រាជធានីភ្នំពេញ ៖ យុវជនម្នាក់ បានរងរបួសស្រាល បន្ទាប់ពីរូបគេ ជិះម៉ូតូមួយគ្រឿង ម៉ាកឃ្លិក ក្នុងល្បឿនលឿន ជាប់ហ្គា ចាប់ហ្វ្រាំងមិនស៊ី ជ្រុលទៅបុក ផ្ទប់នឹងរថយន្តវីហ្គោ ដែលកំពុងបើកឆ្លង ទាំងកំរោល បណ្តាលឱ្យម៉ូតូ និងរថយន្ត កៀបចូលគ្នា រងការខូចខាត ទាំងសងខាង ។

ហេតុការណ៍នេះ បានកើតឡើង កាលពីវេលាម៉ោង១០ព្រឹក ថ្ងៃទី២៣ ឧសភា ២០១៥ នៅតាមបណ្តោយ ផ្លូវលេខ៣១៨ ទល់មុខនឹង ក្រុមហ៊ុនសន្តិសុខ យីហោ  IPS  Security Sevice co.LTD  ក្នុងសង្កាត់ ទួលស្វាយព្រៃទី១ ខណ្ឌចំការមន ។

ប្រភពពីសាក្សី នៅកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញបុរស វ័យ២០ឆ្នាំម្នាក់ ជិះម៉ូតូមួយគ្រឿង ម៉ាកឃ្លិក ស៊េរីឆ្នាំ២០១០ ពណ៌ខ្មៅ លាយលឿង ពាក់ស្លាកលេខ ភ្នំពេញ  1BQ-1503 ជិះតែម្នាក់ឯង ធ្វើដំណើរតាមបណ្តោយ ផ្លូវលេខ៣១៨ ក្នុងទិសដៅ ពីកើតទៅលិច ក្នុងល្បឿនយ៉ាងលឿន ។

លុះមកដល់ចំណុច កើតហេតុ មានរថយន្តមួយគ្រឿង ម៉ាកវីហ្គោ ពណ៌ស្ករ ពាក់ស្លាកលេខ ភ្នំពេញ  2T-5899 បើកបរដោយ បុរសម្នាក់ កំពុងបើកថយ ក្រោយចេញពីមុខផ្ទះ ធ្វើឱ្យម៉ូតូដែល កំពុងបើកលឿន ចាប់ហ្វ្រាំងមិនទាន់ ក៏ជ្រុលទៅបុក ទាំងកំរោលតែម្តង បណ្តាលឱ្យម៉ូតូ កៀបចូលក្រោម ផ្នែកខាងក្រោយ នៃរថយន្តរងការ ខូចខាតយ៉ាងដំណំ ចំណែកយុវជន ជាម្ចាស់ម៉ូតូ បានរងរបួសស្រាល ដោយសារលោតចុះ ពីលើម៉ូតូ ទាន់ពេល។

ចំណែកយុវជន ជាម្ចាស់ម៉ូតូវិញ បានឱ្យដឹងថា កាលដែលរូបគេ ជិះបុកទាំងកំរោល បែបនេះ គឺដោយសារ គេប្រញាប់ ទៅទិញអីវ៉ាន់ ហើយពេលបើក មកដល់ចំណុច កើតហេតុ រូបគេក៏បាន ឃើញរថយន្តបើកថយក្រោយ ពីចំងាយដែរ ប៉ុន្តែមិនដឹងថាយ៉ាងម៉េច ពេលនោះស្រាប់តែ ម៉ូតូរបស់គេជាប់ហ្គា ហើយហ្វ្រាំង ក៏ចាប់លែងស៊ីទៀត ទើបបណ្តាលឱ្យគេ បង្ខំចិត្តបើកបុក ទាំងកំរោល បែបនេះតែម្តងទៅ ។

ក្រោយ កើតហេតុភ្លាមៗនោះ សមត្ថកិច្ចមូលដ្ឋាន បានចុះអន្តរាគមន៍ ដល់កន្លែងកើតហេតុភ្លាមៗ និងធ្វើការសម្របសម្រួល ភាគីទាំងសងខាង ដោយឱ្យចរចា តម្លៃសំណង រវាងគ្នា និងគ្នា ។ ប៉ុន្តែយុវជនជាម្ចាស់ម៉ូតូ បានលើកម្រាមដៃ ១០សំពះ ទៅខាងម្ចាស់រថយន្ត ឱ្យយោគយល់ ដល់រូបគេផង ដោយសាររូបគេ ជាកូនអ្នកក្រីក្រ គ្មានលុយកាក់ ក្នុងខ្លួនទេ ហើយម៉ូតូដែលគេជិះ គឺទើបនឹងខ្ចីមិត្តភក្តិ មកដើម្បីទៅទិញអីវ៉ាន់ ។

ទោះជាយ៉ាងណា ម្ចាស់រថយន្ត នៅតែមិនសុខចិត្ត ក៏សម្រេចប្រគល់ឱ្យ សមត្ថកិច្ច ជំនាញធ្វើការវាស់វែង អូសយកទាំងម៉ូតូ និងរថយន្ត ទៅរក្សាទុក នៅអធិការដ្ឋាន នគរបាលខណ្ឌចំការមន តែម្តងទៅ៕