ខេត្តកំពង់ចាម ៖  រថយន្ត២គ្រឿងបានបើកពន្លះគ្នាយ៉ាង ពេញទំហឹងលើកំណាត់ផ្លូវជាតិលេខ៦ បណ្តាលឱ្យមនុស្សស្លាប់ម្នាក់ ដោយកៀបជាប់ក្នុងរថយន្ត និង១១នាក់ទៀតរងរបួសធ្ងន់-ស្រាល កាលពីវេលាម៉ោង០១ និង២០នាទីរំលង អធ្រាត្រឈានថ្ងៃទី១៥  ឧសភា២០១៥ ស្ថិតនៅចំណុច ភូមិបាធាយ ឃុំបាធាយ ស្រុកបាធាយ ។

លោកអនុសេនីយ៍ឯក សុខ សូល អធិការរងនគរបាល ស្រុកបាធាយបានឱ្យដឹងថា រថយន្តម៉ាកសាំងយ៉ុង ដឹកអ្នកដំណើរពាក់ ស្លាកលេខភ្នំពេញ 2N-6429 បើកបរដោយឈ្មោះអេង គួយ អាយុ២៨ឆ្នាំ មានទីលំនៅភូមិរកាត្រត ឃុំគោកគង់លិច ស្រុកកញ្ចៀច ខេត្តព្រៃវែង និងអ្នករួមដំណើរចំនួន១១នាក់ ដោយបើកក្នុងទិសដៅពីត្បូងទៅជើង ក៏បានបុកជាមួយនឹងរថយន្ត ម៉ាកហ៊ីយ៉ានដាយធុនធំពាក់ ស្លាកលេខកំពង់ឆ្នាំង 3A-0386ត្រង់ចំណុចផ្លូវកោង ក្នុងទិសដៅបញ្ច្រាសគ្នា ។

លោកបន្តថា ក្នុងហេតុការណ៍នោះ រថយន្តសាំងយ៉ុងបានរងការ ខូចខាតយ៉ាងដំណំ ដោយបានកៀបជាប់ អ្នកបើកបរស្លាប់ភ្លាមៗ និងអ្នកដំណើរ ប្រុសទាំង ១១នាក់បានរងរបួសធ្ងន់-ស្រាល ។ បន្ទាប់ពីសមត្ថកិច្ចចុះទៅដល់ ក៏បានហៅរថយន្តសង្គ្រោះដឹកអ្នករងរបួស ទៅមន្ទីរពេទ្យបង្អែកស្រុកបាធាយ ។

ផ្តល់សិទ្ធដោយ កោះសន្តិភាព