ខេត្តកំពង់ឆ្នាំង ៖ នារីវ័យ២៥ឆ្នាំម្នាក់ បានរងរបួសធ្ងន់ ដោយសារជិៈម៉ូតូលឿនពេក បណ្តាលអោយ ដួលដោយខ្លួនឯង កាលពីវេលាម៉ោង ៣ និង៤៥នាទីល្ងាច ថ្ងៃទី៩ ខែឧសភា ឆ្នាំ២០១៥ នៅតាមផ្លូវក្រាលកៅស៊ូ ក្នុងខេត្តស្ថិតក្នុង ភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។

សមត្ថកិច្ចនគរបាល ក្រុងកំពង់ឆ្នាំង បាននិយាយថា នារីរងគ្រោះមានឈ្មោះ ខែម សុខឿន អាយុ២៥ឆ្នាំ មានទីលំនៅ ភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ។

មុនពេលកើតហេតុ គេឃើញនារីរងគ្រោះ បើកម៉ូតូម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ បាត់ដំបង 1K-6339 យ៉ាងលឿន តាមផ្លូវក្រាលកៅស៊ូ ក្នុងខេត្ត ក្នុងដំណើរ ពីលិចទៅកើត លុះពេលមកដល់ ចំណុចកើតហេតុ ស្រាប់តែច្រឡោត ដួលអូស ជាង២០ម៉ែត្រ បណ្តាលអោយរងរបួសធ្ងន់ ។

ក្រោយពេលកើតហេតុ សមត្ថកិច្ចបានហៅរថយន្ត របស់មន្ទីរពេទ្យ ដឹកនារីរងគ្រោះ ទៅសង្គ្រោះ នៅមន្ទីរពេទ្យខេត្ត ជាបន្ទាន់ ។ ចំណែកម៉ូតូ សមត្ថកិច្ចបានយករក្សាទុក នៅអធិការដ្ឋាន នគរក្រុងដើម្បី ទុកអោយម្ចាស់ដើមវិញ ។

បើតាមស្ត្រីជាម្តាយ ដែលមានមុខរបរ លក់លៀសហាល បានយំរៀបរាប់ថា គាត់គ្មានប្រាក់ សម្រាប់បង់ថ្លៃមន្ទីរពេទ្យទេ ។ នៅមុនពេលកើតហេតុ កូនស្រីគាត់ បានផឹកស្រវឹងបន្តិចដែរ ហើយបានខ្ចីម៉ូតូគេ ទៅទិញម្ហូប ក៏ជួបបញ្ហាបែបនេះ ។

ទោះយ៉ាងណា លោកសូរិន្ទ ទីរ៉ាវុឌ្ឍី ប្រធានមន្ទីរពេទ្យខេត្ត ធ្លាប់បាននិយាយថា អោយតែក្រីក្រ ពិតប្រាកដ មានការទទួលស្គាល់ ពីអាជ្ញាធរមូលដ្ឋាន មន្ទីរពេទ្យខេត្ត មិនយកប្រាក់ឡើយ ព្រោះមានអង្គការរាក់ ជាអ្នកធានាបង់ប្រាក់ ជំនួសជនក្រីក្រ ទូរទាំងខេត្ត ។

ផ្តល់សិទ្ធដោយ កោះសន្តិភាព