ចិន-សាំងហ្គាពួរ៖ យោងតាមប្រភពព័ត៌មាន បានឲ្យដឹងថា តារាសម្តែងហុងកុង ដ៏ល្បីឈ្មោះ Jackie Chan ឬ ឈិន ឡុង ត្រូវបានជ្រើសតាំង ជាឯកអគ្គរដ្ឋទូត ប្រឆាំងនឹងគ្រឿងញៀន ប្រចាំប្រទេសសាំងហ្គាពួរ ដោយលោកបាននិយាយថា លោកគាំទ្រ យ៉ាងពេញទំហឹង ឲ្យមានច្បាប់ប្រហារជីវិត ចំពោះអ្នកជួញដូរគ្រឿងញៀន។

លោក Jackie Chan ឬ ឈិន ឡុង

ជាមួយគ្នានេះដែរ តារាសម្តែង ពូកែខាងក្បាច់កុន រូបនេះ បានបន្ថែមថា “គ្រឿងញៀន បាននឹងកំពុងបំផ្លាញយុវវ័យ រាប់ពាន់នាក់ និងក្រុមគ្រួសារ របស់ពួកគេផងដែរ”។

គួររំលឹកផងដែរថា កាលពីខែសីហា ឆ្នាំ២០១៤ កន្លងទៅនេះ កូនប្រុសរបស់ ឈិន ឡុង ដែលមានឈ្មោះថា Jaycee Chan ត្រូវបានប៉ូលីសឃាត់ខ្លួន ពីបទលាក់ទុក និងប្រើប្រាស់គ្រឿងញៀន នៅក្នុងផ្ទះ នៅឯទីក្រុងប៉េកាំង ប្រទេសចិន ហើយត្រូវបានតុលាការ កាត់ទោស ឲ្យជាប់ពន្ធធនាគារ រយៈពេល ៦ខែផងដែរ។


លោក Jaycee Chan កូនប្រុសរបស់ ឈិន ឡុង

យ៉ាងណាមិញ លោក Jackie Chan ឬ ឈិន ឡុង គឺជាតារាដំបូងបង្អស់ ដែលត្រូវបានតែងតាំង ជាឯកអគ្គរដ្ឋទូត ប្រឆាំងនឹងគ្រឿងញៀន ប្រចាំប្រទេសសាំងហ្គាពួរ។ កាលពីឆ្នាំ២០០៩ ឈិន ឡុង ក៏ត្រូវបានគេដាក់ងារ ជាផ្លូវការមួយ ថាជា “ឯកអគ្គរដ្ឋទូត ត្រួតពិនិត្យ គ្រឿងញៀន” ដែលងារនេះ ត្រូវបានដាក់ដោយ ប៉ូលីសរបស់ប្រទេសចិន។

គួរបញ្ជាក់ផងដែរថា ទាំងប្រទេសសាំងហ្គាពួរ និងប្រទេសចិន បានអនុវត្តច្បាប់ប្រហារជីវិត ចំពោះអ្នកជួញដូរគ្រឿងញៀន ហើយ។

ឈិន ឡុង បានបន្ថែមទៀតថា៖ “ចំពោះករណីខ្លះ ខ្ញុំគាំទ្រ ឲ្យកាត់ទោសប្រហារជីវិត ចំពោះអ្នកជួញដូរគ្រឿងញៀន។ នៅពេលដែលគ្រឿងញៀន បានបំផ្លាញមនុស្ស រាប់ពាន់នាក់ ខ្ញុំគិតថាមនុស្សទាំងនោះ និងលែងប្រើការ បានទៀតហើយ។ ដូច្នេះហើយ អ្នកជួញដូរគ្រឿងញៀន គួរណាស់តែទទួលបាន ការកាត់ទោសប្រហារជីវិត”៕

ប្រភព ៖ អេស៊ានថោន

កែសម្រួលដោយ ៖ ប៊ី

ខ្មែរឡូត