ចិន៖ ក្រោយពី មានព័ត៌មាន ដ៏ល្បីរន្ទឺមួយ អំពី នាយកក្រុមហ៊ុនចិន ចំណាយប្រាក់ រាប់លានដុល្លារ ជូនបុគ្គលិក ៦,៤០០នាក់ ទៅ កំសាន្តនៅ ប្រទេសបារំាងមក ស្រាប់តែពេលថ្មីៗនេះ ក្រុមហ៊ុនចិន ដ៏ធំមួយផ្សេងទៀត ក៏បានចេញលុយ ប៉ាវបុគ្គលិក ១២,៧០០នាក់ ឲ្យទៅកំសាន្តសប្បាយ នៅប្រទេសថៃ វិញម្តង។

បុគ្គលិក ១២,៧០០ ក្រុមហ៊ុនចិនមួយ នឹងធ្វើដំណើរទេសចរណ៍មកកាន់ប្រទេសថៃ

យោងតាមប្រភពព័ត៌មាន បានឲ្យដឹង ក្រុមហ៊ុនចិន Infinitus បាននាំបុគ្គលិក សរុប ១២,៧០០នាក់ ទៅដើរកំសាន្ត ក្នុងប្រទេសថៃ ដែលដំណើរ កំសាន្តនេះ ត្រូវបានបែងចែក ជាក្រុមតូចៗ មានបុគ្គលិក ពី ២,០០០ ទៅ ៣,០០០ នាក់ នឹងធ្វើដំណើរ ទៅប្រទេសថៃ ចាប់ថ្ងៃទី ១០ ដល់ ២៦ ខែ ឧសភា នេះបើតាមការបញ្ជាក់ ពីអាជ្ញាធរទេសចរណ៍ ប្រចាំប្រទេសថៃ។

ក្នុងនោះ អ្នកស្រី Juthaporn Rerngronasa ដែលជាមន្ត្រីអាជ្ញាធរ ទេសចរណ៍ថៃ បានប្រាប់សារព័ត៌មាន Bangkok Post ឲ្យដឹងថា បុគ្គលិក ក្រុមហ៊ុន ចិននេះ នឹងចំណាយពេល ៣យប់ ដើម្បីដើរកំសាន្ត នៅក្នុងទីក្រុង បាងកក និង បីយប់ទៀត នៅ ប៉ាតាយ៉ា ដែលពួកគេ នឹង ស្នាក់នៅ ក្នុងសណ្ឋាគារ លំដាប់ ផ្កាយ ៤ និង ផ្កាយ ៥ ។ អ្នកស្រី បន្ថែមទៀតថា សំរាប់ កញ្ចប់ទេសចរណ៍ របស់បុគ្គលិក ក្រុមហ៊ុននេះ នឹងរំពឹងថា អាចរក ចំនូល ដល់វិស័យទេសចរណ៍ថៃ ប្រហែលជា ៦០០ លានបាត (ប្រហែល១៨លានដុល្លារ) ហើយក្រុមហ៊ុននេះ ក៏បានកក់ ជើងយន្តហោះ ចំនួន ១១០ ជើង ដើម្បីនាំបុគ្គលិក របស់ពួកគេ ធ្វើដំណើរទៅ ប្រទេសថៃ រួចជាស្រេច។

គួរបញ្ជាក់ដែរថា ក្រុមហ៊ុន Infinitus ជាសហគ្រាស ផលិត និង ចែកចាយ ផលិតផល ឱសថព្យាបាលសុខភាព ផលិតផលថែរក្សាសម្រស់ និង ស្បែក ដ៏ធំមួយនៅ ក្នុងប្រទេសចិន ដែលក្រុមហ៊ុននេះ មាន ២៦ទីតាំងធំៗ  និង មានហាង លក់ផលិតផល តូចៗ ជិត ៥,០០០ កន្លែង ពាសពេញ ប្រទេសចិន ៕

បុគ្គលិកក្នុងក្រុមហ៊ុន ចិននេះ

ប្រភព shanghaiist | bangkokpost

ដោយ ៖ ទីន

ខ្មែរឡូត