ្ងន់ កាលពីវេលាម៉ោង៩ និង៣០នាទីយប់ ថ្ងៃទី៣០ ឧសភា នៅចំណុចក្បែរគល់ស្ពានក្រពើហា ស្ថិតក្នុងភូមិស្ទឹងជ្រៅ សង្កាត់ដើមមៀន ក្រុងតាខ្មៅ។

មន្ត្រីនគរបាល ព្រហ្មទណ្ឌក្រុងតាខ្មៅ បានឱ្យដឹងថា ជនសង្ស័យដែលត្រូវ ចាប់ខ្លួនឈ្មោះប៉ុល ចាន់ដេត ភេទប្រុស អាយុ៤៤ឆ្នាំ និងម្នាក់ទៀតឈ្មោះប៉ុល កែវ ភេទប្រុស អាយុ៣៧ឆ្នាំ អ្នកទាំង២ជាបងប្អូនបង្កើតគ្នា មានទីលំនៅភូមិស្ទឹងជ្រៅ សង្កាត់ដើមមៀន ក្រុងតាខ្មៅ ។

រីឯជនរងគ្រោះ ឈ្មោះឃុត សុខា ភេទប្រុស អាយុ៥១ឆ្នាំ ត្រូវជាបងថ្លៃ ជនសង្ស័យខាងលើ រស់នៅភូមិសង្កាត់ជាមួយគ្នា។ ជនរងគ្រោះត្រូវបានក្រុមគ្រួសារបញ្ជូន ទៅព្យាបាលនៅមន្ទីរពេទ្យ ជ័យជំនះក្រុងតាខ្មៅ ។ ជនរងគ្រោះបានប្រាប់ឱ្យដឹងថា មូលហេតុដែល ជនសង្ស័យព្រួតវាយរូបគាត់ គាត់សង្ស័យដោយសារ រឿងគំនុំចាស់៕

ផ្តល់សិទ្ធដោយ កោះសន្តិភាព