កណ្តាល៖ ដោយទទួលព័ត៌មាន ពីប្រជាពលរដ្ឋ ថាមានក្រុមញៀនល្បែង ជល់មាន់មួយក្រុម កំពុងតែលេង ល្បែងស៊ីសង ប្រភេទល្បែង ប្រជល់មាន់ ទើបលោកនាយ ប៉ុស្តិ៍ត្រើយស្លា បានដឹកនាំកម្លាំង មួយចំនួន ឆ្មក់ចូលបង្ក្រាប ឃាត់ខ្លួនជនសង្ស័យ បាន៤នាក់ រួមទាំងវត្ថុតាង មួយចំនួនផងដែរ ហេតុការណ៍នេះ ធ្វើឡើងកាលពីម៉ោង ១០និង១០នាទី ថ្ងៃទី២៧ ខែឧសភា ឆ្នាំ២០១៥ នៅចំណុច ក្រោមដើមស្វាយ ដីចំការមួយកន្លែង ចម្ងាយប្រហែល ១០០០ម៉ែត្រ ក្នុងភូមិថ្កុល ឃុំត្រើយស្លា ស្រុកស្អាង ខេត្តកណ្តាល។

នគរបាលបានឲ្យដឹងថា ជនសង្ស័យដែល ឃាត់បាន ទី១-ឈ្មោះ ហៀក បូរ៉ា (ប៉ុក) ភេទប្រុស អាយុ២១ឆ្នាំ មុខរបរ មិនពិតប្រាកដ ទី២-ឈ្មោះ ស្រ៊ុន បាក់ឡេង ភេទប្រុស អាយុ១៥ឆ្នាំ មុខរបរកសិករ ទី៣-ឈ្មោះ អាន តួ ភេទប្រុស អាយុ ២០ឆ្នាំ មុខរបរកសិករ និងទី៤-ឈ្មោះ អាន ចិន ភេទប្រុស អាយុ ១៧ ឆ្នាំ មុខរបរជាសិស្ស អ្នកទាំង៤ រស់នៅភូមិ ព្រែកតាឯក ឃុំត្រើយស្លា ស្រុកស្អាង ខេត្តកណ្តាល។

នគរបាលបានបន្តថា មុនពេលកើតហេតុ ដោយមានប្រជាពលរដ្ឋ នៅក្នុងមូលដ្ឋាន បានរាយការណ៍មកថា មានក្រុមអ្នកញៀន ល្បែងស៊ីសង ប្រភេទល្បែងប្រជល់មាន់ នៅចំណុចក្រោម ដើមស្វាយដី ចំការគេមួយកន្លែង ដោយឃ្លាតឆ្ងាយ ពីផ្លូវលេខ១១០ ប្រហែល១០០០ម៉ែត្រ ស្ថិតនៅក្នុងភូមិថ្កុល ឃុំត្រើយស្លា ស្រុកស្អាង ។ បន្ទាប់មកលោក នាយប៉ុស្តិ៍ត្រើយស្លា បានដឹកនាំកម្លាំង ធ្វើការបង្ក្រាប ដោយឃាត់ខ្លួនជន សង្ស័យបាន៤នាក់ រួមទាំងវត្ថុតាង ១ខ្នាយដែក ចំនួន២គូ, មាន់ជល់ ចំនួន១ក្បាល , ទូរស័ព្ទ៣គ្រឿង, ប្រាក់ចំនួន ៣៣.៩០០រៀល , បង់សម្រាប់រុំ ជើងមាន់មួយចំនួន ក្រោយមកកម្លាំងនគរបាល បាននាំជនសង្ស័យ ទៅកាន់អធិការដ្ឋាន ដើម្បីកសាង សំណុំរឿងចាត់ការ ទៅតាមនីតិវិធីច្បាប់៕

ផ្តល់សិទ្ធដោយ ដើមអម្ពិល