Sullivan Eav មានស្នាមសាក់ អង្គរវត្ត និង ពាក្យយុវជនខ្មែរ លើខ្នង

Sullivan Eav មានស្នាមសាក់ អង្គរវត្ត និង ពាក្យយុវជនខ្មែរ លើខ្នង

តារាសម្ដែងកូនខ្មែរកាត់អ៊ីតាលី លោក Sullivan Eav បានបង្ហាញស្នាមសាក់នៅលើខ្នងមួយគូរឲ្យចាប់អារម្មណ៍ ដោយលោកបានសាក់រូបអង្គរវត្ត និង ពាក្យយុវជនខ្មែរ ព្រមទាំងមានពាក្យជាជាភាសាបាលី មួយចំនួនទៀត។

ស្នាមសាក់នេះត្រូវបានតារាសម្ដែងកូនកាត់រូបនេះបង្ហោះលើ Facebook របស់ខ្លួន កាលពីពេលថ្មីនេះ ដោយថែមទាំងមានស្នាមកោសខ្យល់ថែមទៀតផង។ ក្នុងជំនួបជាមួយ Sabay តាមទូរស័ព្ទកាលពីពេលថ្មីៗនេះ លោក Sullivan Eav បានឲ្យដឹងថា លោកបានសាក់ រូបអង្គរវត្តលើខ្នង និងមានសរសេរពាក្យ យុវជនខ្មែរលើ កញ្ចឹងក ព្រមទាំងមានអក្សរបាលីសំស្ក្រឹតមួយចំនួនអមរូបប្រសាទ អង្គរវត្ត គឺលោកសាក់ជាង១០ ឆ្នាំមកហើយ។ លោកបានប្រាប់ថា លោកបានសាក់រូបនេះនៅហាងមួយក្នុងប្រទេសកម្ពុជា ដែលមានជាងឆ្លាក់ ជាខ្មែរកម្ពុជាក្រោម។

Sullivan បានបញ្ជាក់ថា ដើមហេតុដែលនាំឲ្យលោក សាក់រូបទាំងនេះក៏ព្រោះតែលោកស្រលាញ់ប្រទេសកម្ពុជា ហើយលោកគិតថា ប្រាសាទអង្គរវត្ត គឺជាអត្តសញ្ញាណសំគាល់ថា ខ្មែរ ទើបលោកសម្រេចសាក់រូបមួយនេះ។

លោកលើកឡើងថា តាំងតែពីលោកដឹងក្ដីមក ពេលប៉ាម៉ាក់របស់លោក នាំលោកមកលេងប្រទេសកម្ពុជាម្ដង លោកមិនចង់ទៅប្រទេសបារាំងវិញឡើយ ព្រោះអារម្មណ៍របស់លោក នឹក និងចង់រស់នៅប្រទេសកម្ពុជាខ្លាំងណាស់ បើទោះបីជាប្រទេសកម្ពុជា មានសេដ្ឋកិច្ច និង ស្ថានភាពរស់នៅ មិនប្រសើរដូចប្រទេសបារាំងយ៉ាងណាក្ដី។

តារាសម្ដែងកូនកាត់រូបនេះបានបន្តថា ដោយសារតែមានចិត្តចង់រស់នៅប្រទេសកម្ពុជាបែបនេះ ទើប នៅឆ្នាំ ២០១១ លោកបានសម្រេចមករស់នៅប្រទេសកម្ពុជាតែម្ដង ដោយលោកបានទិញផ្ទះមួយនៅតំបន់ទួលគោក បច្ចុប្បន្នលោកកំពុងរស់នៅជាមួយបងប្អូនជីដូនមួយ២នាក់ផ្សេងទៀត មកពីខេត្ត កំពត ដែលជាស្រុកកំណើតប៉ារបស់លោក។

ជាមួយនឹងការបោះជំហានចូលសិល្បៈ តារាសម្ដែងកូនខ្មែរកាត់អ៊ីតាលីរូបនេះ ចាប់ផ្ដើមមានមុខក្នុងការសម្ដែង ខារ៉ាអូខេ និងស្ប៉តពាណិជ្ជកម្ម ជាបន្តបន្ទាប់។ លោក ក៏ធ្លាប់ក្ដាប់បានតំណែងតួឯក ក្នុងខ្សែភាពយន្តមួយ ដែលមានឈ្មោះថា “ស្រមោលគ្រោះ” ផងដែរ។ អ្វីដែលជាការចាប់អារម្មណ៍ផងដែរនោះ ថ្មីៗនេះលោក Sullivan Eav បានលេចមុខក្នុង ស្ប៉តពាណិជ្ជកម្មធំៗជាច្រើន ដូចជា ស្ប៉ត មហាសង្ក្រាន្ត កាលពេលថ្មីនេះជាដើម។

ជាមួយនឹងស្នាមសាក់លើខ្នងនេះ លោក Sullivan Eav លោកមិនមានគម្រោងលុបវិញឡើយ លោកនឹងទុកជារៀងរហូត ព្រោះវា គឺជាការពេញចិត្តរបស់ខ្លួនលោកផ្ទាល់៕

ប្រភព Sabay

មុន បន្ទាប់

មតិយោបល់