ចិន៖ រឿងហេតុដ៏គួរ ឲ្យភ្ញាក់ផ្អើលមួយ បានកើតឡើង បន្ទាប់ពីមាន ស្ត្រីម្នាក់ដែល ជាអ្នកធ្វើដំណើរ ដោយថ្មើរជើង នៅតាមផ្លូវសាធារណៈ ត្រូវបានប៉ូលីសចរាចរ យកញញួរដែក មកវាយសំពងក្បាល ក៏ព្រោះតែនាង ដើរឆ្លងផ្លូវ ពេលភ្លើងស្តុបក្រហម។

យោងតាមប្រភព ព័ត៌មានបាន ឲ្យដឹងថា នារីជាប៉ូលីស ចរាចរស្ម័គ្រចិត្ត ដែលមិនទាន់ ស្គាល់ឈ្មោះម្នាក់ បានយកញញួរដែក ទៅសំពងក្បាល នារីជាអ្នក ដំណើរម្នាក់ ម្តងហើយម្តងទៀត បន្ទាប់ពីនារី ម្នាក់នោះមិនព្រម ស្តាប់ការបញ្ជា ហាមមិនឲ្យឆ្លងផ្លូវ មួយខ្សែនៅក្នុង ភាគខាងកើត នៃខេត្តសានទុង ប្រទេសចិន កាលពីម៉ោង ៦ព្រឹក ថ្ងៃអង្គារ សប្តាហ៍នេះ។

ផ្អែកលើសម្តី របស់សាក្សី ដែលបានឃើញ ហេតុការណ៍ផ្ទាល់ បានបញ្ជាក់ប្រាប់ថា រវាងនារីជា អ្នកដំណើរ និងប៉ូលីសចរាចរ ស្រីរូបនោះ ឧស្សាហ៍មានជម្លោះ ជាមួយគ្នាជារឿយៗ ទាក់ទងនឹង រឿងដែលដើរ ឆ្លងផ្លូវពេល ភ្លើងស្តុបក្រហម ហើយថ្ងៃដែល កើតហេតុនេះ ក៏មិនខុសពី រាល់ដងដែរ ដោយនារីជា អ្នកដំណើរម្នាក់នោះ នៅតែធ្វើព្រងើយ ស្តាប់មិនឮ នូវការបញ្ជា ហាមមិនឲ្យ ឆ្លងផ្លូវពី សំណាក់ប៉ូលីស ចរាចររូបនោះ។

នារីជាអ្នកដំណើរ ដែលរឹងទទឹង ក្នុងការឆ្លងផ្លូវ ពេលស្តុបក្រហម កំពុងដេកសន្លប់ ដោយសារការ វាយនឹងញញួរ

សាក្សីបានបន្តទៀតថា ក្រោយមកដោយ ឃើញបែបនេះ ហើយប្រហែលជា ទ្រាំមិនបាន នារីដែលពាក់ ឯកសណ្ឋាន ជារបៀប ប៉ូលីសចរាចរស្ម័គ្រចិត្ត នោះបានរង់ចាំរហូត ទាល់តែភ្លើងស្តុប បៃតង រួចក៏ស្ទុះរត់ ឆ្លងផ្លូវទៅរក នារីជា អ្នកដំណើរម្នាក់នោះ នឹងបានទាញ ញញួរមកវាយ នាងមិនដកដៃ ព្រមទាំងបាន ស្រែកថា “យើងនឹងមិន ឲ្យនាងឆ្លងផ្លូវ ក្នុងពេលស្តុបក្រហម ទៀតទេ!”។

យ៉ាងណាមិញ ក្រោយហេតុការណ៍ នេះកើតឡើងរួច នារីជាអ្នកដំណើរ ក៏ដេកសន្លប់ ស្តូកស្តឹងនៅ លើផ្លូវនិង ត្រូវបានបញ្ជូន ទៅមន្ទីរពេទ្យ ដើម្បីធ្វើការសង្រ្គោះ រីឯនារីជា ប៉ូលីសចរាចរស្ម័គ្រចិត្ត នោះក៏ត្រូវបាន ចាប់ខ្លួន និងរង់ចាំ ការស៊ើបអង្កេត ជុំវិញករណីនេះ ផងដែរ៕

នារីជា ប៉ូលីសចរាចរ ស្ម័គ្រចិត្ត និងញញួរសម្រាប់ ការវាយប្រហារ

ប្រភព៖ ដេលីម៉េល

ដោយ៖ សុជាតិ

ខ្មែរឡូត