ភ្នំពេញ ៖ ស្ត្រីជាប់ចោទ ជាម្តាយចុងម្នាក់ កាលពីថ្ងៃច័ន្ទទី១១ ខែឧសភា ឆ្នាំ២០១៥ ត្រូវបាន សាលាដំបូង រាជធានីភ្នំពេញ ជំនុំជម្រះ និងកាត់ទោសពីបទ «ហិង្សាមានស្ថានទម្ងន់ទោស» ដោយសារ មរណភាព នៃជនរងគ្រោះ ជាប់ទាក់ទងនឹងករណីវាយ ធ្វើទារុណ កម្មលើកុមារារងគ្រោះម្នាក់អាយុ៦ឆ្នាំ ដែលត្រូវជាកូនចុង (កូនរបស់ប្តីខ្លួន ជាមួយប្រពន្ធមុនដែលស្លាប់) បណ្តាលឲ្យ ដាច់ពោះវៀនស្លាប់ ប្រព្រឹត្តនៅក្នុងភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញកាលពីថ្ងៃទី៩-១០-១១ ខែធ្នូ ឆ្នាំ២០១៤។

លោក ជា សុខហៀង ប្រធានចៅក្រម ជំនុំជម្រះ នៃសាលាដំបូង រាជធានីភ្នំពេញ បានឲ្យដឹងថា  ជនជាប់ចោទខាងលើនេះមាន ឈ្មោះ សេង ស្រីទីន ភេទស្រី អាយុ២៧ឆ្នាំ មានទីលំនៅ ភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ។

លោកចៅក្រមបានបញ្ជាក់ថា ឈ្មោះ សេង ស្រីទីន ត្រូវ បានតំណាងអយ្យការ ចោទប្រកាន់ពីបទ «ហិង្សាមានស្ថានទម្ងន់ទោស» ដោយសារមរណភាព នៃជនរងគ្រោះ តាមបញ្ញាតមាត្រា ២២៤ នៃក្រមព្រហ្មទណ្ឌ នៃព្រះរាជាណាចក្រកម្ពុជា។ ឈ្មោះ សេង ស្រីទីន ត្រូវបានចាប់ខ្លួនកាលពីថ្ងៃទី១៦ ខែធ្នូ ឆ្នាំ២០១៤ តាមបណ្តឹងរបស់ជីដូន របស់កុមារា។ 

ចំណែកឯកុមារា រងគ្រោះ មានឈ្មោះ សារី វរៈបុត្រ ភេទប្រុស អាយុ៦ឆ្នាំ ដែលត្រូវជាកូនចុង របស់ឈ្មោះ សេង ស្រីទីន។  លោកស្រី គង់ ស៊ីណា ដែលត្រូវជាយាយ របស់កុមារារងគ្រោះ បាននិយាយថា នៅក្នុងរឿងក្តីនេះ លោកស្រី សុំឲ្យតុលាការ សម្រេចផ្តន្ទាទោសដាក់ ពន្ធនាគារ ជនជាប់ចោទឲ្យ បានធ្ងន់ធ្ងរ តាមច្បាប់ និងប្តឹងទាមទារជម្ងឺចិត្តចំនួន១ម៉ឺនដុល្លារអាមេរិក។ សាលាដំបូងរាជធានីភ្នំពេញ នឹងប្រកាសសាលក្រម នៃ សំណុំរឿងក្តីនេះ នៅព្រឹក ថ្ងៃទី២២ ខែឧសភា ឆ្នាំ២០១៥ ខាងមុខនេះ៕

ផ្តល់សិទ្ធដោយ ដើមអម្ពិល