ចិន៖ គ្រោះថ្នាក់ដែល មិនគួរនឹង កើតឡើងមួយ តែវាបានកើតឡើង ទៅហើយ បន្ទាប់ពីមាន នារីជាអ្នកដំណើរ ថ្មើរជើងម្នាក់ ត្រូវបានឡាន ដឹកទំនិញធុនធំ ២គ្រឿងបុក និងកិន បណ្តាលឲ្យស្លាប់ភ្លាមៗ ក៏ព្រោះតែនាង ជាប់រវល់ ចុចទូរស័ព្ទដៃ ក្នុងអំឡុងពេល ឆ្លងផ្លូវ។

យោងតាមប្រភព ព័ត៌មានបាន ឲ្យដឹងថា ហេតុការណ៍គ្រោះថ្នាក់ ចរាចរណ៍មួយនេះ កើតឡើង នៅលើផ្លូវមួយ នៃទីក្រុង ចុងសាន ខេត្តក្វាងទុង របស់ប្រទេស ចិន ដោយមាន នារីជាជនរងគ្រោះ ម្នាក់មិនទាន់ ស្គាល់អត្តសញ្ញាណ បានដើរឆ្លងផ្លូវ បែកជាបួន តែនាងមិនបាន មើលផ្លូវទេ គឺរវល់តែ អោនមើល និងចុចទូរស័ព្ទ ដោយមិនបាន ចាប់អារម្មណ៍ថា មានឡានដឹកទំនិញ ដ៏ធំមួយកំពុង បើកសំដៅមក រកនាងនោះឡើយ។

ទិដ្ឋភាពនៃ គ្រោះថ្នាក់នេះ ក៏ត្រូវបានថត ជាប់ដោយកាមេរ៉ា សុវត្ថិភាព ដោយបង្ហាញថា បន្ទាប់ពី នាងដើរឆ្លងផ្លូវ ដោយមិនបាន មើលឆ្វេងស្តាំ ព្រោះតែកំពុង ចុចទូរស័ព្ទនោះ ទើបបណ្តាលឲ្យ ឡានដឹកទំនិញ ពណ៌ស មួយគ្រឿង បើកមកបុក នាងពេញទំហឹង បណ្តាលឲ្យនាង ខ្ទាតទៅផ្លូវ ម្ខាងទៀត ស្របពេលនោះ ក៏មានរថយន្ត ដឹកទំនិញ ពណ៌លឿង មួយគ្រឿងទៀត ដែលមាន ទិសដៅផ្ទុយគ្នា ក៏បើកមកដល់ល្មម រួចក៏កិននារី រងគ្រោះបណ្តាល ឲ្យស្លាប់ភ្លាមៗ តែម្តង។

សាក្សីដែល បានឃើញហេតុការណ៍ នេះផ្ទាល់ បាននិយាយថា “គ្រោះថ្នាក់នេះ ពិតជារហ័ស និងគួរឲ្យ ខ្លាចពេកហើយ”។

គួរបញ្ជាក់ផងដែរថា នេះគឺជា ករណី ក៏ដូចជា ការដាស់តឿន ជាថ្មីទៀតហើយ ទៅដល់អ្នក ដែលងប់ងុល នឹងការចុចទូរស័ព្ទ ជាពិសេសគឺ ការចុចទូរស័ព្ទ ក្នុងអំឡុងពេល ធ្វើដំណើរតាម ដងផ្លូវសាធារណៈ តែម្តង ដែលនេះគឺជា ទង្វើមិនត្រឹមត្រូវមួយ ព្រោះថាវាអាច នាំឲ្យមាន គ្រោះថ្នាក់ណាមួយ ដល់យើងនិង អ្នកដទៃភ្លាមៗ ដែលនឹកស្មាន មិនដល់៕

សាកសពរបស់ នារីរងគ្រោះ

ប្រភព៖ Shanghaiist

ដោយ៖ សុជាតិ

ខ្មែរឡូត