រាជធានីភ្នំពេញ ៖ ជនសង្ស័យជាចោររលួចម៉ូតូ ម្នាក់ត្រូវបានក្រុមនិស្សិត និងកូនសិស្សលោក នាំគ្នាដេញចាប់បាន និងវាយឡើងទ្រមខ្លួន រួចចងទុកមួយយប់ លុះព្រឹកឡើងទើបប្រគល់ ទៅឱ្យប៉ូលិស ក្រោយពីរូបគេធ្វើសកម្មភាព លួចម៉ូតូម៉ាកនិច ពណ៌ស មួយគ្រឿង មិនបានសម្រេច ដោយម្ចាស់ គេទាន់។

ករណីចោរលួចម៉ូតូនេះ បានបង្កឱ្យមានការភ្ញាក់ផ្អើល កាលពីវេលាម៉ោង៣រំលង អធ្រាត្រឈាន ចូលថ្ងៃទី២៤ ឧសភា ២០១៥ នៅចំណុចកុដិ លេខ១២ ក្នុងវត្តបទុមវតី សង្កាត់ចតុមុខ ខណ្ឌដូនពេញ។

តាមប្រភពព័ត៌មានពី មន្ត្រីនគរបាលម្នាក់បាន ប្រាប់ឱ្យដឹងថា និស្សិតជនរងគ្រោះ ឈ្មោះធុច វ៉ាន់នីដា ភេទប្រុស អាយុ២៤ឆ្នាំ ដែលជាម្ចាស់ម៉ូតូម៉ាកនិច ពណ៌ស ពាក់ស្លាកលេខ ភ្នំពេញ 1CR-4596 ត្រូវបានជនសង្ស័យ ឈ្មោះលី សុខលីន អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុង ខណ្ឌពោធិ៍សែនជ័យ បានធ្វើសកម្មភាព លួចយកម៉ូតូមួយគ្រឿង ហើយអូសចេញពីកុដិ ក៏ត្រូវម្ចាស់ឃើញ ទាន់ស្រែកឆោឡោឡើង និងនាំគ្នាដេញ ចាប់បានភ្លាមៗតែម្តង។

ដោយសំអាងទៅលើ ពាក្យបណ្តឹងរបស់និស្សិតរងគ្រោះ និងសាក្សីគ្រប់គ្រាន់នោះ ក៏បានកសាងសំណុំរឿង ដើម្បីបញ្ជូនខ្លួនទៅកាន់ អធិការដ្ឋាន នគរបាលខណ្ឌដូនពេញ ជាបន្តទៅទៀត។