ខេត្តបន្ទាយមានជ័យ៖ ដើម្បីសុវត្ថិភាព ដល់សិស្សានុសិស្ស លោកឧត្តមសេនីយ៍ត្រី អាត់  ខែម ស្នងការនគរបាលខេត្ត តែងតែយកចិត្ត ទុកដាក់ ចំពោះបញ្ហាចរាចរណ៍ លោកបានដាក់ផែនការ ឱ្យនគរបាលចរាចរ គ្រប់ស្រុក/ក្រុង ត្រូវធ្វើចរាចរណ៍ ដល់សិស្សានុសិស្ស ពេលដែលពួកគាត់ ចេញពី សាលារៀន ត្រឡប់ទៅលំនៅឋានវិញ ។

ជាក់ស្តែង កាលពីរសៀល ថ្ងៃទី២២ ឧសភា បន្ទាប់ពីលោកស្នងការ នគរបាលខេត្ត បានបើកវេទិកា សាធារណៈផ្សព្វផ្សាយ ទាក់ទងទៅនឹង ច្បាប់ចរាចរណ៍ និងណែនាំដល់ក្មួយៗ សិស្សានុសិស្ស ពេលធ្វើដំណើរ ដោយថ្មើរជើង ជិះកង់ ឬម៉ូតូក្តី ត្រូវប្រុងប្រយ័ត្ន ពិសេសត្រូវពាក់មួក សុវត្ថិភាព ពេលជិះកង់ ឬម៉ូតូ ជានិច្ច ។

លោកស្នងការនគរបាលខេត្ត បានណែនាំ ដល់លោកគ្រូ អ្នកគ្រូ រកសិស្សចំនួន១៥នាក់ ដែលស្ម័គ្រចិត្ត ដើម្បីបំពាក់កន្សែងក្រហម សហការជាមួយ កម្លាំងនគរបាល ចរាចរ ធ្វើចរាចរណ៍ ពេលសិស្សចេញពី សាលារៀន ។

ដើម្បីឱ្យមានការចូលរួម ច្បាប់ចរាចរណ៍នេះ ទៀតសោត  លោក អាត់ ខែម បានយកធុងសាំង ដោយមានលាបថ្នាំ ពណ៌ក្រហម ស និងលឿង សរសេរអក្សរដាក់ ថា «សូមបន្ថយល្បឿន» ដាក់ក្បែរផ្លូវជាតិ ទាំងខាង ឆ្វេងនិងស្តាំផ្លូវ នៅមុខសាលារៀន ដើម្បីឲ្យអ្នកបើកបរ យានយន្តគ្រប់ប្រភេទ ពេលធ្វើដំណើរ មកដល់មុខសាលារៀន ត្រូវបង្អង់ល្បឿន ចៀសវាង គ្រោះថ្នាក់ដល់សិស្សានុសិស្ស ពេលពួកគាត់ ចេញពីសាលារៀនផងដែរ  ៕

តាមផែនការ ការដាក់ធុងសាំងនេះ គឺឲ្យតែសាលារៀន ដែលនៅតាមបណ្តោយផ្លូវ ជាតិលេខ៥និងលេខ៦ គឺត្រូវដាក់ទាំងអស់ ៕