ភ្នំពេញ ៖ ប្រធានគម្រោង អង្គការចលនា ដើម្បីសុខភាពកម្ពុជា អ្នកស្រី ម៉ក់ ទេវិន្ទ បានបញ្ជាក់ ក្នុងសិក្ខា សិលា ស្ដីពីគ្រឿងស្រវឹង និងវិធានការកាត់បន្ថយការប្រើប្រាស់ ថា តួរលេខ នៃការផឹកស្រា របស់ស្រ្តី កម្ពុជានឹងមានការកើនទ្បើង ខ្ពស់ជាងបុរស ទៅថ្ងៃខាងមុខ។

អ្នកស្រីបានមានប្រសាសន៍ក្នុងសិក្ខាសាលា ខាងលើកាលពីពេលថ្មីៗនេះថា ការកើនទ្បើងនៃចំនួនស្រ្ដី ដែលសេពនូវគ្រឿងស្រវឹងនេះ បណ្ដាល មក ពីកត្ដាជាច្រើនដូចជា កន្លែងលក់គ្រឿងស្រវឹង មានស្ទើរគ្រប់ ទីកន្លែង មិនថាតូបចែកចាយឬ កន្លែងក្រោមឆ័ត្រ នានា តម្លៃគ្រឿងស្រវឹងថោក ការផ្សាយពាណិជ្ជកម្ម គ្រឿងស្រវឹងមានគ្រប់រួបភាពគឺ ការផឹកហើយ ទទួលបានរង្វាន់ជាច្រើន ដែលជាការលើកទឹក ចិត្ដដល់អ្នកផឹក ការផ្ដល់ ឱកាសឲ្យអ្នកផឹកងាយស្រួលស្វែងរកន្លែងទិញគ្រឿងស្រវឹង មិនកំណត់ពេល វេលានៃការលក់គ្រឿងស្រវឹង គ្មានច្បាប់ត្រឹមត្រូវ សម្រាប់អ្នកលក់និង អ្នកបរិភាគគ្រឿងស្រវឹង ជាពិសេស នោះ គឺអាចរកទិញ គ្រឿងស្រវឹងបាន ២៤ម៉ោងតែម្ដង។

លោក ស្រី ម៉ក់ ទេវិន្ទ មានប្រសាសន៍ទៀតថា «នៅពេលនេះ ស្ថិតិដែលយោងទៅតាមស្រាវជ្រាវ មួយផ្នែក ក្នុងរយៈពេល ១២ខែចុង ក្រោយនេះ បានបង្ហាញ ឲ្យឃើញថា ស្រី្ដ ពិសារគ្រឿងស្រវឹង ២៣.២ភាគរយ ឯណោះ ដោយការពីពេលមុន ស្ទើរតែគ្មានផង ហើយចំពោះ កុមារមិនទាន់ គ្រប់វ័យផង ក៏ពិសា គ្រឿងស្រវឹង ច្រើនណាស់ដែរ”។

លោកស្រី បន្ថែមទៀតថា អ្នកដែលចាប់ផ្ដើមប្រើប្រាស់គ្រឿងស្រវឹង សម្រាប់កុមារមិនទាន់គ្រប់វ័យ នៅសម័យ បច្ចុប្បន្ន មានយ៉ាងតិចណាស់ ១១.៣ ភាគរយចាប់ពីអាយុ ៨-១៧ ឆ្នាំ ហើយពិសា គ្រឿងស្រវឹងញឹកញាប់ផងដែរ។

សូមបញ្ជាក់ថា អង្គការចលនាដើម្បីសុខភាពកម្ពុជាបានស្នើឲ្យរាជរដ្ឋាភិបាលកម្ពុជា ចាត់វិធានការ ចំនួនបួន ដ៏មានប្រសិទ្ធិភាពក្នុង ការកាត់បន្ថយ ការប្រើប្រាស់ គ្រឿងស្រវឹង មានដូចជា វិធានការ តំលើងពន្ធ , ហាមផ្សាយពាណិជ្ជកម្ម , កំហិតការលក់ គ្រឿងស្រវឹង និងកំណត់ អាយុអាចប្រើប្រាស់ គ្រឿងស្រវឹង ជាពិសេសនឹងកំណត់ច្បាប់ជុំវិញនឹងការគ្រឿងស្រវឹងឲ្យបានត្រឹមត្រូវ៕

ផ្តល់សិទ្ធដោយ ដើមអម្ពិល