កេនយ៉ា៖ មេធារី ជនជាតិ កេនយ៉ាម្នាក់ មានបំណង ចង់ស្តីដណ្តឹង កូនស្រី របស់លោក ប្រធានាធិបតីអាមេរិក បារ៉ាក់ អូបាម៉ា ដោយផ្តល់ជំនូនជា ហ្វូង សត្វគោ ចៀម និងពពែ។ លោកមេធាវីឈ្មោះ Felix Kiprono រូបនោះ បានប្រាប់ថា គាត់បានចាប់អារម្មណ៍លើ នាង Malia កូនស្រីលោកអូបាម៉ា លើកដំបូង នៅក្នុងឆ្នាំ ២០០៨ ហើយចាប់ផ្តើម មានចិត្តលើនាង តាំងពីពេលនោះរហូតមក។

មេធាវី រូបនេះ អះអាងថាខ្លួននឹងផ្តល់ជំនូន គោចំនួន ៥០ក្បាល ចៀម៧០ក្បាល និងពពែចំនួន ៣០ ក្បាល បើសិនជាលោក អូបាម៉ា ឲ្យភ្លើងខៀវលើមង្គលការ របស់គាត់។ និយាយទៅកាន់ សារព័ត៌មាន Nairobian គាត់បាននិយាយថា៖ “ខ្ញុំបានពិភាក្សា ជាមួយក្រុមគ្រួសារ របស់ខ្ញុំ រួចរាល់ហើយ ហើយពួកគេ ក៏នឹងជួយខ្ញុំ ចំពោះរឿងនេះដែរ” ។

លោក Kiprono បានសរសេរសំបុត្រមួយ ឲ្យទៅស្ថានទូតអាមេរិក ប្រចាំប្រទេសកេនយ៉ា ដើម្បីឲ្យខាងស្ថានទូត ប្រគល់ បន្តទៅដល់លោកប្រធានាធិបតីអាមេរិក។ នៅក្នុងសំបុត្រនោះ មានបញ្ជាក់ពីការ ស្នើសុំឲ្យនាង Malia មកទស្សនកិច្ច ប្រទេសកេនយ៉ា ជាមួយលោក អូបាម៉ា នៅឱកាសក្រោយផងដែរ។

លោកមេធាវី បន្តប្រាប់សារព័ត៌មានទៀតថា ខ្លួនមិនបានសម្លឹងឃើញ លុយលោក អូបាម៉ានោះទេ គឺក្តីស្រលាញ់របស់គាត់ គឺជាស្នេហ៍ពិត ហើយពួកគេ នឹងរស់នៅ ជាមួយគ្នា ជាប្តីប្រពន្ធ ក្នុងជីវិតដ៏សាមញ្ញ។ លោកសន្យាថានឹង បង្រៀននាង Malia ពីរបៀបច្របាច់យក ទឹកដោះ ពីសត្វគោ ការចំអិនអាហារ និងការងារផ្ទះទូទៅ ដូចស្ត្រីនានា ក្នុងប្រទេសកេនយ៉ា៕

លោកមេធារី  Felix Kiprono និង នាង Malia


លោកប្រធានាធិបតីអូបាម៉ា និងកូនស្រីទាំង២របស់គាត់

ប្រភព៖ បរទេស

ដោយ៖ រ័ត្ន

ខ្មែរឡូត