ខេត្តក្រចេះ៖ ជម្លោះដោយសារតែរឿង លួចមាន់គកមួយក្បាល បានក្លាយជាអំពើហិង្សារវាង ខ្មែរអ៊ិស្លាមពីរនាក់ បណ្តាលឲ្យជនម្នាក់រងរបួសធ្ងន់ ទទួលរងនូវការចាក់ប្រហារ ដោយផ្លែដែកឆាបពីជនម្នាក់ទៀត ហើយជនដៃដល់បាន រត់គេចខ្លួនបាត់ស្រមោល ។

មន្ត្រីនគរបាល ស្រុកឆ្លូងបានឲ្យដឹងថា អំពើហិង្សាដែលផ្តើមចេញ ពីជម្លោះដោយសារតែរឿងបាត់ មាន់គកនេះ បានកើតឡើងនៅយប់ថ្ងៃទី២៣ ឧសភា នៅក្នុងឃុំពង្ររ ស្រុកឆ្លូង ។ ជនរងគ្រោះឈ្មោះ កូប រ៉ន អាយុ២៧ឆ្នាំ មានទីលំនៅ នៅឃុំពង្ររ ស្រុកឆ្លូង រងរបួសធ្ងន់ ដោយត្រូវជនដៃដល់ប្រើផ្លែដែកឆាប ចាក់ត្រូវដងខ្លួនច្រើនកន្លែង និងបញ្ជូនមកសង្គ្រោះនៅ មន្ទីរពេទ្យបង្អែកឆ្លូង ។

មន្ត្រីនគរបាលបន្តថា ដោយសារតែជនដៃដល់ចោទជនរងគ្រោះ ថាបានលួចមាន់គក របស់ខ្លួនទៅមួល.កឱ្យងាប់យកទៅលក់ ។ ទើបបង្កទៅជាជម្លោះ និងឈានដល់ ការចាក់គ្នាបែបនេះ ។

លោកវរសេនីយ៏ត្រី ឌួង សុទ្ធី អធិការនគរបាលស្រុកឆ្លូង បញ្ជាក់ថា ជនដៃដល់ដែល កំពុងរត់គេចខ្លួននោះ នគរបាលបានកំណត់ អត្តសញ្ញាណ រួចហើយ និងស្រាវជ្រាវតាមរកចាប់ខ្លួន មកផ្តន្ទាទោសតាមច្បាប់ ៕